Choose Language
Old Testament Books
New Testament Books
1«Тодӥськод-а изо гурезьын кыр кечъёслэсь кечпи ваён дырзэс,
адӟыны кылдылӥз-а кыр пужейлэсь кунян ваемзэ?
2Секытэн ветлон толэзьёссэс лыдъяны быгатӥськод-а?
Пияны вуэм дырзэс тодӥськод-а?
3Асьсэлэсь пичиоссэс вордӥськытыку,
секыт ныпъетсэс сэрпалтыку, соос куасаллясько.
4Пичиоссы кужым люкало, луд вылын будо,
кошко но соос доры уг ни берытско.
5Кыр ишакез кин эрике лэзиз, кыр ишаклэсь сьӧлтэтсэ кин басьтӥз, –
6кыр дуннеез, солы дор мед луоз шуыса, Мон сётӥ,
сылало музъемез улон интылы висъяй?
7Городысь трос калыко улонэз со серем каре,
пудо уллясьлэсь куаразэ кылэмез ӧвӧл,
8гурезьёсысь сиён утча, котькыӵе вож турын-куар сьӧры уйылӥське.
9Одӥг сюро кыр ошлэн тон понна тыршемез потоз-а,
турын тыронэд дорын уйзэ потоз-а?
10Одӥг сюро кыр ошез борозда дуре гозыен думыны но
бусыдэ усыятыны быгатӥськод-а?
11Со вылэ оскиськод-а – уго солэн кужымез бадӟым,
аслэсьтыд уждэ солы сётод-а?
12Тынэсьтыд будэтэм ю-няньдэ со ваёз но
итымад тыраз нянь люкалоз шуыса, солы оскиськод-а?
13Тутыгыш тылобурдолы тон-а чебересь бурдъёс понӥд,
страуслы тылыен гон тон-а сётӥд?
14Со аслэсьтыз пузъёссэ музъем вылэ кельтэ, луо вылын сое шунтэ,15вунэтэ, пыд улын паньгатыны быгатозы,
кыр пӧйшур но лёганы быгатоз шуыса;
16аслэсьтыз нылпиоссэ со жалясьтэм, мурт нылпиосты кадь каре,
уг но кышкатскы, солэн ужез юнме луоз шуыса,
17малы ке шуоно Инмар солы визьлык сётымтэ, валан но висъямтэ,
18нош вылӥе ӝутске ке, вал но вал вылын пукисез серекъя.
19Тон-а валлы кужым сётӥд, чыртызэ изнэсэн тон-а котыртӥд?
20Саранчаез кадь кышкатыны тон сое быгатӥськод-а?
Нырпасеныз коретэмез туж шимес кылӥське;
21пыдыныз сюез гудэ, кужыменыз бадӟымъяське;
ожмаськон тӥрлыклэн пумитаз мынэ;
22кышкытлыкез со серем каре, уг куалекты, мечлэсь но уг палэнскы;
23ньӧл возён сепыс со вылын жингыртэ,
шибоды чиля-пиштэ, зӥръян пурт но;
24мылкыдыз лӧптыку, вожпотонэз бугырскыку, сюез сыске,
гумы куара кылӥськыку, сылыны уг ни быгаты;
25гумы шудэм кылӥськыку, со гу! гу! куара поттэ но
кыдёкысен ожмаськонэз, ожйыръёслэсь бадӟым куаразэс,
черекъямзэс шӧдэ.
26Тынад визьлыкеныд-а душес лоба, лымшор пала бурдъёссэ вӧлъя?
27Тынад кылыдъя-а ӧрӟи вылӥе ӝутске но
ӝужыт интые аслыз кар лэсьтэ?
28Со гурезьысь из йылын улэ но гурезьлэн меӵ азяз,
тубыны-пырыны луонтэм интыосын кӧла;
29отысен аслыз сиён чакла-учке: солэн синъёсыз кыдёке учко;
30солэн пиосыз вир юо, кытын шӧй, отын ик со ачиз но».
31Кузё-Инмар, веранзэ азинтыса, Иовлы шуиз:
32«Дунне Кутӥсен ӵошатскись дышетоз на-а эшшо?
Инмарез пыкылыны вырись Солы ответ мед сётоз».
33Иов Кузё-Инмарлы ответ сётыса шуиз:
34«Мон номырлы ярасьтэм мурт; мар мон Тыныд вералом на?
Аслэсьтым ымме ӵоксасько.
35Одӥг пол мон верай, табере ответ уг ни сёты,
кык пол верай, азьланяз уг ни вера».
Глава 39
