Choose Language
Old Testament Books
New Testament Books
1Сизьыметӥ толэзь вуэм бере Израиль пиос городъёсазы вал ини, соку вань калык, одӥг мурт кадь, Иерусалиме люкаськиз.2Соку Иоседеклэн Иисус пиез аслаз агай-вынъёсыныз, священникъёсын, ӵош султӥз, озьы ик Салафиильлэн Зоровавель пиез, солэн агай-вынъёсыз султӥзы, Израильлэн Инмарезлы курбон сётон ӝӧк лэсьтӥзы со вылын тылын сутӥськись курбонъёс сётон понна, кызьы гожтэмын Инмар адямилэн, Моисейлэн, законаз.3Азьвылэзлэн курбон сётонлэн инъет вылаз ик пуктӥзы, уго соос мурт кунъёсысь калыкъёслэсь кышкаса улыны кутскизы; со вылын Кузё-Инмарлы тылын сутӥськись курбонъёс, ӵукна но ӝыт тылын сутӥськись курбонъёс сётылыны кутскизы.4Тылыс пуктонлы сӥзем праздник ортчытӥзы, кызьы косэмын, нуналлы быдэ, пуктон-косонъя, кӧня кулэ одӥг нуналын, сомында курбон сётылӥзы.5Выль толэзь потыку, Кузё-Инмарлы сӥзем вань праздникъёс дыръя, собере но ялан тылын сутӥськись курбонъёс сётъязы, вань тыршыса вӧсяськисьёс ас мылкыд каремзыя Кузё-Инмарлы саламъёс вайылӥзы.
6Сизьыметӥ толэзьлэн нырысетӥ нуналысеныз ик Кузё-Инмарлы тылын сутӥськись курбон сётылыны кутскизы. Нош Кузё-Инмарлэн храмезлы инъет но понэмын ӧй на вал.7Из вӧлӥсьёслы, тӥрен ужасьёслы азвесь сётъяны кутскизы; Сӥдонысь, Тирысь воргоронъёслы сиён, юон, вӧй сётъязы, зарезь вылтӥ, Персиялэн Кир эксэезлэсь лэземзэ санэ поныса, Ливанысь кедыр кор Яфа каре мед нуллозы шуыса.
8Иерусалимысь Инмар корка доры вуэмзылы кык ар тырмем бере, кыкетӥяз толэзе, Салафиильлэн Зоровавель пиез, Иоседеклэн Иисус пиез, соослэн мукет агай-вынъёссы, священникъёс, левитъёс, пленысь Иерусалиме вань берытскемъёс кутскон сётӥзы но кызь арес тырмем, солэсь но бадӟымгес арлыдо левитъёсты Кузё-Инмар корка пуктон ужъёсты эскерыны-чакланы пуктӥзы.9Иисус но солэн пиосыз, агай-вынъёсыз, Кадмиил но солэн пиосыз, Иудалэн пиосыз, одӥг мурт кадь кариськыса, озьы ик Хенададлэн пиосыз, соослэн пиоссы, агай-вынъёссы – левитъёс – Инмар корка пуктон ужъёсты чакласа-эскерыса улӥзы.
10Лэсьтӥськисьёс Кузё-Инмарлэн храмезлы инъет понэм бере, Израильлэн Давид эксэезлэн пуктон-косонэзъя, Кузё-Инмарез данъян понна священникъёсты священник дӥсен дӥсязы, соослы гумы сётӥзы, левитъёслы – Асаф пиослы – кимвалъёс киязы сётӥзы.11Огзы бере огзы, вошъяськыса соос кырӟаны кутскизы: «Ушъялэ», «Кузё-Инмарез данъялэ», «уго Со ӟечлыко, уго Израиль вылын Солэн гажан-жалянэз пумтэм вапумъёс улэ». Вань калык, бадӟым куараен черектӥськыса, Кузё-Инмарез данъяз – Кузё-Инмар коркалы инъет понэм понна.12Верано ке, священникъёс, левитъёс, улы-выжыослэн йыръёссы пӧлысь азьвылзэ храмез адӟем пересьёс, тазэ храмез ӝутонэз адӟыса, куараен бӧрдӥзы, нош тросэз шумпотэменызы бадӟым куараен черектӥськылӥзы.13Шумпотыса черекъясьёслэсь но калыклэсь куараен бӧрдэмзэ калык висъяны ӧз быгаты, малы ке шуоно калык бадӟым куараен черекъяз, куаразы кыдёкысен кылӥськылӥз.
Глава 3
