Choose Language
Old Testament Books
New Testament Books
1Кузё-Инмар Иовлы сильтӧл пушкысен ответ сётыса шуиз:
2«Пиосмурт кадь кустэ дум:
Мон тонэ юало, нош тон Мыным ответ сётылы.
3Тон Мынэсьтым судме куштыны медӥськод-а,
астэ шонере поттон понна
тон Монэ янгыше уськытыны турттӥськод-а?
4Инмарлэн кадь-а тынад кужымед-суйбыгытэд?
Быгатӥськод-а Со кадь куараен гудыртыны?
5Соку тон быдӟымлыкен, данлыкен астэ чебер кар,
чилясь-пиштӥсь чеберлыкен шобырскы;
6вожпотонэдлэсь вань лексэ кисьты,
вань вылтӥяськисьёс шоры учкы но соосты зӥбломыты;
7вань вылтӥяськисьёс шоры учкы но соосты сӥтэм-сантэм кар,
сьӧлыклэсь кышкасьтэмъёсты интыязы ик сузмыты;
8соосты ваньзэс сюе сог, пеймыт азе интыя.
9Соку Мон но лыдъяны быгато,
тынад бур киыд тонэ астэ утьыны быгатэ шуыса.
10Тани, тонэ кадь ик, Монэн кылдытэм бегемот;
со ош кадь турын сие;
11солэн кужымез кусказ возиське,
солэн юнлыкез кӧтызлэн суйбыгытаз улэ;
12аслаз кедырпу кадь быжыныз берыкъя;
нош макесысьтыз сӥныръёсыз ог-огенызы герӟаськылэмын;
13солэн кукъёсыз ыргон бургы кадесь; лыосыз корт бодыос кадесь;
14та – Инмарлэн кылдытэм паймымон пудоез:
сое Кылдытӥсь гинэ со доры Аслэсьтыз мечсэ матэ карыны быгатэ;
15гурезьёс солы сиён ваё но, отын вань луд пӧйшуръёс шудо-лӧпто;
16со выдэ вужер сётӥсь писпуос улэ,
нюръёсысь тростник будослэн шобрет улаз;
17вужер сётӥсь писпуос сое асьсэ вужерен шобырто;
шур дурысь бадьпуос сое котырто;
18тани, со шурысь юэ, уг но дырты, шып гинэ улэ,
Иордан солэн ым дортӥз кужмысь ик бызе ке но.
19Солэн син азяз ик кин ке но сое кутоз-а,
нырзэ багорен пась кароз-а?
20Левиафанэз*а тон визнанэн поттыны быгатод-а,
солэсь кылзэ гозыен кутыны пӧрмытод-а?
21Солэн нырпасяз кульчо понод-а?
Солэсь ангессэ венен пась карод-а?
22Со тонэ трос сюлворыса куроз-а, тонэн зӥбыт-востэм вераськоз-а?
23Тонэн тупан кыл гожтоз-а, сое пырак ӵожелы ляльчилы басьтод-а?
24Тылобурдоен кадь соин шудыса улод-а,
аслад нылъёсыд понна сое думылыса возёд-а?
25Чорыгась эшъёсыд вузалозы-а сое,
Хананей музъемысь вузчиос куспын сое люкылозы-а?
26Быгатод-а солэсь кузэ шибодыен пась карыны,
йырзэ чорыг бышкан бодыен сузмытыны?
27Со вылэ аслэсьтыд кидэ пон но нюръяськон сярысь тодад вай:
азьпалан нюръяськыса уд ни выры».
*а 40:20 левиафан – крокодиллы укшась, зарезьын улӥсь сьӧсь пӧйшур
Глава 40
