Choose Language
Old Testament Books
New Testament Books
1Хорлэн кивалтӥсезлы. Пилэн кулонэз пумысен. Давидлэн крезьгурез.
2Вань сюлмыным, Кузё-Инмаре, [Тонэ] данъяло,
вань паймымон ужъёсыд сярысь верало.
3Тон понна шумпото, шулдыръясько,
Тынэсьтыд нимдэ данъяса кырӟало, Вылысь Инмаре.
4Тушмонъёсы берлань чигнакузы,
ӵемтыса усёзы но Тынад азяд бырозы,
5уго мынэсьтым судме, судме шонер Тон нуид;
престол вылэ Тон пуксид, шонерлыко Судить Карись.
6Тон калыкъёслы вождэ поттӥд,
сьӧлыклэсь кышкасьтэм муртэ быдтӥд,
соослэсь нимзэс дауръёслы ӵушыса куштӥд.
7Тушмонлэн пыӵал-тӥрлыкез чик ӧз кыльы ни,
каръёссэс Тон куашкатӥд; соосын ӵош соосты тодэ ваён но быриз.
8Нош Кузё-Инмар пумтэм дауръёс ӵоже улэ,
Аслэсьтыз престолзэ суд нуналлы Со дасяз,
9дуннеез Со шонер судить кароз,
калыкъёслы шонерлыко суд лэсьтоз.
10Кузё-Инмар ултӥям муртлы – утиськон инты,
куректон-кайгырон дыръёсы – ватӥськон инты;
11Тынэсьтыд нимдэ тодӥсьёс оскиськыса улозы,
уго Тон, Кузё-Инмаре,
оскиськыса вазиськисьёсты кулэтэм уд кариськы.
12Сӥонын улӥсь Кузё-Инмарлы кырӟалэ,
вань калыкъёс пӧлын Солэн ужъёсыз сярысь вералэ.
13Вир кисьтэм понна Со кылэз юа уго:
тодаз возе, ултӥям муртъёслэсь викышъямзэс уг вунэты.
14Кузё-Инмаре, жаля монэ,
учкы тушмонъёсы бордысь потӥсь курадӟонъёсы шоры –
Тон монэ кулон капкалэн выжыысьтыз ӝутӥськод,
15вань данлыктэ ушъяса мед ивортылом шуыса;
Сӥон ныллэн капкаосыз выжыысен Тынад утёнэдлы шумпото.
16Гудӟем гуазы калыкъёс усизы,
ватыса пуктэм сьӧлтэтъёсазы пыдъёссы сьӧлтаськизы.
17Кузё-Инмар судзэ лэсьтэм бере тодмо луиз:
сьӧлыклэсь кышкасьтэмлэн кескич ужъёсыз сое ассэ куто.
18Сьӧлыклэсь кышкасьтэмъёс,
Инмарез вунэтэм вань калыкъёс адэ усёзы.
19Кураськисез пыраклы Инмар уз вунэты,
куанеръёслэн оскиськонзы пумтэм дырлы уз быры.
20Кузё-Инмаре, султы, адями быдӟым медаз кариськы,
Тон азьын калыкъёс судить каремын мед луозы.
21Кузё-Инмаре, соос вылэ кышкан лэзь,
калыкъёс мед тодозы, соос адямиос гинэ луо шуыса.
22Кузё-Инмаре, малы палэнын сылӥськод,
куректон-кайгуэ дыръя ватскыса улӥськод?
23Вылтӥяськон сямыныз сьӧлыклэсь кышкасьтэм куанерез ӝикатэ.
Кескич амалъёсыныз вырыкуз, со кутэмын мед луоз.
24Сьӧлыклэсь кышкасьтэм ас лулызлэн
юрӟым кулэ каронэныз ушъяське;
барыш люкась ассэ майбыр шуэ, Кузё-Инмарез кулэтэм каре.
25Сьӧлыклэсь кышкасьтэм ас вылтӥяськон сямыныз шуэ:
«Уз юа, уз утча»; солэн вань малпанъёсыз: «Инмар ӧвӧл!».
26Котькыӵе дыръёсын солэн сюресъёсыз гылытэсь,
Тынад судъёсыд солы кыдёкын,
вань тушмонъёсыз шоры со вылӥ мылкыдын учке;
27аслыз ачиз шуэ: «Уг куалекты,
вань улытозям мон доры урод уз лыкты».
28Ым тросаз солэн каргаськонъёс, кескич кылъёс, пӧяськонъёс;
солэн кылысьтыз-ымысьтыз курадӟон, бырон потэ.
29Гурт сьӧрын ватӥськыса пуке,
лушкем интыосысен янгыштэм муртэ виылэ;
солэн синъёсыз куанер мурт вылэ мертчиськыса уло.
30Куак пӧлысь сьӧсь пӧйшур кадь,
лушкем интыын возьмаськыса улэ,
куанерез кутон понна ватӥськон интыын чакласькыса пуке,
ас сьӧлтэтаз кыскыса куанерез нуэ.
31Лаптӥське, выдэ, – куанеръёс солэн кужмоесь гижыосыз улэ сюро.
32Аслыз ачиз шуэ:
«Инмар вунэтӥз, Аслэсьтыз ымнырзэ ворсаз, ноку но уз адӟы».
33Инмаре, Кузё-Инмаре, султы, кидэ ӝут,
ултӥям муртъёстэ [чылкак] эн вунэты.
34Малы сьӧлыклэсь кышкасьтэм кулэ уг кары Инмарез,
аслыз ачиз шуэ: «Тон кылме уд юа».
35Тон адӟиськод,
ултӥянъёс, ёртыса возёнъёс шоры Тон учкиськод
Аслад киыныд пунэмзэ берыктон понна.
Тынад киулад куанер ассэ сётэ,
анайтэм-атайтэмлы Тон юрттӥськиськод.
36Сьӧлыклэсь кышкасьтэмлэсь, лек муртлэсь суйбыгытсэ куашкаты,
солэсь сьӧлыко ужъёссэ утчаса но шедьтыны медаз ни луы.
37Кузё-Инмар – пумтэм дауръёслы, котькулы но эксэй;
Солэн музъем вылысьтыз язычникъёс ышозы-бырозы.
38-39Кузё-Инмаре!
Востэм муртъёслэсь кулэ каронъёссэс Тон кылӥськод,
соослэсь сюлэмзэс юнматы,
анайтэм-атайтэмлы, ултӥям муртлы дурбасьтон понна пельдэ усьты,
музъем вылысь адями кышкатыса медаз ни возьы.
Глава 9
