Choose Language
Old Testament Books
New Testament Books
1«Таин сэрен мынам сюлмы куалекъя, аслаз интыысьтыз вырӟиз.
2Кылзэлэ, кылзэлэ Солэсь куаразэ,
Солэн ымысьтыз потӥсь гудыриез.
3Быдэс инбам улын гудыртэм куараез шуккиське,
музъемлэн пумозяз чилектэ-воректэ.
4Со бӧрсьын куара гудыртэ;
Аслаз быдӟымлыкезлэн куараеныз Со гудыръя,
гудыръямысь уг дугды, ваньмыз Солэсь куаразэ кыло.
5Инмар Аслаз куараеныз паймымон гудыръя,
туж бадӟымесь ужъёс лэсьтэ,
асьмелы соос валаны луонтэмесь.
6Уго лымылы Со шуэ: ”Лу музъем вылын”;
векчи зор но, бадӟым зор но огкадь Солэн киулаз.
7Солэсь ужъёссэ вань адямиос мед тодозы шуыса,
котькудӥзлэн адямилэн ки вылаз печать пуктэ.
8Соку пӧйшур ватскон интые кошке, аслаз гуосаз улэ.
9Лымшор палась сильтӧл лыктэ, уйпалась кезьыт вуэ.
10Инмарлэн пельтэменыз йӧ кылдэ, вулэн вылыз шымырске.
11Пилемъёсты Со вуо каре,
пилемъёс Солэсь югытсэ чилекъяса возьмато,
12Солэн мылкыд каремезъя соос сое быдэстыны мыно –
улоно музъемлэн ымныр вылаз мае Со соосты лэсьтыны косоз.
13Соосты Со мыныны косэ яке вӧсь карон понна,
яке Аслаз музъемез понна, яке гажан-жалянзэ возьматон понна.
14Кылзы тае, Иов;
сыл, валаны тыршы Инмармылэсь паймымон ужъёссэ.
15Тодӥськод-а, кызьы Инмар соосты киулаз возе,
Аслаз пилемысьтыз югытэз чилекъяса пиштыны косэ?
16Валаськод-а, кызьы пилемъёс возисько,
валаськод-а ваньзэ тодӥсь-валась Инмарлэсь паймымон ужъёссэ?
17Тынад дӥськутэд шуныт,
лымшор палась шуныт тӧл пельтыку, музъем шутэтске?
18Кисьтэм синучкон кадь чурытэсь инъёсты тон-а Соин ӵош возъяд?
19Милемыз дышеты, мар Солы вераны?
Та пеймыт пӧлын ми номыр но валаны ум быгатӥське.
20Мар мон Солы верасько, ивортэмын луоз меда?
Верам кыл Солы вуттӥське шуыса, кин ке но вераз меда?
21Али но, сильтӧл ортчыса пилемъёсты сузям бере,
Солэн инмын пиштыса улӥсь югытэз шоры учкыны уг луы.
22Зарниен пиштыса уйпалась пилем лыктэ,
Инмарлэн котыраз кышкыт паймымон чеберлык.
23Дунне Кутӥсь! Ми Сое мур-мур тодыны-валаны ум быгатӥське.
Со туж кужмо, туж шонер, зэмлыко судить карись.
Со нокинэ но ӝикатыса-ултӥяса уг возьы.
24Соин ик Со азьын адямиос мед йыбыртъялозы,
сюлмынызы визьнодоос Со азьын мед куалекъялозы!»
Глава 37
