Bible
Choose Language
Old Testament Books
New Testament Books
ПСАЛТИРЬ
100-тӥ ПСАЛОМ
Давидлэн крезьгурез.
1Гажан-жалянэд, шонер судэд сярысь кырӟало,
Кузё-Инмаре, Тонэ данъяса кырӟало.
2Дун-шектэм улонлэсь сюрессэ валаны тыршо:
ку Тон мон доры лыктод?
Чылкыт сюлмыным корка шортӥм ветло.
3Ярантэм-шакшы ужез син азям уг пукты;
сьӧсь ужез адӟонтэм карисько, мон борды со уз лякиськы.
4Азэм сюлэм мон дорысь палэнтэмын луоз,
уродлык сярысь тодэме но уг поты.
5Аслаз матысез сярысь лушкемен кыл вӧлдӥсез улляло,
вылтӥяськись, урод сюлэмо муртэн артэ уг пуксьы.
6Музъем вылысь оскиськымон муртъёсыз синъёсы утчало,
соос монэн валче мед пукозы вал шуыса;
дун-шектэм улонлэн сюрестӥз ветлӥсь мыным ужась луоз.
7Кескич ужась коркам уз улы, пӧяськись мурт син азям уз кыльы.
8Кузё-Инмарлэн городысьтыз законлы пумит улӥсьёсты
одӥгтэм быдто,
вазь ӵукнаысен музъем вылысь сьӧлыклэсь кышкасьтэмъёсты
ваньзэс пазьго.
Глава 100
