Choose Language
Old Testament Books
New Testament Books
1Соку Дарий эксэй косон сётӥз но Вавилонысь ваньбур возён, книгаос возён коркаосысь утчазы.2Мидия улосэ интыяськем Екбатана городысь дворецысь одӥг свитокез (биням кагазэз) шедьтӥзы, отын тазьы гожтэмын вал: «Тодэ ваёнлы:3Кир эксэй, нырысетӥ арзэ эксэй луыса пукыкуз, Иерусалимысь Инмар корка пумысен косон сётӥз: кытын курбонъёс сётӥсько, со интые со коркаез мед пуктозы, солы йыг-йыг инъет мед лэсьтозы; солэн ӝуждалаез куатьтон гырпум ӝужда мед луоз, пасьталаез куатьтон гырпум пасьта мед луоз;4бадӟым изъёслэсь куинь рад мед тырозы, одӥг рад коръёслэсь; вань тыронъёсты эксэй юрт мед тыроз.5Навуходоносорлэсь Иерусалим храмысь Вавилонэ нуэм зарни, азвесь сосудъёссэ, Инмар коркась сосудъёсты, берен мед ваёзы но Иерусалимысь храме ваньзэ ас интыязы мед тырозы: Инмар корка интыямын луозы».
6«Озьы, шурсьӧр улосвылэн кивалтӥсь Фафнай но Шефар-Бознай, шур сьӧрын улӥсь афарсахей эшъёсыныды валче, – кошке отысь.7Инмар коркась ужъёсты эн дугдытэ; Иудея улосэн кивалтӥсь, Иудеяысь тӧроос Инмар коркаез ас интыяз мед пуктозы.8Со Инмар коркаез пуктонын со иудей тӧроослы маин тӥ юрттӥськыны кулэ, мон таӵе косон сётӥсько: эксэй ваньбур пӧлысь – шурсьӧр улосысь бичам вытэз – али ик басьтэ но со адямиослы сётэ, уж медаз дугды.9Кӧня кулэ луозы ошпиос, ыжъёс, ыжпиос Инмысь Инмарлы тылын сутӥськись курбон сётыны, озьы ик чабей, сылал, вина, вӧй, кызьы шуозы Иерусалимысь священникъёс, нуналлы быдэ, ӝегатскытэк соослы сётъялэ,10Инмысь Инмарлы ярамон курбон мед сётозы, эксэйлэн улонэз понна, солэн пиосыз понна мед вӧсяськозы.11Нош мон косон сётӥсько: та пуктонэз-косонэз кыӵе ке адями сӧриз-воштӥз ке, солэн коркасьтыз корез поттэмын луоз, со адямиез ӝутозы но со кор борды кортӵогалозы, нош коркаез куашкатэмын луоз.12Иерусалимысь Инмар коркалы изъян вайыны кизэ ӝутӥсь, та косонэз воштӥсь котькудзэ эксэез, котькудзэ калыкез храмын сӥлы кароно Инмар мед погыртоз. Мон, Дарий, та косонэз сётӥ; со туж шонер быдэстэмын мед луоз».
13Соку Фафнай, шурсьӧр улосвыллэн кивалтӥсез, Шефар-Бознай эшъёсынызы ӵош Дарий эксэйлэсь вань косонъёссэ ярамон быдэсъязы.14Аггей пророклэн но Аддалэн Захария пиезлэн азьпалзэ тодытыса верамзыя, Иудеяысь тӧроослэн лэсьтӥськон-пуктӥськон ужъёссы азинлыко мынӥзы. Израильлэн Инмарезлэн, Персиялэн эксэйёсызлэн Кирлэн, Дарийлэн, Артаксеркслэн эриксыя храмез пуктӥзы – ужзэс йылпумъязы.15Та коркаез пуктон йылпумъяськиз Адар толэзьлэн куинетӥ нуналаз, Дарий эксэй куатетӥ арзэ эксэйын пукыку.16Израиль пиос, священникъёс, левитъёс, мукетъёсыз но пленысь берытскемъёс шумпотыса та Инмар коркаез вӧсян ортчытӥзы.17Быдэс Израильлэн сьӧлыкез понна, та Инмар коркаез вӧсякузы, израиль выжыослэн лыдзыя курбонлы сётэмын вал сю ош, кык сю ыж, ньыль сю ыжпи, дас кык кеч.18Моисей книгалэн косэмезъя Иерусалимысь Инмар коркан ужан-тыршон понна священникъёсты пӧртэм люкетъёсъя, левитъёсты черодъя ужаны-тыршыны пуктӥзы.
19Нырысетӥ толэзьлэн дас ньылетӥ нуналаз пленысь берытскемъёс Пасха ортчытӥзы,20священникъёс, левитъёс чылкытатӥськон сямез ортчытӥзы, – одӥгтэм, ваньзы соос чылкытэсь луизы; асьсэлы но, священник агайёссылы но, пленысь вань берытскемъёслы Пасха ыжпиосты вандӥзы.21Пленысь берытскем израиль калык, музъем вылысь мукет калыкъёс, кырсь ужъёссылэсь куштӥськыса, Израильлэн Инмарез Кузё-Инмар пала лыктон понна таос борды кариськемъёс Пасха ыжпиез сиизы.22Юмал Нянь Сиён праздникез сизьым нунал ӵоже шумпотыса пусйизы, малы ке шуоно Кузё-Инмар соосты шумпоттӥз, Ассириялэн эксэезлэсь сюлэмзэ соос пала берыктӥз Израильлэн Инмарезлы Кузё-Инмарлы корка пуктыны кизэс юнматон вылысь.
Глава 6
