Choose Language
Old Testament Books
New Testament Books
1Израиль калыклэсь тӧрооссэ, вань выжыослэсь кивалтӥсьёссэс, израиль семьяослэсь кузёоссэс Соломон эксэй Иерусалиме Кузё-Инмарлэсь сӥзён-косонэн ковчегзэ Давидлэн городысьтыз, Сӥонысь, ваён понна ас дораз ӧтчаз.
2Афаним нимо сизьыметӥ толэзе вань израиль калык Соломон эксэй доры празднике люкаськиз.3Израильлэн вань тӧроосыз лыктӥзы.
Священникъёс ковчегез ӝутӥзы,4Кузё-Инмарлэсь ковчегзэ ки йылазы нуизы, вӧсяськон скинияез но, со пушкысь вӧсяськонын кутӥськись сосудъёсты, арбериосты но; соосты священникъёс, левитъёс нуизы.5Нош Соломон эксэй но со доры люкаськем вань израиль калык ковчеглэн азьпалаз мынӥзы, лыдъяны луонтэм трос ыжъёсты, кечъёсты, ошъёсты курбон сётылӥзы.6Кузё-Инмарлэн сӥзён-косонэныз ковчегез священникъёс храмлэн Давираз, Святойлэсь но Святой интые, херувимъёслэн бурд улазы, ас интыяз пыртӥзы.7Ковчег сылон инты йылын херувимъёс бурдъёссэс вайяса улӥзы, вылысен ковчегез но, сюрыосты но херувимъёс шобыртыса возизы.
8Сюрыос мычиськыса улӥзы, соослэн йылъёссы давир азьысь вӧсяськон интыысен адӟиськыса улӥзы, но педло паласен ӧз адӟиське; соос туннэ нуналозь но отын.
9Ковчег пушкын кык изпулъёс сяна номыриз но ӧй вал, соосты израиль пиос Египет музъемысь потэм бере, Кузё-Инмар соослы сӥзён-косон сётэм бере Моисей Хоривысен отчы понӥз.10Вӧсяськон коркась священникъёс потэм бере Кузё-Инмарлэн корказ пилем пачылаз пыриз.11Пилемен сэрен священникъёс служить карон понна султыны ӧз быгатэ, уго Кузё-Инмарлэн пиштӥсь данлыкез Кузё-Инмарлэсь храмзэ пачылмытӥз.
12Соку Соломон шуиз: «Кузё-Инмар шуиз, Солэн пеймыт азьын улыны эрикез вань.13Мон Тыныд улыны храм пуктӥ, пумтэм вапумъёс ӵоже Тон отын мед улод».14Собере эксэй ымнырыныз аслазъёс пала берытскиз, вань люкаськем израиль калыкез бакель кариз – вань люкаськем израиль калык пыд йылаз сылӥз –15соку со шуиз: «Данлыко Израильлэн Инмарез Кузё-Инмар, Аслаз кылыныз-ымыныз атаелы, Давидлы, верамзэ Со туннэ Аслаз киыныз быдэстӥз! Со шуиз:16Египетысь Аслэсьтым калыкме поттон нуналысен Израильысь одӥг выжылэсь но городзэ отчы храм пуктыны ӧй бырйы, кытын Мынам нимы мед улысал; [Аслам нимылы улыны Иерусалимез бырйи], Аслам израиль калыкелы кивалтӥсь луыны Давидэз бырйи.17Мынам атаелэн, Давидлэн, малпанэз вал Израильлэн Инмарезлэн Кузё-Инмарлэн нимызлы сӥзем храм пуктыны.18Нош Кузё-Инмар атаелы, Давидлы, шуиз: ”Тынад сюлмад Мынам нимылы сӥзем храм пуктыны малпан улэ; тынад сюлмад сыӵе малпан улэ – умой со;19но тон храм уд пукты, макес вискысьтыд потэм пиед Мынам нимылы сӥзем храм пуктоз”.20Кузё-Инмар Аслэсьтыз верам кылзэ быдэстӥз. Кызьы вераз Кузё-Инмар, мон атаелэн, Давидлэн, интыяз луи, Израильлэн эксэй пукон вылаз пукси но Израильлэн Инмарезлэн Кузё-Инмарлэн нимызлы сӥзем храм пуктӥ;21отчы мон ковчеглы инты дасяй, ковчег пушкын Кузё-Инмарлэн атайёсынымы, соосты Египет музъемысь поттэм бераз, кусып кылдытон сярысь сётэм сӥзён-косонэз возиське».
22Вань израиль калыклэн люкаськонэзлэн азьпалаз, Кузё-Инмарлэн курбон сётон ӝӧк азяз султыса, Соломон киоссэ ин пала ӝутыса23шуиз: «Израильлэн Инмарез Кузё-Инмар! Инмын вылӥын но, музъем вылын улӥын но Тон кадез Инмар ӧвӧл. Тон сӥзён-косондэ утиськод, чылкыт сюлмынызы Тынад азьтӥд ветлӥсь ляльчиосыдлы гажан-жаляндэ возьматӥськод.
24Аслад ляльчиедлы, мынам атаелы, Давидлы, мар верад, сое быдэстӥд, мар кылыныд-ымыныд верад, та нуналэ сое Ас киыныд быдэстӥд.25Израильлэн Инмарез Кузё-Инмар, табере Аслад ляльчиедлы, мынам атаелы, Давидлы, тазьы солы верам кылъёстэ быдэсты: ”Тынад пиосыд ас сюрес вылазы возиськизы ке, тон кадь Мынам азьтӥм ветлӥзы ке, Мынам азям Израильлэн эксэй пукон вылаз тынад бордысь потэм пукисед уз быры”.26Нош али, Израильлэн Инмарез, Ас ляльчиедлы, мынам атаелы, Давидлы, верам кылыд шонерлыко мед луоз!
27Зэм ик, Инмарлы-а музъем вылын улоно? Ин но, инъёслэн инзы но Тонэ тэрытыны уг быгато, уката ик таиз, [Тынад нимыдлы сӥзьыса] пуктэм храме.28Аслад ляльчиедлэсь вӧсяськемзэ кабыл басьты, солэсь куриськонзэ санэ пон, Инмаре Кузё-Инмаре; Ас ляльчиедлэсь туннэ вазиськемзэ, вӧсяськемзэ кыл.29Нуназе но, уйин но син азяд возь та храмез но, та интыез но, кудӥз сярысь Тон шуид: ”Отын Мынам нимы улоз”; та интыын Ас ляльчиедлэсь вӧсяськемзэ кыл.30Ас ляльчиедлэсь, Аслад израиль калыкедлэсь, та интыын вӧсяськизы ке, вӧсяськемзэс кыл; Аслад улон интыысеныд, Инмысен, кыл милемыз, жаля-уть милемыз.
31Кин ке матысезлы пумит сьӧлыказ но, сое кыл сётыны куризы ке, со кыл мед сётоз, кыл сётон понна та храме курбон сётон интыяд лыктӥзы ке,32соку Тон Инмысен кыл но Ас ляльчиосыдлы суд лэсьты, янгышоез янгыше уськыты, лэсьтэм ужзэ ас йыр вылаз пон, нош шонер лэсьтӥсез шонере потты, шонер ужъёсызъя пунэмзэ берыкты.
33Тон азьын сьӧлыкаса улэмез понна израиль калыктэ тушмон погыртӥз ке, нош соос нош ик Тон пала берытскизы ке, Тынэсьтыд нимдэ данъязы ке, та храмын Тонэ куризы ке, сюлворизы ке,34соку Тон Инмысен куремзэс кыл но израиль калыкедлэсь сьӧлыксэ кушты, соосты атайёссылы сётэм музъемад берыкты.
35Тон азьын сьӧлыкаса улэмзы понна ин ворсаськиз ке, зор ӧз ни ке луы, та интыын соос вӧсяськизы ке, Тынэсьтыд нимдэ данъязы ке, сьӧлыксылэсь палэнскизы ке, – уго Тон соосты зӥбыт-востэм карид,36соку Инмысен кыл но Ас ляльчиосыдлэсь, израиль калыкедлэсь, сьӧлыксэс кушты, мыныны ӟеч сюрес возьматы, Ас калыкедлы люкетлы сётэм музъем вылад зор кисьты.
37Музъем вылын сютэм ар луоз-а, сьӧдчер вуоз-а, ӵушкась-сутӥсь тӧл лыктоз-а, сынэм висён, саранча, нумыръёс, тушмон сое ас музъем вылаз ӝикатыны кутскоз-а, кыӵе ке шугадӟон, висён-чер луоз-а,38вань израиль калыкед пӧлысь кыӵе ке адямилэсь вӧсяськонзэ, куриськонзэ, сюлмынызы шуге-леке сюронзэс шӧдыса, та храм пала кизэс вӧлъязы ке,39Инмысен, улон интыысеныд, кыл но простить кар; котькудӥзлы пунэмзэ берыкты, лэсьты солэн улэм сюресэзъя, кызьы Тон солэсь сюлэмзэ адӟод, уго одӥг Тон гинэ вань адями пиослэсь сюлэмзэс тодӥськод:40атайёсмылы сётэм музъем вылад вань улоно нуналъёссы ӵоже соос Тынэсьтыд курданэн мед улозы.
41Израиль калыкед пӧлысь потымтэ, мурт выжыысь потэм адями Тынад нимыд понна кыдёкысь шаеръёсысь лыктӥз ке, –42уго соос кылозы Тынад быдӟым нимыд сярысь, Тынад вӧлъям киыд сярысь, кужмо суйбыгытэд сярысь, – со адями лыктоз но та храм дорын вӧсяськиз ке,43Инмысен, улон интыысеныд, Тон кыл сое, мурт выжыысь лыктэм адями Тынэсьтыд мар гинэ уз куры, ваньзэ санэ пон, музъем вылысь вань калыкъёс Тынэсьтыд нимдэ мед тодозы, Тынэсьтыд кышканэн мед улозы, кызьы кышканэн улэ израиль калыкед, мед тодозы, мынам пуктэм храме Тынад нимыныд нимамын шуыса.
44Куке калыкед тушмонэзлы пумит Тынад возьматэм сюрестӥд мыныны потӥз ке, быръем городэд шоры берытскыса, Тынад нимыдлы сӥзьыса пуктэм храме пала учкыса, Кузё-Инмарлы вӧсяськиз ке,45Инмысен соослэсь вӧсяськемзэс, куриськемзэс кыл, мар соослы кулэ, куремзэс быдэсты.
46Тон азьын соос сьӧлыказы ке, – уго сьӧлыкасьтэм адями ӧвӧл, – соослы вождэ поттӥд ке, соосты тушмон киулэ сётӥд ке, нош пленэ кутэмъёс соосты кыдёкысь-а, матысь-а тушмон музъеме нуизы ке,47пленэ шедем музъемын улыкузы валатскыса, Тон пала кариськыса, пленэ кутэм музъемын Тыныд вӧсяськыны кутскизы ке: ”Ми сьӧлыкамы, законлы пумит уж лэсьтӥмы, ми янгышесь”,48тушмонлэн пленэ нуэм музъемысеныз Тыныд вань сюлмынызы, вань лулынызы вазиськизы ке, соослэн атайёссылы сётэм музъем пала, Тынад быръем городэд пала, Тынад нимыдлы сӥзем мынам пуктэм храме пала берыктӥськыса, Тыныд вӧсяськизы ке,49соку Инмысен, улон интыысеныд, соослэсь вӧсяськемзэс, куриськемзэс кыл, мар соослы кулэ, куронзэс быдэсты.50Ас калыкедлэсь, Тон азьын лэсьтэм вань сьӧлыкъёссэ, Тон азьын лэсьтэм вань янгыш ужъёссэ простить кар; кинъёс соосты пленэ нуизы, соослэн сюлмазы жалян пырты, соос соосты вӧсь карыса медаз возе:51уго соос Тынад калыкед – корт гурысь, Египетысь поттэм люкетэд.52Ас ляльчиедлэсь вӧсяськемзэ кылыны, Ас израиль калыкедлэсь вӧсяськемзэ кылыны [пельёсыд но], синъёсыд но усьтэмын мед луозы, соос Тыныд вазиськизы ке, соосты Тон кылыны мед быгатод.53Дунне Кутӥсь Кузё-Инмаре, атайёсмес Египетысь поттыкуд, Моисей ляльчиед пыр верам кылыдъя дунне вылын улӥсь вань калыкъёс пӧлысь Тон соосты Аслыд люкетлы висъяд!»
54Кузё-Инмар азьын тазьы вӧсяськем, куриськем бераз Соломон Кузё-Инмарлэн курбон сётон ӝӧк дорысьтыз пыдес вылысьтыз султӥз, киосыз инбам пала вӧлъямын вал.55Вань люкаськем израиль калыкез сылыса бадӟым куараен бакель карыса шуиз:56«Данлыко [Инмар] Кузё-Инмар, Аслаз израиль калыкезлы каньыллык сётӥз, кызьы Со вераз вал! Моисей ляльчиез пыр Солэн верам одӥгез но ӟечлыко кылыз быдэсмытэк ӧз кыльы.57Инмармы Кузё-Инмар котьку милемын мед луоз, кызьы Со атайёсынымы огазьын вал, милемыз медаз кушты, огнамес медаз кельты,58Ас палаз сюлэммес мед берыктоз но ми Солэн вань сюресъёсыз кузя ветлыны мед быгатомы, Солэсь атайёсмылы сӥзьыса сётэм курон-косонъёссэ, пуктон-косонъёссэ, законъёссэ чакласа-утьыса мед уломы.59[Туннэ] Кузё-Инмар азьын вӧсяськем кылъёсы уйин но, нуназе но Инмармылы Кузё-Инмарлы матын мед луысалзы но Со Ас ляльчиезлы мар солы кулэ, Аслаз калыкезлы мар кулэ, сое мед лэсьтысалзы, нуналысь нуналэ,60вань калыкъёс мед тодысалзы, Кузё-Инмар – со Инмар, Со сяна мукет инмар ӧвӧл шуыса.61Сюлэмды быдэсак Инмармылы Кузё-Инмарлы сётэмын мед луоз но Солэн пуктон-косон сюрес вылтӥз ветлыны мед быгатоды, али кадь курон-косонъёссэ быдэсъяса мед улоды».
62Эксэй но соин ӵош вань израиль калык Кузё-Инмарлы курбон сётӥзы.63Тупаса улон понна Соломон Кузё-Инмарлы курбон карыса кызь кык сюрс таза пудо, сю кызь сюрс векчи пудо сётӥз. Тазьы эксэй вань израиль калыкен ӵош Кузё-Инмарлы сӥзем храмез вӧсязы.64Со нуналэ ик эксэй Кузё-Инмарлэн храм азьысьтыз азбарлэсь шор люкетсэ вӧсяз, отын тылын сутӥськись курбон, нянь курбон сётӥз, тупаса улонлы сӥзьыса, кӧез-вӧез курбонлы сётӥзы, малы ке шуоно Кузё-Инмар азьысь ыргонлэсь лэсьтэм курбон сётон ӝӧк тылын сутӥськись курбонэз, нянь курбонэз, тупаса улонлы сӥзем кӧй-вӧйзэ поныны пичи вал.
65Со виын Соломон Инмармы Кузё-Инмар азьын праздник ортчытӥз, соин ӵош вань израиль калык вал – бадӟым люкаськон отчы лыктӥз Емафе пырон дорысен Египет шур дорысь; [сиизы, юизы, вӧсяськизы Инмармы Кузё-Инмар азьын пуктэм храм дорын] – сизьым нунал, эшшо сизьым нунал – дас ньыль нунал ӵоже.66Тямысэтӥ нуналаз Соломон калыкез лэзиз. Эксэйлы ӟеч кылъёс веразы но вань ӟечез понна, мае Кузё-Инмар Давид ляльчиезлы, израиль калыкезлы лэсьтӥз, сюлмынызы шумпотыса, шулдыръяськыса, доразы кошкизы.
Глава 8
