Choose Language
Old Testament Books
New Testament Books
1Милям тушмонъёсмы Санаваллат, Товия но Аравияысь Гешем, мукетъёсыз но кылӥллям: мон борддорме лэсьтыса быдэстӥ, отчы сӧриськем интыосыз ӧз ни кыле – со дырозь капкаосы ӧсъёс ӧй на пуктылы на вал, –2соку Санаваллатэн Гешем мыным вераны ыстӥзы: «Лыкты, Оно нёжалысь одӥгаз гуртын пумиськомы». Соос мыным урод уж лэсьтыны малпазы.3Нош мон соос доры иворчиосты тазьы вераны ыстӥ: «Бадӟым уж лэсьтонэн вырисько, дыры ӧвӧл, пумиськыны уг быгаты; ужме куштыса, тӥ доры лыктысал ке, уж дугдысал».
4Таӵе ӧтёнэн ньыль пол мон доры вуылӥзы, нош мон соослы сыӵе ик ответ сётылӥ.5Соку мон доры Санаваллат витетӥ ползэ медозэ ыстӥз, солэн кияз усьтэм гожтэт вал.6Отын тазьы гожтэмын вал: «Калыкъёс пӧлын вераськон ветлэ, Гешем но шуэ, тон но, иудейёс но асьтэ понна кариськыны турттӥськоды, пе, со понна тон борддор лэсьтӥськод, пе, соослы тынад эксэй луэмед потэ, пе, – озьы верасько;7пророкъёсты но тон пуктӥд, соос тон сярысь Иерусалимын тазьы мед вераськозы шуыса: ”Иудеялэн эксэез!” Таӵе вераськонъёс эксэй доры вуозы. Соин ик лыкты, кенешомы».8Нош мон солы тазьы вераны ыстӥ: «Мар сярысь тон вераськод, номыр но сыӵе-таӵеез ӧй вал; тае тон ас визьмыныд малпад».9Уго соос ялан милемыз кышкатъязы, тазьы малпаса: «Та ужез быдэстыны кизы уз ни ӝутӥськы, со уж уз ни быдэсмы»; нош мон ке аслэсьтым киосме эшшо но юнэсьгес кари.
10Мегетавеллэн Делаия пиезлэн Шемаия пиезлэн корказ мон лыктӥ, нош со ворсаськиз но шуиз: «Ойдо Инмарлэн корказ мыном, храмлэн пушказ пыром но бӧрсямы храмлэсь ӧсъёссэ ворсаломы, уго тонэ виыны лыктозы, тонэ виыны уйин лыктозы».11Нош мон шуи: «Мон кадь адями пегӟыны быгатоз-а? Мон кадь адями улэп кылён понна храме пырыны быгатоз-а? Уг мыны».12Мон тодӥсько вал, сое Инмар ӧз ысты шуыса, Товияен Санаваллат сое, дун тырыса, асьсэ пала каризы, мыным азьпалзэ тодытыса мед вералоз шуыса.13Соин со, дун тырыса, асьсэ пала каремын вал: мон мед куалектом но озьы мед лэсьтом, мед сьӧлыкалом, мон сярысь урод малпан мед кылдоз, со понна монэ пыкылыса, улляса мед возёзы.14Эй, Инмаре, Товияен Санаваллатэз соослэн лэсьтэм ужзыя, нош озьы ик Ноадия пророк кышномуртэз, монэ куалектытыны малпась мукет пророкъёсты но тодад вай!
15Борддор ӝутон Елул толэзьлэн кызь витетӥ нуналаз, витьтон кык нунал куспын йылпумъямын вал.16Та сярысь вань тушмонъёсмы кылэмзы бере, тае ми котырын улӥсь вань калыкъёслэн адӟемзы бере асьсэ син азьын улэ усизы но тодӥзы, та ужез Инмармы лэсьтӥз шуыса.
17Та сяна, со нуналъёсы нимо-дано иудейёс трос гожтэтъёс гожъяллязы но Товиялы ысъяллязы, нош Товиялэн гожтэтъёсыз соос доры вуылӥзы.18Уго Иудеяын тросэз, кыл сётыса, соин кусып возьылӥзы, малы ке шуоно со Арахлэн Шехания пиезлэн эмеспиез вал, нош солэн Иоханан пиез Верехиялэсь Мешуллам пиезлэсь нылзэ аслыз кышно басьтӥз.19Мон азьын солэн ӟеч сямо луэмез сярысь но соос вераськылӥзы, мынэсьтым верам кылъёсме со доры вуттылӥзы. Монэ кышкатон понна Товия гожтэтъёс ыстылӥз.
Глава 6
