Choose Language
Old Testament Books
New Testament Books
1Иуда но Вениамин выжыослэн тушмонъёссы пленысь берытскемъёс Израильлэн Инмарезлы Кузё-Инмарлы храм пукто шуыса кылӥзы;2Зоровавель доры, улы-выжыослэн йыръёссы доры лыктыса соос шуизы: «Ми но тӥледын ӵош лэсьтӥськомы, малы ке шуоно тӥ кадь ик ми но тӥляд Инмарды доры куриськыны ветлӥськомы, Сириялэн Асардан эксэйлэн милемыз татчы ваем нуналысеныз Солы курбон сётӥськомы».3Зоровавель, Иисус но Израильлэн мукетъёсыз улы-бечеослэн йыръёссы соослы шуизы: «Милемын ӵош милям Инмармылы корка уд пуктэ; Израильлэн Инмарезлы Кузё-Инмарлы ми асьме понна корка пуктомы, кызьы милемлы Персиялэн Кир эксэез косӥз».4Та музъемысь калык иудей калыклэсь кизэ юскыса улӥз, лэсьтӥськон ужлы котькызьы но люкетыны тыршиз;5Персиялэн Кир эксэезлэн нуналъёсыз бордысен кутскыса Персиялы Дарий эксэй луон нуналозь соос та кутскем ужез куашкатон понна соослы пумит визь-кенеш сётӥсьёсты уксё тырыса медъяллязы.
6Нош Ахашверош эксэйын пукон аръёсы, солэн эксэй луонэзлэн кутсконаз ик, Иудеяын но Иерусалимын улӥсьёс вылэ янгыше уськытон гожтэмын вал.7Артаксеркс кивалтон аръёсы Бишлам, Мифредат, Табеел но соослэн мукет эшъёссы Персиялэн Артаксеркс эксэезлы гожтэт гожтӥзы. Нош гожтэтсы сири букваосын, сири кылын гожтэмын вал.8Визь-кенеш сётъясь Рехум но Шимшай подъясь, Иерусалимлы пумит кылъёс вераса, Артаксеркслы таӵе гожтэт ыстӥзы:9«Соку ик визь-кенеш сётъясь Рехум но Шимшай подъясь, соослэн мукет эшъёссы но, – диней, афарсафхей, тарпелей, апарс, арех, вавилон, сусан, даг, еламит пиос,10озьы ик мукет калыкъёс но, кудъёссэ быдӟым, дано Аснафар [Сеннахирим] Самарияысь городъёсы, шур сьӧрысь мукет городъёсы улыны интыяз».11Тани Артаксеркс эксэйлы ыстэм гожтэтлэн пуштросэз – тынад ляльчиосыд, шур сьӧрын улӥсьёс, гожтэт ысто.12Эксэй, тод: тон дорысь кошкем иудейёс ми доры Иерусалиме вуизы, та бугыръяськись, синазькыль городэз пукто, борддоръёс ӝуто, инъетъёссэс тупатъязы ни.13Эксэй, тод: та город пуктэмын луиз ке, борддоръёсыз ӝутэмын луизы ке, – налог но, выт но, мукет тыриськонъёс но уз ни тыре, эксэй казна изъян адӟоно луоз.14Ми эксэй юртысь сылал сииськомы бере, эксэйлы изъянэз адӟыны ум быгатӥське, соин ик ми эксэйлы ивор ыстӥськомы:15атайёстылэн буре ваён книгаысьтызы мед утчалозы, – буре ваён книгаысь шедьтод но тодод, та город бугыръяськись город, эксэйёс, улосвылъёс понна урод лэсьтӥсь луэ шуыса, вашкала дырысен отын бугыръяськонъёс вал ини, со понна ик та город тырттэм кельтэмын.16Со понна ик эксэйлы ивортӥськомы: та город пуктыса вуттэмын луиз ке, борддоръёсыз ӝутыса быдэстэмын луизы ке, – соку ини шур сьӧрын музъемъёсыд уз ни луэ.
17Визь-кенеш сётъясь Рехумлы, Шимшай подъясьлы, Самарияын но шур сьӧрысь пӧртэм городъёсын улӥсь эшъёссылы эксэй ответ ыстӥз: «Каньыллык тӥледлы… но мукет.18Милемлы ыстэм гожтэттэс мон азьын валамон лыдӟизы,19мон косон сётӥ но, утчаса тодыны быгатӥзы: кемалась дыръёсысен ини та город эксэйёслы пумит ӝутскылӥз, отын ожмаськонъёс, бугыръяськонъёс ортчылӥзы,20Иерусалимын кужмоесь эксэйёс но вылӥллям, вань шурсьӧр музъемез киулазы возиллям, соослы выт, налог, мукет тыриськонъёс тырыса улӥллям.21Озьыен, таӵе косон сётэ: со адямиос ужамысь мед дугдозы, та город медаз ни пуктӥськы – мукет косон сётытозям.22Сак улэ, номыре адӟытэк-валатэк медад кыле. Малы эксэйёслы ярантэм, пайдатэм ужъёсты лэсьтонэз йылэтыны лэзёд?»
23Артаксеркс эксэйлэсь гожтэтсэ Рехум, Шимшай подъясь но соослэн эшъёссы азьын лыдӟем бере ик соос ӝегатскытэк Иерусалиме иудейёс доры мынӥзы но кужмо ож тӥрлыкен соослэсь ужзэс дугдытӥзы.24Иерусалимысь Инмар корка котырысь ужъёс дугдӥзы, таӵе югдур возиськиз Дарий эксэйлэн Персияын кыкетӥ арзэ эксэй пуконын пукытозяз.
Глава 4
