Choose Language
Old Testament Books
New Testament Books
1Иов ответ сётыса шуиз:
2«Таӵезэ мон трос кылӥ; куанер-мискинь буйгатӥсьёс тӥ ваньды!
3Пум вуоз-а тӧлопу кылъёслы? Таӵе ответ сётыны мар тонэ лӧпкытӥз?
4Тӥ кадь ик мон но тазьы быгатысал вераны,
тӥляд лулды мынам лулы интыын луысал ке;
тӥ вылэ кылъёсын урдскылысал но
тӥ шоры йырыным сэзъяса улысал;
5кылыным тӥледыз юнматысал, ымдурме выртыса буйгатысал.
6Вераськисько-а мон – куректон-кайгуэ уг капчиёмы;
дугдӥсько-а мон вераськемысь –
куректон-кайгуэ мон дорысь малы уг кошкы?
7Нош табере Тон монэ катьтэммытӥд ни,
вань семьяме куашкатӥд ни.
8Тон монэ кисыриосын шобыртӥд –
мыным пумит луондэ соос тодыто;
катьтэммонэ мынэсьтым янгыш луэмме возьматэ, монэ пыкылэ.
9Солэн вожпотонэз монэ йыръе,
мыным пумит тушмонъяськыса улэ,
мон вылэ пиньёссэ сыске;
мынам тушмонэ мон вылэ синъёсыныз мертчиськыса улэ.
10Мон шоры ымзэс усьтӥзы; даллашыса мынам бамам чабкыло;
ваньзы мыным пумит луыны вераськиллям.
11Инмар монэ законлы пумит улӥсьёслы сётӥз,
сьӧлыклэсь кышкасьтэмъёслэн киязы монэ куштӥз.
12Мон зӥбыт-востэм вал, нош Со монэ зуркатӥз;
чыртытӥм кутыса тышказ, ыбылон инты монэ кариз.
13Монэ Солэн ыбылӥськисьёсыз котыртӥзы;
мынэсьтым пушме Со вандылэ, уг жаля, музъем вылэ сэпме кисьтӥз,
14мынам вылам пась борды пась каре,
ожгарчи*а кадь мон вылэ бызьыса лыктэ.
15Ку вылам бышкись чурыт ӟустари дӥськут дӥсяны мон вури но
сюй вылэ йырме понӥ.
16Бӧрдыса мынам бамы ӵыжектӥз,
синкабакъёсы вылын кулонлэн вужерез улэ,
17мынам киосы лушкаськонэн ӧз выре,
вӧсяськонэ но мынам дун-чылкыт сюлмысь потэмын.
18Музъем! Мынэсьтым вирме эн ваты, викышъям куараме эн ӵокса.
19Но табере тани инмын мынам Адӟисе, йылӥын мынам Дурбасьтӥсе!
20Трос вераськись эшъёсы! Инмар доры мынэмез потыса,
синмы синву кисьтэ.
21Э, кызьы адями пи аслаз матысеныз ӵошатске,
озьы ик адями но быгатысал ке Инмарен ӵошатскыны!
22Улоно аръёсылы пум вуэ ни уго,
берен вайисьтэм сюрес вылэ мон вамыштӥсько ни».
*а 16:14 ожгарчи – ратоборец, борец, воин; солдат
Глава 16
