Choose Language
Old Testament Books
New Testament Books
1[Елиуй верамысь дугдэм бере] Кузё-Инмар сильтӧл пушкысен
Иовлы ответ сётыса шуиз:
2«Кин тон сыӵе, Мынэсьтым малпанме юнме кылъёсын саптась?
3Воргорон кадь али аслэсьтыд кустэ дум:
Мон тынэсьтыд юало, нош тон Мыным валэкты:
4музъемлэсь инъетсэ Мон пуктыку, кытын тон вал?
Вера, тодӥськод ке.
5Кин солэсь быдӟалазэ мертаз, тодӥськод-а?
Яке со вылтӥ кин гозы кыскиз?
6Солэн инъетъёсыз мар бордын юнматэмын,
яке кин понӥз солэсь пыкъет иззэ,
7ӵук кизилиос ваньзы шумпотонэн-шулдыръяськонэн лӧптылыку,
вань Инмар пиос шумпотыса кесяськыку, тодӥськод-а?
8Кин зарезез капкаен ворсаз, со пыдлосен кӧт пушкысь кадь потыку,
9куке Мон солы пилемъёсты дӥськут кари,
тём пеймытэз солы шобрет лэсьтӥ,
10Мон пуктон-косонме солы юнматӥ, пытсэтъёс, капка пуктӥ
11но шуи: ”Та дырозь вуод но со вамен уд выжы,
татын пумыз тынад вылтӥяськись тулкымъёсыдлы?”
12Улытозяд куке но тон ӵукналы косон сётылӥд-а,
ӟардонлы солэсь интызэ возьматылӥд-а,
13музъемез пумъёстӥз (шобретэз кадь) мед кутоз но
отысь сьӧлыклэсь кышкасьтэмъёсты мед курткоз шуыса,
14печать улысь горд сюй кадь музъем мед воштӥськоз,
пӧртэм буёло дӥськут кадь мед луоз,
15сьӧлыклэсь кышкасьтэмъёслэн югытсы мед басьтӥськоз но
соослэн возьыттэм кизы мед сузмоз шуыса?
16Зарезьлэн мур азяз тон васькылӥд-а,
пыдэстэм дуннеез чакланы-эскерыны пырылӥд-а?
17Тон понна кулонлэн ӧсъёсыз усьтӥськылӥзы-а,
кулон вужерлэсь капказэ тон адӟылӥд-а?
18Музъемлэсь пасьталазэ тон адӟыны быгатӥд-а?
Валэкты, ваньзэ тае тодӥськод ке.
19Кытын югытлэн улон интыез доры сюрес,
кытын пеймытлыклэн интыез?
20Мар веранэз, пеймытлыклэн дуръёсаз тон вуылӥд,
солэн коркаез доры сюресэз но тодӥськод.
21Тае тон тодӥськод соин, – тон соку вордскемын ни вал,
тынад арескыд но туж бадӟым ини.
22Лымылэн возиськон гуаз тон пырад-а,
йӧзор возён интыез но адӟид-а,
23кудъёссэ Мон бугыръяськон дыръёслы возисько,
жугиськон, ожмаськон нуналлы утисько?
24Кыӵе сюрестӥ югыт кисьтӥське,
шундыӝужанысь тӧл кызьы музъем вылтӥ нуллӥське?
25Жаль бызись зор вуэз лэзён понна кин ӧр гудэ,
бадӟым куараё гудыриен чилекъянлы кин сюрес усьтэ,
26калыктэм музъем вылэ, кыр дуннее, кытын адями ӧвӧл,
мед зороз шуыса, кин косон сётэ,
27луоё кырез, будостэм кырез мускытатон понна,
турын норедлы будыны кин ву сётэ?
28Зорлэн атаез вань-а? Лысву шапыкез кин вордскытэ?
29Кинлэн кӧтысьтыз йӧ потэ, ин пужмерез но кин вордскытэ?
30Вуос из кадь юн луо, пыдэстэм дуннелэн вылыз кынме.
31Хималэсь*а гердзэ думыны быгатӥськод-а,
Кесӥльлэсь*а сьӧлтэтсэ пертчыны пӧрмытӥськод-а?
32Быгатӥськод-а кизили люкъёсты ас дыраз поттылыны но
Бадӟым Гондыр Анаез кизили нылпиосыныз*б валтыны?
33Инлэсь законъёссэ тодӥськод-а,
солэсь кузёяськонзэ музъем вылэ юнматыны быгатӥськод-а?
34Ву тонэ тырмыт мед коттоз шуыса,
быгатӥськод-а пилемъёс шоры куарадэ будэтыны?
35Быгатӥськод-а чилекъянъёсты ыстылыны,
соос мынозы-а но тыныд шуозы-а: ”Тани ми”?
36Сюлэм пушкы кин бадӟым визьлык понӥз,
визьлы пуштрос кин сётӥз?
37Аслаз визьлыкеныз кин быгатэ пилемъёсты лыдъяны,
инлэсь сосудъёссэ кутыса возьыны,
38тузон напралы пӧрмытскыку, бадӟымесь комокъёс лякиськылыку?
39Лев анайлы тон-а сиён кутылӥськод,
пинал левпиослэсь кӧтсэс тон-а тыриськод,
40куке соос гуосазы кыллё яке возьмаськон интыязы
саюлын шутэтско?
41Кырныжлы, солэн пиосыз, сиёнтэк кыльыса,
Инмарлы черекъяку, кин сиён дася?»
*а 38:31 Хима, Кесӥль – кизили дуннеос
*б 38:32 Бадӟым Гондыр Анайлэн кизили нылпиосыз – татын вераськон мынэ Большая Медведица кизили люклэн ”быжысьтыз” кизилиос (Малая Медведица) сярысь
Глава 38
