Choose Language
Old Testament Books
New Testament Books
1Нош Аггей пророк но Захария пророк, Аддалэн пиез, Иудеяысь но Иерусалимысь иудейёслы Израильлэн Инмарезлэн нимыз понна азьпал тодытонъёс вераллязы.2Соку Салафиильлэн Зоровавель пиез но Иоседеклэн Иисус пиез султӥзы но Иерусалимын Инмар коркаез пуктыны кутскизы, соосын ӵош вал Инмарлэн пророкъёсыз, соос соосты юнматыса улӥзы.
3Со виын соос доры шурсьӧр улосвыллэн кивалтӥсез Фафнай но Шефар-Бознай эшъёсынызы ӵош лыктыса шуизы: «Та коркаез пуктыны, борддоръёссэ лэсьтыны кин тӥледыз лэзиз?»4Соку ми та юртэз пуктӥсьёслэсь нимъёссэс соослы верамы.5Инмар Иудеяысь тӧроосты син азяз возиз, нош Персияысь кивалтӥсьёс иудейёслы люкетыса ӧз улэ, Дарий та ужез эскерыны ыстытозь но та ужъя отысь решение вуытозь.
6Тани Фафнайлэн, шурсьӧр улосвыллэн кивалтӥсезлэн, Шефар-Бознайлэн эшъёсынызы ӵош, шур сьӧрын улӥсь афарсахейёсын ӵош, Дарий эксэйлы ыстэм гожтэтсы.7Тани соослэн ыстэм гожтэтазы мар гожтэмын:
«Дарий эксэйлы – котькуд ласянь каньыллык!8Эксэй мед тодоз: Иудей улосысь Быдӟым Инмарлэн корка дораз ветлӥмы; сое бадӟым изъёслэсь ӝуто, борддоръёсы коръёс тыро, та уж ӝог лэсьтӥське, та уж соослэн ки улазы азинлыко быдэсъяське.9Соку ми со тӧроослэсь юамы но соослы тазьы шуимы: ”Кин тӥледлы эрик сётӥз та коркаез пуктыны, та борддоръёсты ӝутыса вуттыны?”10Соослэсь нимъёссэс но юамы на. Соослэн кивалтӥсь адямиоссылэсь нимъёссэс но юамы на тыныд ивортон понна.11Соос милемлы таӵе кылъёс вераса ответ сётӥзы: ”Вашкала аръёсы Израильлэн быдӟым эксэезлэсь пуктэм храмзэ куашкатэм бере ми, инлэн но, музъемлэн но Инмарезлэн ляльчиосыз, выльысен сое пуктӥськомы.12Милям атайёсмы Инмысь Инмарлэсь вожзэ поттэм бере Со соосты халдей пилэн, Вавилонлэн Навуходоносор эксэезлэн, киулаз сётӥз, та коркаез со куашкатӥз, калыкез Вавилонэ улыны нуиз.13Нош Вавилонын Кир нырысь арзэ эксэйын пукыку, та Инмар коркаез пуктыны лэзиз.14Иерусалим храмысь, Инмар коркась, зарни, азвесь сосудъёсты Навуходоносор поттыса Вавилонысь храме нуиз вал, нош Кир эксэй Вавилон храмысь соосты поттӥз но Шешбацар нимо адямилы сётӥз, сое со улосвылэн кивалтӥсе пуктӥз но15солы шуиз: ”Та сосудъёсты кут но Иерусалимысь храме ну, Инмар корка ас интыяз мед пуктӥськоз”.16Соку со Шешбацар лыктӥз но Иерусалимысь Инмар коркалы инъет понӥз; со дырысен со ялан пуктӥське на, быдэстэмын ӧвӧл на”.17Озьыен, эксэйлы ярамон ке, Вавилонысь ваньбур возён эксэй коркась храм пуктыны лэзён сярысь кагаз мед утчалозы, зэмзэ ик-а Кир эксэй Иерусалиме Инмар корка пуктыны лэзиз, та пумысен эксэйлэсь лэзён сярысь кагаззэ ми доры мед ваёзы».
Глава 5
