Choose Language
Old Testament Books
New Testament Books
1Со нуналэ Моисейлэн книгаысьтыз люкет калыклы кылӥськымон шара лыдӟемын вал, отысь тазьы гожтэмзэ шедьтӥзы: «Аммон адями, Моав адями Инмарлэн калыкез пӧлы ноку но пырыны уз быгаты,2уго соос Израильлэсь пиоссэ нянен но вуэн ӧз пумиталэ, нош соосты карган понна Валаамез медъязы, нош Инмармы соослэсь каргаськонзэс бакель каронлы пӧрмытӥз».3Та закон сярысь кылэмзы бере вань мурт луисьсэ соос Израиль бордысь люкизы.
4Нош талэсь азьло Инмармылэн коркаезлэн комнатаосыз борды пуктэм Елиашив священник, Товиялэн матысь ӵыжы-выжыез,5солы бадӟым комната тупатыса дасяз, азьвыл отчы тыро вал курбонлы ваем ю-нянь, ладан, сосудъёс, ю-няньлэсь, виналэсь, вӧйлэсь дасэтӥ люкетсэ, законъя левитъёслы, кырӟасьёслы, капка возьмасьёслы сётъян люкетэз, священникъёслы ваем саламъёсты тырылӥзы.6Ваньмыз та ортчыку, мон Иерусалимын ӧй вал, уго Вавилонлэн Артаксеркс эксэез куамын кыкетӥ арзэ эксэй пуконын пукыку, мон эксэй доры ветлӥ, нош кӧня ке нунал ортчем бере мон нош ик эксэйлэсь кошкыны куриськи.7Иерусалиме вуэм берам Елиашивлэсь урод уж лэсьтэмзэ – Инмар коркалэн азбараз Товиялы комната лэсьтэмзэ – мон кылӥ но,8соку мыным секыт луиз но комнатаысь Товиялэсь вань арбериоссэ кыре куяй,9комнатаез мед сузялозы-чылкытытозы, шуи, отчы нош ик Инмар коркась сосудъёсты, ладанэз, курбонлы ваем ю-нянез пыртыны косӥ.
10Эшшо тодӥ на, левитъёслы кулэ люкетэз уг сётъяло, левитъёс но кырӟасьёс, асьсэ ужзэс быдэсъясьёс, ваньзы асьсэлэн бусыосазы кошконо луизы шуыса.11Та пумысен кивалтӥсь нергеослы чурыт кылме вераса шуи: «Малы Инмар коркаез куштыса кошкимы?» Соосты мон огазе люкай но ваньзэс ас интыязы пуктӥ.12Вань иудейёс няньлэсь, виналэсь, вӧйлэсь дасэтӥ люкетсэ кеносъёсы вайылыны кутскизы.13Кеносъёсы кивалтыны Шелемия священникез, книга тодӥсь Садокез, левитъёс пӧлысь Федаияез пуктӥ, соос вӧзы Матфаниялэсь Закхур пиезлэсь Ханан пизэ пуктӥ, уго соосты оскиськымонэсь муртъёс шуыса лыдъяло. Та адямиослы агай-вынъёслы люкет сётъян оскемын вал.
14Инмаре, та понна монэ буре вай, тыршыса быдэсъям ужъёсме ӵушыса эн кушты, соосты мон Инмарелэн коркаезлы отын службаос ортчытъян понна лэсьтӥ.
15Со нуналъёсы мон адӟи Иудеяын суббота нуналэ виноград лёган гуосын ужамзэс, культо нуллэмзэс, ишакъёссы вылэ винаен сепысъёс, виноград, смоква, пӧртэм грузъёс тырыса, суббота нуналэ соосты Иерусалиме нуллэмзэс адӟи. Со сиён-юон вузан нуналазы ик мон, соосты юн пыкылыса, та сярысь верай.16Тирысь калык но Иудеяын улӥз, чорыг, пӧртэм вузъёс вайылӥзы но суббота нуналъёсы Иудеяын, Иерусалимын улӥсьёслы вузаллязы.17Соку мон иудейёслэсь нимо-данооссэс пыкылыса шуи: «Малы тӥ сыӵе урод уж лэсьтӥськоды – суббота нуналэз саптаськоды?18Озьы ик ӧз лэсьтылэ-а тӥляд атайёсты но? Со понна Инмармы асьме вылэ, та город вылэ вань та шугадӟонъёсты ӧз-а лэзьы? Нош тӥ, субботаез саптаса, Солэсь Израильлы вожпотонзэ мултэсмытӥськоды».
19Ӝомыт усем бере, суббота азьысь ӝыт, Иерусалим капкаослэсь ӧсъёссэс тунгонаны косӥ, субботалэн ӵуказе ӵукнаяз гинэ соосты мед усьтылозы, шуи. Аслэсьтым медоосме капкаос доры пуктылӥ, суббота нуналэ нокыӵе вуз нуллӥсь но медаз пыры шуыса.20Иерусалимлэн сьӧраз вузчиос, вуз нуллӥсьёс одӥг пол, кык пол гинэ ӧз кӧлаллялэ.21Но мон, чурыт кылме вераса, соослы шуи: «Малы тӥ борддор вӧзын кӧлӥськоды? Эшшо мукетъят но тазьы лэсьтӥды ке, соку мон тӥледыз вӧсь каро». Со нуналысен кутскыса, соос суббота нуналъёсы берат татчы ӧз ни вуылэ.22Левитъёсты мон чылкытатӥськыны но капка дорысь возьмаськисьёсты воштыны ӧти, соослы шуи: «Суббота нуналэз дун-чылкыт возе».
Та понна, Инмаре, монэ буре вай, Аслад туж бадӟым гажан-жалянэныд жаля-уть монэ.
23Эшшо со нуналъёсы мон азот, аммон, моав калык пӧлысь кышно басьтэм иудейёсты адӟи.24Соин ик соослэн нылпиоссы пӧлысь ӝыны люкетэз азот (филистим) яке мукет калыкъёслэн кылъёсынызы вераськылӥзы, нош иудей кылын вераськыны уг быгато.25Со понна мон соосты пыкылӥ, юн тышкаськылӥ, куд-ог пиосмуртъёссэс тышкалляй, йырсизэс кыскай, соосты Инмар понна кыл сётытӥ, ас нылъёссэс соослэн пиоссылы кышнолы медаз сётэ, соослэсь нылъёссэс ас пиоссылы яке асьсэлы кышнолы медаз вайылэ шуыса.26Мон шуылӥ, соосын сэрен Израильлэн эксэез Соломон ӧз-а сьӧлыка? Трос калыкъёслэн солы укшась эксэйзы ӧй вал. Сое Инмарез яратылӥз, вань израиль калыклы Инмар сое эксэе пуктӥз, нош мурт калык пӧлысь басьтэм кышноосыз сое сьӧлыке пыртӥзы.27Тӥ сярысь милемлы кылзыны яра-а, кызьы тӥ туж урод уж лэсьтӥськоды, мурт шаеръёсысь ваем кышноосын улыны кутскыса, Инмармы азьын сьӧлыкаськоды.
28Елиашив быдӟым священниклэн Иоиада пиезлэн одӥгез пиез хорон пи Санаваллатлэн эмеспиез вал. Мон сое бордысьтым улляй.29Инмаре, соослэн тодазы вайыты, кызьы соос священник луонэз, священникъёслы, левитъёслы сётэм сӥзён-косонэз саптазы.
30Тазьы мон соосты сузяй мурт калыкъёслэсь басьтэм сямъёссылэсь; священникъёслэсь, левитъёслэсь асьсэ удысын ужан-тыршонзэс вылысен юнматӥ,31пусъем дыре пу ваёнэз но, выль емыш ваёнэз но.
Инмаре, монэ тодад вай, мыным ӟечлы мед луоз!
Глава 13
