Choose Language
Old Testament Books
New Testament Books
1-5Персияын Артаксеркс эксэйын пукон аръёсы ортчем ужъюгдуръёс бере Аарон архиерейлэн Елеазар пиезлэн, Финеес пиезлэн, Авишуй пиезлэн, Буккий пиезлэн, Уззий пиезлэн, Зерахия пиезлэн, Марайоф пиезлэн, Азария пиезлэн, Амария пиезлэн, Ахитув пиезлэн, Садок пиезлэн, Шаллум пиезлэн, Хелкия пиезлэн, Азария пиезлэн, Сераия пиезлэн Ездра пиез, –6та Ездра Вавилонысь потӥз, со книга тодӥсь вал, Израильлэн Инмарезлэсь Кузё-Инмарлэсь Моисей пыр сётэм законзэ тодӥсь-валась мурт вал со. Мар солы кулэ вал, эксэй солы ваньзэ сётӥз, малы ке шуоно Инмарлэн Кузё-Инмарлэн киыз со вылын улӥз.7Соин ӵош Иерусалиме мыныны потӥзы куд-ог израиль пиос, священникъёс, левитъёс, кырӟась-чирдӥсьёс, капка возьмасьёс, нефинейёс пӧлысь куд-огез, со вал, Артаксеркс сизьыметӥ арзэ эксэй луыса пукыку.8Иерусалиме со витетӥ толэзе вуиз, – эксэйлэн кивалтонэзлэн сизьыметӥ араз.9Нырысетӥ толэзьлэн нырысетӥ нуналаз Вавилонысь потӥз но витетӥ толэзьлэн нырысетӥ нуналаз со Иерусалиме вуиз, уго Инмарлэн ӟечлык сётӥсь киыз со вылын улӥз,10уго Ездра Кузё-Инмарлэсь законзэ дышетонлы, сое быдэсъянлы, Израильысь калыкез законлы но шонер улонлы дышетонлы аслэсьтыз сюлэмзэ понӥз.
11Тани Артаксеркс эксэйлэн Ездра священниклы, книга тодӥсьлы, Кузё-Инмарлэн курон-косонъёсызлы, Солэн законъёсызлы Израильын дышетӥсьлы, ыстэм гожтэтэзлэн пуштросэз:12«Артаксеркс, эксэйёслэн эксэйзы, Ездра священниклы, Инмысь Инмарлэн законэзлы дун-шектэм дышетӥсьлы.13Мон косон сётӥ: мынам эксэйлыкам улӥсь израиль калык пӧлысь котькудӥз адями, священникъёсыз, левитъёсыз пӧлысьёс но, кинлэн Иерусалиме мыныны мылкыдыз вань ке, тонэн ӵош мед мыноз.14Тонэ эксэй но солэн сизьым визь-кенеш сётъясьёсыз ысто, тынад кияд возиськись Инмар законъя Иудеяез но, Иерусалимез но адӟыны-чакланы мед быгатод шуыса,15Израильлэн Инмарезлы эксэйлэсь но солэн визь-кенеш сётӥсьёсызлэсь курбонзэс, азвесез но зарниез, Солэн Иерусалимысь улон юртаз вуттон понна,16со сяна, вуттоно луод быдэс Вавилон улосвылысь бичам вань азвесьтэ, зарнидэ, калыклэсь, священникъёслэсь Иерусалимысь Инмар коркалы ӟеч мылкыдын сётъямъёссэс;17соин ик чик ӝегатскытэк со уксёен ошъёс, ыжъёс, ыжпиос басьты, соос вӧзы салам няньёс, кисьтоно курбон-саламъёс кут но соосты Иерусалимысь Инмардылэн коркасьтыз курбон сётон интыяз вай.18Кылем азвесьлэсь, зарнилэсь тон агай-вынъёсыныд ӵош мар ке лэсьтыны малпады ке, Инмардылы кызьы кулэ, озьы лэсьтэ.19Инмаредлэн корказ вӧсяськон ортчытыны тыныд сётэм сосудъёсты Иерусалимысь Инмарлэн азяз пукты.20Инмаредлэн коркаезлы мар кулэ, мае тон кулэен лыдъяськод, эксэй коркась ваньбурез сётъя.
21Шур сьӧрысь ваньмызлы ваньбур утисьёслы мон, Артаксеркс эксэй, косон сётӥ: Ездра священник, Инмысь Инмарлэсь законзэ дышетӥсь, тӥлесьтыд мар гинэ уз куры, соку ик, ӝегатскытэк сётэ:22сю талантозь азвесь, сю мера-корозь чабей, сю батозь*a вина, сю батозь вӧй, нош сылалэз – лыдъятэк сётэ.23Инмысь Инмарлэсь вань косонъёссэ тыршыса быдэсъяно Инмысь Инмарлэн коркаез понна; [чаклалэ, кин ке но кизэ Инмысь Инмарлэн корка палаз медаз мычы], Солэн вожпотонэз эксэйлык вылэ, эксэй но солэн нылпиосыз вылэ медаз усьы.24Тӥледыз тодытӥськомы: нокудӥз но священник вылэ яке левит вылэ, кырӟасьёс, капка возьмасьёс, нефинейёс вылэ, Инмар коркан ужась-тыршисьёс вылэ выт но, налог но, мукет тыриськон но медаз понэ.
25Нош тон, Ездра, Инмаредлэн тыныд сётэм визьлыкеныз кивалтӥсьёсты, судьяосты пукты, шур сьӧрысь вань калыкез судить мед карозы, – Инмаредлэсь законзэ вань тодӥсьёсты, нош кин ке уг ке тоды, сое дышетэ.26Кин ке Инмаредлэсь законзэ, эксэйлэсь законзэ ӧз ке быдэсъя, сое ӝегатскытэк судить мед карозы, – я виыны, я улляны, я уксё тырытыны, я пытсэтэ пуктыны».
27Иерусалимысь Кузё-Инмарлэсь корказэ чеберъяны эксэйлэн сюлмаз мылкыд понэм атайёсмылэн Инмарзы Кузё-Инмар дано мед луоз,28мон вылэ эксэйлэсь, солэн визь-кенеш сётъясьёсызлэсь, эксэйлэн вань кужмо кивалтӥсьёсызлэсь гажан-жалянзэс берыктӥсь! Мон йыг-йыг кариськи, уго Инмарелэн Кузё-Инмарлэн киыз мон вылын вал, монэн ӵош мед мынозы шуыса, соку мон Израильлэсь кивалтӥсь йыръёссэ люкай.
*a 7:22 бат – ог 22 литр кизер макеосты тэрытӥсь сосуд
Глава 7
