Choose Language
Old Testament Books
New Testament Books
1Калык пушкын, кышнооссы пӧлын, иудей агай-вынъёссылы пумит бадӟым ӝожъяськон кутскиз.2Тазьы шуисьёс но вал: «Ми, милям пиосмы, нылъёсмы трос кузя, милям нянь шедьтэммы, кӧтмес тыреммы, улэммы потэ».3Тазьы шуисьёс но вал: «Бусыосмес, виноград бакчаосмес, коркаосмес, сютэм улонлэсь утиськон вылысь, нянь басьтон понна пунэмлы сётӥськомы».4Тазьы шуисьёс но вал: «Эксэйлы выт тырон понна ми пунэмен азвесь басьтӥськомы, со понна бусыосмес, виноград бакчаосмес пунэмен сётӥськомы.5Милям мугоръёсмы агай-вынъёсмылэн мугоръёссы кадесь ик, милям пиосмы соослэн пиоссы кадесь ик, нош тани ми пиосмес, нылъёсмес ляльчие сётоно луиськомы, нылъёсмы пӧлысь куд-огез ляльчи луэмын ини. Киуламы соосты басьтыны номырмы но ӧвӧл; бусыосмы но, виноград бакчаосмы но мурт киулэ сётэмын ни».
6Соослэсь таӵе ӝожъяськонзэс, таӵе кылъёссэс кылэм берам мынам туж юн воже потӥз.7Сюлмы бугырскиз но мон нимо-даноослы, кузёйыръёслы чурыт кылме верай: «Агай-вынъёстэс тӥ мултэс тырытӥськоды». Таослы пумит мон бадӟым кенеш люкай но8соослы шуи: «Кӧня кужыммы вал, соин ми агай-вынъёсмес, иудейёсты, мурт калыкъёс кие вузамъёсты, дун тырыса берыктылӥмы, нош тӥ асьтэ агай-вынъёстэс вузаськоды, соос асьме кие вузасько-а?» Соос чус улӥзы, ответ сётыны кыл ӧз шедьтэ.9Соку мон шуи: «Умойтэм тӥ лэсьтӥськоды. Тушмонъёсмы, мурт калыкъёс, асьме сярысь урод кылъёс медаз вералэ шуыса, Инмармылэсь кышканэн тӥ улыны кулэ ӧвӧл-а?10Мон но, агай-вынъёсы но, мон бордын ужась-тыршисьёс но соослы пунэмен азвесь но, нянь но сётӥмы: соослэсь тыронзэс ум ни басьтэ.11Али ик соослэсь бусыоссэс, виноград, вӧйпу садъёссэс, коркаоссэс асьсэлы берыктэ, азвесь понна, нянь, вина, вӧй понна басьтэм ваньбурез, кудъёссэ тӥ тырыны тупатӥды, берыктэ».
12Соос шуизы: «Берыктомы, соослэсь ум ни куре; лэсьтомы озьы, кызьы тон шуиськод». Мон священникъёсты ӧти, соосты кыл сётытӥ, тазьы лэсьтозы шуыса.13Дӥськутме курткыса, мон шуи: «Сётэм кылзэ быдэстӥсьтэм муртэ Инмар тазьы ик мед курткоз, коркасьтыз но, юртъерысьтыз но, тазьы солэн ваньмыз курткемын мед луоз, буш мед кылёз!» Кенеше люкаськем вань калык шуиз: «Аминь». Инмарез данъязы; аслэсьтыз верам кылзэ калык быдэстӥз.
14Эшшо: Иудей музъеме улосвылэн кивалтӥсе монэ пуктэм дырысен, Артаксеркс эксэйын кызетӥ арысен куамын кыкетӥ арзэ пукыку, дас кык ар ӵоже мон но, агай-вынъёсы но улосвылэн кивалтӥсь луонлэсь няньзэ ӧм сие.15Нош мынэсьтым азьвыл улосвылэн кивалтӥсьёс калыкез ӝикатыса возизы, соослэсь ньыльдон азвесь сӥкльзэс гинэ ӧз октылэ, няньзэс, виназэс но октылӥзы; соослэн медооссы гинэ но калыкен кузёяськыса улӥзы. Нош мон, Инмарлэсь кышкаменым, озьы ӧй лэсьты.16Со виын ик борддор ӝутон ужез нуыны юрттӥськи; бусыос но ми ӧм басьтэ, мынам вань медоосы отчы ужаны люкаськылӥзы.17Мынам ӝӧк сьӧрам сю витьтон муртэн иудейёс, кузёйыръёс, та ёросын улӥсь калыкъёсты лыдъятэк, люкасько вал.18Тани одӥг нуналлы мар дасямын луэ вал: одӥг ош, куать таза ыжъёс, тылобурдоос мон дорын дасясько вал; дас нуналлы быдэ трос пӧртэм пумо вина бырылӥз. Озьы ке но улосвылэн кивалтӥсьлэсь няньзэ курыса ӧй улы, уго секыт ужано-тыршоно луылӥз та калык.
19Инмаре, буре вай, ӟечлы мыным мед луоз та калыклы мар мон лэсьтӥ.
Глава 5
