Choose Language
Old Testament Books
New Testament Books
1Сизьыметӥ толэзь вуэм бере, израиль пиос асьсэ городъёсын улон вакытэ, вань калык, одӥг мурт кадь, Ву капка азьысь падвоже люкаськиз но книга тодӥсь Ездралы шуиз: «Кузё-Инмарлэсь Израильлы сӥзем Моисей законэн книгаез вай».
2Ездра священник пиосмуртъёслэн, кышномуртъёслэн, ваньмызлэн валаны быгатӥсьёслэн люкаськемазы, сизьыметӥ толэзьлэн нырысетӥ нуналаз, законэн книгаез вайиз;3Ву капка азьысь падвожын отысь чуръёсты ӵук ӟардонысен нуназеозь пиосмуртъёс, кышномуртъёс, валаны быгатӥсь вань адямиос азьын чирдӥз; вань калык, пельзэ сак карыса, законэн книга чирдэмзэ кылзӥз.4Книга тодӥсь Ездра юри та учырлы пулэсь лэсьтэм ӝужыт интыын сылӥз, нош со вӧзын, бурпалаз, Маттифия но Шема, Анания, Урия, Хелкия но Маасея сылӥзы, нош паллян палаз – Федаия, Мисаил, Малхия, Хашум, Хашбаддан, Захария но Мешуллам.5Вань калык азьын Ездра книгаез усьтӥз, уго со вань калыклэсь вылӥын сылӥз. Со книгаез усьтэм бере вань калык султӥз.6Ездра быдӟым Инмарез Кузё-Инмарез данъяз. Киоссэ вылэ ӝутыса, вань калык шуиз: «Аминь, аминь!», собере соос йыбыртъязы, пыдесъяськыса ымнырынызы музъем бордозь Кузё-Инмар азьын йыбыртъязы.7Иисус, Ванаия, Шеревия, Иамин, Аккув, Шавтай, Годия, Маасея, Клита, Азария, Иозавад, Ханан, Фелаия но левитъёс калыклы законэз валэктӥзы, со дыре ик калык ас интыяз сылӥз.8Книгаез, Инмар законэз, валамон лыдӟизы, валэктон сётъязы но мар лыдӟизы, калык сое валаз.
9Соку Неемия, со ик Тиршафа, но книга тодӥсь Ездра, священник, левитъёс – калыкез дышетӥсьёс, вань калыклы шуизы: «Та дун-чылкыт нунал Инмардылы Кузё-Инмарлы сӥземын; эн ӝожоме, эн бӧрдэ», – уго законысь кылъёсты кылзыса вань калык бӧрдӥз.10Соослы шуиз: «Мынэлэ, кӧё-вӧё сиён сиелэ, ческыт юон юэлэ, кинлэн номыриз но дасямын ӧвӧл, соослы люкетъёс келялэ, уго та нунал Кузё-Инмар азьын дун-чылкыт каремын. Ӝожомыса эн улэ, уго Кузё-Инмар азьын шумпотон – тӥледлы юнматскон».11Левитъёс, тазьы шуыса, вань калыкез буйгатылӥзы: «Дугдэлэ, уго та нунал дун-чылкыт, ӝожомыса эн улэ».12Соку вань калык сиыны, юыны, марзы вал, сое мукетъёсын шори карыны мынӥз, туж шулдырен праздникез ортчытыны мынӥзы, уго соослы верам кылъёсты соос валазы.
13Мукетаз нуналэ вань калык пӧлысь улыослэн-выжыослэн йыръёссы, священникъёс, левитъёс, законысь кылъёсты мед валэктоз шуыса, книга тодӥсь Ездра доры люкаськылӥзы.14Кузё-Инмарлэсь Моисей пыр сётэм законысь таӵе чуръёсты шедьтӥзы: сизьыметӥ толэзе, праздник нуналэ, израиль пиос тылысъёсын мед улозы.15Соин ик соос вань городъёсазы, Иерусалимын тазьы шуыса ялӥзы, ивортӥзы: «Гурезь йылэ мынэ, сьӧрады садын будӥсь вӧйпулэсь вайзэ, кырын будӥсь вӧйпулэсь вайзэ, миртапулэсь, пальмалэсь вайёссэс, паськыт куаро писпуослэсь вайёссэс нуэ, гожтэмъя, соослэсь тылысъёс лэсьтыны мед луоз».
16Калык вырӟиз, вайёс вайизы, асьсэлы тылысъёс лэсьтӥзы, асьсэлэн корка липет йылъёсазы, азбаръёсазы, Инмар коркалэн азбаръёсаз, Ву капка вӧзысь падвоже, Ефрем капка дорысь падвоже.17Пленысь вань берытскемъёс асьсэлы тылысъёс лэсьтӥзы но тылысъёсазы улӥзы. Навин пилэн Иисуслэн улон нуналъёсысеныз кутскыса та нуналъёс дорозь израиль пиос тазьы ӧз лэсьтылэ вал. Туж бадӟым шумпотон вал.18Нуналлы быдэ, нырысетӥ нуналысен кутскыса берпуметӥ нуналозь, Инмар закон книгаысь гожъямез лыдӟылӥзы. Та праздник дыръя сизьым нунал ӵоже шулдыръяськизы, нош тямысэтӥ нуналэ, пуктон-косонъя, праздникез келян нунал вал.
Глава 8
