Choose Language
Old Testament Books
New Testament Books
1Елиуй веранзэ азьланьтыса шуиз:
2«Ӧжытак монэ вить на,
мынам тыныд Инмар пала дурбасьтыса веранэ вань на.
3Кыдёкысен кутско аслэсьтым малпанъёсме-мылкыдъёсме вераны,
Кылдытӥсе сярысь Со шонер лэсьтӥсь шуыса верало,
4малы ке шуоно мон зэмзэ верасько, ӧрекчаськонэ ӧвӧл:
тон азьын – тодон-валанъёсыныз дун-шектэм мурт.
5Инмар туж кужмо, Со нокинэ но синазькыль уг кары.
Со визьлыкен но, кужымен но быдӟым;
6сьӧлыклэсь кышкасьтэмъёслэн палазы Со уг пыры,
ултӥямъёслы кӧня кулэ, сомында сётэ;
7шонер улӥсьёс бордысь Аслэсьтыз синъёссэ уг палэнты,
пырак ӵожелы эксэйёслэн престол вылазы пуктэ,
соосты вылэ ӝутэ.
8Нош адямиос жильыосын дурылэмын ке,
курадӟонлэн жильыет улаз возисько ке,
9соку соослэн ужъёссы шоры Со возьматэ,
соослэн законлы пумит улэмзы шоры,
малы ке шуоно соос трос луизы.
10Но валатскытон понна соослэсь пельёссэс усьтэ но
сьӧлыко ужъёслэсь мед куштӥськозы шуыса вера.
11Кылзӥськизы ке, Солы тыршыса-ужаса улӥзы ке,
соку асьсэлэсь улоно нуналъёссэс ӟечлыко ортчытозы,
улоно аръёссы шумпотон пӧлын ортчозы;
12нош ӧз ке кылзӥське, ньӧлъёс мертчиськыса виылозы,
укылтэммыса кулозы.
13Нош чеберъяськисьёс сюлмазы вожпоттон возё,
жильыен дурылыкуз, Солы уг вазисько;
14соин соослэн лулзы пиналысен кулэ,
улонзы азыса улӥсьёсын огазе быре.
15Со куанерез шугадӟонэзлэсь уте,
ултӥяса возьыку, солэсь пельзэ усьтэ.
16Тонэ но ӝикыт интыысь эркын азе поттысал,
кытын ӝикаса улон ӧвӧл,
тынад ӝӧк вылыд кӧё-вӧё сиёнъёсын тырмытэмын луысал;
17нош тон сьӧлыклэсь кышкасьтэмъёслэн вераськонэнызы
тыр луэмын:
тэкшерон но судить карон – тон бордын уло.
18Инмарлэн вожпотонэз вӧсь карыса тонэ медаз быдты вал!
Бадӟым тыриськон тонэ уз утьы.
19Тынад узырлыкедлы Со кыӵе ке но дун сётоз-а?
Уз, – зарнилы но уз, нокыӵе узырлыклы но дун уз сёты.
20Со уез эн куры, соку быдэс калыкъёс ас интыязы быдтэмын луозы.
21Утиськы, сьӧлыко ужъёс пала эн кыстӥськы,
сьӧлыклэсь кышкатэк улонэз тон
куректон-кайгулэсь вылӥегес карид.
22Инмар быдӟым Аслаз мертаны луонтэм бадӟым кужыменыз,
Со кадез кин визьнодъясь вань?
23Солэсь сюрессэ кин Солы возьматоз, кин вераны быгатэ:
”Тон шонертэм лэсьтӥськод”?
24Тодад возь, Солэсь адямиосын адӟем ужъёссэ вылӥе кароно шуыса.
25Вань адямиос соосты адӟыны быгато,
адями соосты кыдёкысен чакланы быгатэ.
26Инмар быдӟым,
асьмеос Сое асьме визьмын тодыны-валаны ум быгатӥське;
Солэсь улоно аръёссэ лыдъяны-тодыны уг луы.
27Со ву шапыкъёсты бича; соос зор луыса туж тросэн кисьтӥсько:
28пилемысь усьыло, адямиос вылэ пачылмыса кисьтӥсько.
29Кин тодыны быгатоз пилемъёслэсь кузьдалазэс,
Солэн улон интыезлэсь гудыртэмзэ?
30Тани, со вылэ Со аслэсьтыз югытсэ вӧлмытэ,
зарезьлэсь пыдэссэ шобыртэ.
31Отысен Со адямиосты судить каре, пачылаз сиён сётэ.
32Аслаз киосаз Со чилекъянэз ватэ,
кинэ погыртыны кулэ, сое погыртыны косэ.
33Солэн гудыртэмез со сярысь тодытэ;
пудоос озьы ик шӧдо мар луэмез».
Глава 36
