Choose Language
Old Testament Books
New Testament Books
1Феманысь Елифаз ответ сётыса шуиз:
2«Визьлыко мурт тырттэм тодон-валанэн ответ сётыны,
аслэсьтыз кӧтпушсэ ӵушкась тӧлын тырмытыны кутскоз-а,
3пайдатэм кылъёсын, кужымтэм веранъёсын
ассэ шонере поттыны выроз-а со?
4Зэм, Инмарлэсь кышканэз тон палэнтӥд,
Инмарлы вазиськонэз-веранэз туж ик кулэ шуыса уд лыдъяськы.
5Сьӧлыклэсь кышкасьтэм луэмед ымдэ тазьы тупатӥз:
тон кескичъёслэсь вераськон кылзэс бырйид.
6Аслад кылыд-ымыд тонэ янгыше уськытэ, мон уг,
аслад кылыд-ымыд тыныд пумит вера.
7Оло, тон вань адямиослэсь азьло вордскид,
мувыръёслэсь но азьвылгес кылдытэмын-а тон?
8Оло, тон Инмар кенешез кылӥд-а но вылӥ визьлыкез
ас бордад басьтӥд?
9Мае тон тодӥськод, кудзэ ми медам тодэ вал?
Мае тон валаськод, мае ми медам валалэ вал?
10Ми пӧлын вань пурысьтам йырсиёез но, пересь визьнодчи но вань,
солэн улон нуналъёсыз тынад атаедлэсь ортчемын.
11Инмарлэн буйгатонъёсыз тыныд уг тырмо шат?
Та тыныд тодмо ӧвӧл шат?
12Мар пала тынад сюлэмыд кыстӥське,
малы сыӵе вылтӥяськыса учкиськод?
13Малы аслэсьтыд духтэ Инмарлы пумитъяськытӥськод,
ымыныд сыӵе кылъёс вераськод?
14Мар со адями – кызьы со дун-чылкыт луыны быгатоз,
кышномуртлэсь вордскем мурт кызьы шонер улӥсь луыны быгатоз?
15Тани, Со Аслаз святойёсызлы но уг оскы,
Солэн син азяз инъёс но дун-шектэмесь ӧвӧл:
16нош уката но кырсь, юрӟым –
законлы пумит улонэз вуэз кадь юись адями.
17Мон тыныд верало, кылзӥськы монэ;
мае адӟи, сое мон тыныд верало,
18мае визьнодчиос кылӥзы но
асьсэлэн атайёссылэсь кылэмзэс ӧз ватэ,
19соослы огназзылы гинэ музъем сётэмын вал,
соос пӧлтӥ мурт адями ӧз ветлы.
20Сьӧлыклэсь кышкасьтэм вань нуналъёсыз ӵоже ассэ курадӟытэ,
ёртыса-ӝикатыса возисьлэсь аръёсызлэн лыдзы ватэмын:
21туж шимес кесяськем куара солэн пель сьӧраз кылӥське;
каньылэн улон вакытэ со доры лулэз быдтӥсь лыктэ.
22Со уг оскиськы пеймытлэсь утиськыны; ас азьысьтыз мечез адӟе.
23Шорем нянь понна со олокытӥ но костаське;
тодэ ини, дась, матын ни пеймытлэн нуналыз шуыса.
24Ёрмыса, ӝикаса улон сое кышкатэ;
ожмаськонлы дасяськем эксэй кадь сое ворме,
25со понна со: Инмарлы пумит со аслэсьтыз кизэ урдылӥз,
Дунне Кутӥсьлы пумитъяськылӥз,
26чыртызэ вылэ урдыса, Солы пумит мынылӥз,
зӧкесь щитъёсты кияз кутыса;
27малы ке шуоно ымнырзэ кӧйын зӧкомытӥз, макесъёссэ кӧёмытӥз.
28Таркам городъёсы со улыны интыяське, куштӥськем,
куашкан калэ вуэм коркаосы со улыны пыре.
29Со мурт узыр уз улы, ваньбурез но быдэс уз кыльы,
солэн шедьтэм ваньбурез музъем вылэ пытьы уз кельты.
30Пеймытлэсь уз ватӥськы: пушъетъёссэ гомась тыл куасьтоз,
ымыныз пельтыса, сое нуыса кошкоз.
31Алекъяськонлы оскиськыса медаз йыромы,
уго алекъяськон солы пунэм берыктон луоз.
32Нуналыз вуытэк, солы пунэм берыктӥськоз,
вайёсыз но солэн уз вожектэ.
33Кисьмамтэ емышсэ уськытъясь виноград модос кадь со луоз,
сяськаоссэ куям вӧйпу кадь со луоз.
34Озьы сьӧлыклэсь кышкасьтэмлэн юртэз тырттэм кылёз,
мултэсмытыса октӥсьлэсь улон интызэ тыл ньылоз.
35Уродэн-лекен со секытэн луиз но, солэсь ӧрекчаськон вордӥськиз,
солэн сюлмыз ӧрекчаськон ужъёс малпаса улэ».
Глава 15
