Choose Language
Old Testament Books
New Testament Books
1Тае быдэстэм бере кивалтӥсьёс мон доры лыктыса шуизы: «Израиль калык, священникъёс, левитъёс юрӟым ужъёсын вырись мурт калыкъёслэсь – хананей, хеттей, ферезей, иевусей, аммон, моав, египет, аморрей калыкъёслэсь – ӧз люкиське.2Та калыкъёслэсь нылъёссэс асьсэлы кышнолы басьтылӥзы, соослэн пиоссылы ас нылъёссэс кышнолы сётылӥзы, дун-чылкыт кидыс мурт калыкъёсын сураськиз, эшшо ке, дано адямиоссылэн, кузёослэн кизы таӵе законлы пумит уже нырысь ик ӝутскылӥзы».
3Та кылэз кылэм берам мон вылзэ но, улзэ но дӥсянме кесяй, йырысьтым йырсиме, тушме ишкай но ӝожомыса пуки.4Пленысь берытскемъёслэн йыружъёссы пумысен Израильлэн Инмарезлэн верамезлэсь кышкатскемъёс мон доры люкаськизы, ӝыт курбон сётон дыр вуытозь, мон ӝожомыса пуки.5Нош ӝыт курбон сётыку, ӝожомыса пукон интыысьтым султӥ, кесяськем выл но ул дӥськутэным ик пыдес вылам уськытски но Инмаре Кузё-Инмар пала киосме ӝутыса шуи:6«Инмаре! Возьдаськисько, кышкасько ымнырме Тон пала берыктыны, уго милям законлы пумит улэмъёсмы йырмылэн вылӥяз тубизы, янгышъёсмы инмозь вуизы.7Атайёсмы улон дырысен туннэ нуналозь туж бадӟым янгыш пӧлын улӥськомы, законлы пумит улэмъёсмы понна ми, эксэйёсмы но, священникъёсмы но мурт музъемысь эксэйёслэн киулазы, меч улэ, пленэ, куашкатон-таркан улэ, сантэман улэ сётэмын вал, кызьы али но улӥськом.8Тани ӧжыт гинэ ортчиз но, Инмармы Кузё-Инмар милемыз жаляз, кӧнязэ ке улэп кылемъёсты Со ми доры кельтӥз но Аслаз дун-чылкыт интыяз милемлы юнматскыны луонлык сётӥз, милям Инмармы милесьтым синъёсмес югдытӥз, ляльчи радын улыкумы, ӧжытаклы ке но улӟыны эрик сётӥз.9Ми – ляльчиос, но ляльчи радын улыкумы но, Инмармы милемыз ӧз кушты. Персиялэсь эксэйёссэ, милемлы пыд йыламы султыны, Инмармылы корка ӝутыны, куашкатэм пӧлысь сое выльысен ӝутыны луонлык мед сётозы шуыса, Иудеяе но, Иерусалиме но милемлы утиськыны луонлык мед сётозы шуыса, милемыз гажась-жалясь Со кариз.
10Нош али, та ужъёс бере, ми мар вераломы на Тыныд, Инмармы? Уго ми Тынад курон-косонъёсыд бордысь палэнскимы,11кудъёссэ Тон Аслад ляльчиосыд, пророкъёс пыр сӥзид но шуид: ”Киултыны мыноно музъемды – саптаськем музъем, мурт калыкъёслэн кырсь ужъёсынызы со саптамын, пумысеныз пумозяз юрӟым макеосынызы сое соос пачылмытӥзы, саптазы.12Соослэн пиоссылы кышнолы нылъёстэс эн сётэ, нылъёссэс пиостылы кышнолы эн басьтэ, тупаса улонзэс, ӟечлыксэс пумтэм вапумъёс ӵоже но эн утчалэ, юнматскыны мед быгатоды, со музъемлэн емышъёсыныз кӧттэс тырыны мед быгатоды, пиостылы пумтэм вапумъёс ӵожелы люкетлы сое сётыны мед быгатоды шуыса”.13Урод ужъёсмы, туж бадӟым янгышмы понна, ваньмыз, мар ми вылэ вуиз, – уго Тон, Инмаре, законлы пумит улэмъёсмылэн быдӟалазы шоры учкытэк, жаляд милемыз, милемлы таӵе мозмытскон сётӥд, –14оло нош ик Тынэсьтыд курон-косонъёстэ сӧрыса, та юрӟым-кырсь калыкъёсын родняяськыса эшшо уломы на-а? Эшшо вождэ поттыса, милемыз быдтыны уд малпа-а, одӥгез но улэп уз кыльы-а, утиськон но уз ни луы-а?15Израильлэн Инмарез Кузё-Инмар! Шонерлыко Тон. Уго туннэ нуналозьлы но ми улэпесь на; тани ми, законлы пумит уж лэсьтӥсьёс, Тынад азяд сылӥськомы, таӵе ужъёс бере Тынад азяд милемлы сылыны уг ни яра вал».
Глава 9
