Choose Language
Old Testament Books
New Testament Books
1Мылкыдыз усьыку курадӟисьлэн Кузё-Инмар азьын куректонзэ вераса вӧсяськонэз.
2Кузё-Инмаре! Кыл мынэсьтым вӧсяськемме,
викышъям куарае Тон доры мед вуоз.
3Ымнырдэ мынэсьтым эн ваты,
куректоно-кайгуо нуналам пельдэ мон пала мыкырты.
[Тыныд] вазиськон нуналам ӝоггес кыл монэ.
4Улоно нуналъёсы ӵын кадь быризы, лыосы сэрегпум кадь ӝуамын.
5Погыртэм турын кадь сюлмы куасьмиз,
няньме но сиыны вунэтӥсько.
6Куараен лулӟылӥськыса улэмен, лыосы ку бордам лякиськизы ни.
7Кыр дуннеысь пеликан тылобурдолы мон укшасько,
куштӥськем интыосын улӥсь уйсылы кельшисько.
8Уг изиськы, липет йылэ огназ кылем тылобурдо кадь мон.
9Нуналлы быдэ тушмонъёсы сантэмало,
лекъяськыса улӥсьёс монэ каргало.
10Нянез кадь пенез сиисько, юонме синвуэн сурасько.
11Вожпотонэд, йыркуред потыку, Тон ӝутӥд но куштӥд монэ.
12Улоно нуналъёсы кошкись вужер кадесь; мон турын кадь куасьми.
13Нош Тон, Кузё-Инмаре,
пумтэм вапумъёс ӵоже эксэй пуконын пукиськод;
выжыысь выжые нимдэ данъяса возёзы.
14Тон султод но Сӥонэз жалялод,
уго сое гажан-жалян дыр вуиз, дыр вуиз.
15Тынад ляльчиосыд солэсь изъёссэ яратӥзы,
солэн сюй пырыез но жаль потӥз.
16Кузё-Инмарлэн нимызлэсь калыкъёс куалектозы,
дунне вылысь вань эксэйёс Тынад данэдлэсь кышкалозы.
17Уго Кузё-Инмар Сӥонэз пуктоз но пиштӥсь данлыкеныз лыктоз.
18Катьтэммемъёслэсь вӧсяськемзэс кабыл басьтоз,
соослэсь вӧсяськемзэс кулэтэм уз кары.
19Та сярысь вуоно выжылы гожтӥськоз,
лыктӥсь выжы Кузё-Инмарез данъялоз.
20Со Аслаз дун-чылкыт ӝужыт интыысеныз учке,
инмысен Кузё-Инмар музъем вылэз чакла.
21Пытсэтын пукисьёслэсь ӝуштэмзэс Со кылэ,
виыны пуктэм муртъёсты мозмытэ.
22Сӥонысен Кузё-Инмарлэсь нимзэ соос мед ивортозы,
Иерусалимын Солэсь данзэ мед тодытозы,
23куке вань калыкъёс огазе люкаськозы,
эксэйлыкъёс Кузё-Инмарлы ужаны кутскозы.
24Сюрес вылысен Со мынэсьтым кужымме быдтӥз,
нуналъёсме вакчиятӥз.
25Мон шуи: «Эй, Инмаре! Улоно даурелэн шораз эн быдты монэ.
Тон выжыосысь выжыосы улӥськод».
26Кутсконаз ик Тон, [Кузё-Инмаре,] музъемез кылдытӥд,
инъёс но – Тынад киыдлэн ужез.
27Соос бырозы, нош Тон улод, ваньзы соос выл дӥсь кадь пӧсьтозы,
Тон соосты дӥськутэз кадь воштод – соос воштӥськозы.
28Нош Тон – сыӵе ик, воштӥськисьтэм, Тынад улон аръёсыд уз быре.
29Ляльчиосыдлэн нылпиоссы улозы,
соослэн выжызы Тон азьын юнмалоз.
Глава 101
