Choose Language
Old Testament Books
New Testament Books
1Нош аслэсьтыз корказэ Соломон дас куинь ар ӵоже лэсьтӥз, быдэс корка пуктонзэ йылпумъяз.2Корказэ со Ливанысь ваем коръёслэсь пуктӥз, кузьдалаез сю гырпум кузьда, пасьталаез витьтон гырпум пасьта, нош ӝуждалаез куамын гырпум ӝужда вал, ньыль чур кедырпу юбоос сылӥзы; кедырпу коръёс юбоос вылэ тыремын вал.3Ньыльдон вить юбоосы пыкиськись коръёс вылэ кедырпулэсь липет лэсьтэмын, чурлы быдэ дас вить кор понэмын вал.4Укно янакъёс куинь радэн сылӥзы; куинь радъем укноос огзылы огзы ваче пумит учкыса улӥзы.5Вань ӧсъёс, ӧс янакъёс ньыль сэрего карыса лэсьтэмын, укноос куинь радэн огзылы огзы ваче пумит учкыса улӥзы.6Притворзэ юбоослэсь лэсьтӥз, витьтон гырпум кузьда вал со, пасьталаез куамын гырпум, солэн азьпалаз корказь, юбоос, соослэн азязы ӧс кусып.7Эшшо престолэн притвор лэсьтӥз на, отысен со судить карылӥз; суд лэсьтыны притвор лэсьтӥз, выжзэ кедырпулъёслэсь лэсьтӥз.8Солэн улоно корказ, притворлэн бераз та выллем ик лэсьтэм азбарез вал. Фараонлэсь нылзэ кышно басьтэм бераз Соломон солы корка пуктӥз, отчы таӵе ик притвор лэсьтӥз.
9Ваньмыз таос дуно изъёслэсь лэсьтэмын, соосты быдӟалазыя вӧлыса лэсьтӥзы, бычкыен вандылӥзы, кыр ласянь но, пуш ласянь но, инъетысеныз липетозяз, кыр паласеныз бадӟым азбарозь.10Инъет карыса, дуно изъёс, бадӟым изъёс, дас гырпум кузьда изъёс, тямыс гырпум кузьдаесь изъёс понэмын;11вылтӥз быдӟалазыя вӧлыса дасям дуно изъёс, кедырпу понэмын.
12Бадӟым азбар вӧлыса дасям изъёсын куинь радэн котыртэмын, одӥг радэз кедырпу коръёсын кенерамын; озьы ик каремын вал Кузё-Инмарлэн храмезлэн пуш азбараз, храмлэн притвораз.
13Соломон эксэй Тирысь Хирамез ӧтьыса вайиз,14Неффалим выжыысь палкышнолэсь пизэ. Солэн атаез, Тир пи, ыргон арбериос лэсьтыса улӥз; ыргонлэсь пӧртэм арбериос лэсьтылыны Хирамлэн быгатонлыкез, устолыкез, салятэз вал.
Соломон эксэй доры лыктӥз но со дорын пӧртэм арбериос лэсьтыса улӥз:15со кык ыргон юбо лэсьтӥз, кыкез ик дас тямыс гырпум ӝужда, дас кык гырпум кузьда гозы созэ но, тазэ но юбоез котыртыны тырмиз;16ыргонэз ӵыжатыса юбоослэн йылазы понон понна кык венец лэсьтӥз: одӥгез венец вить гырпум ӝужда, мукетыз но венец вить гырпум ӝужда;17юбоос йылысь венецъёслы пуныса лэсьтэм сетка, жильылы укшась шнуръёс – сизьымез одӥгаз венецын, сизьымез мукетаз венецын.18Тазьы со юбоос лэсьтӥз, юбоос йылысь венецъёсты шобыртон понна сетка котыре кык рад гранат улмоос лэсьтӥз; мукетызлы венецлы но тазьы ик лэсьтӥз.19Нош притворын юбоос йылысь венецъёс лилия сяськалы укшатыса лэсьтэмын, ньыль гырпум ӝуждаесь.20Кыказ ик юбоос йылын венецъёс, сетка вӧзысь, зӧк интылэн йылаз ик; мукетызлэн венецлэн но котыртӥз радэн-радэн кык сю гранат улмоос лэсьтэмын.21Храмлэн притворез вӧзы юбоос пуктӥз; бурпалаз юбо пуктӥз но солы Иахин ним сётӥз, паллян палаз юбо пуктӥз но солы Воаз ним сётӥз.22Юбоос йылэ венецъёс пуктӥз, лилия сяськалы укшатыса, соос лэсьтэмын вал. Тазьы йылпумъяськиз юбоосты пуктылон уж.
23Ыргонэз ӵыжатыса, зарезь лэсьтӥз – дурысеныз дурозяз дас гырпум кузез – чылкак котырес вал со, вить гырпум ӝуждалаез, куамын гырпумъем гозы сое котыртыны тырмиз.24Солэн дуртӥз котькуд гырпум кузьда интыын киярлы укшась дас чеберъянъёс лэсьтӥзы, кык радэн соос зарезь котыре интыязы; киярлы укшась макеос зарезен огазе ӵыжатыса лэсьтэмын вал.
25Зарезь дас кык ошъёс вылын сылӥз: куинез уйпала учкыса сылӥзы, куинез – шундыпуксён пала, куинез – лымшоре, куинез шундыӝужан пала учкыса сылӥзы; зарезь соос вылын кыллиз, ошъёс берынызы зарезь улын сылӥзы.26Солэн зӧкталаез кикур зӧкта, солэн дуръёсыз чашалы укшатыса лэсьтэмын, вайёссэ лэзьям лилия сяськалы со укша вал. Отчы кык сюрс бат ву тэрылӥз.
27Со ыргонлэсь дас пуктэтъёс лэсьтӥз; котькудӥз но со ньыль гырпум кузьда, пасьталаез ньыль гырпум пасьта, ӝуждалаез куинь гырпум ӝужда.28Тани со пуктэтъёс кызьы лэсьтэмын: соослэн борддоръёссы вал, борддоръёс сэрегысь пластинкаос вискы лэсьтэмын;29сэрегысь пластинкаос вискысь борддоръёс вылын левъёс, ошъёс, херувимъёс лэсьтэмын; сэрегысь пластинкаос вылын но, ошъёслэн, левъёслэн улӥязы но, вылӥязы но ошиськыса улӥсь сяська тугокоос лэсьтэмын;30котькуд пуктэтлэн ньыль ыргон питранэз, ыргон питранлэн черсэз ыргонлэсь ик лэсьтэмын. Ньыль сэрегаз ик пельпумлы укшась мычиськыса улӥсь макеосыз вал, соос котькуд сяська тугоко вӧзын, чашалэн улаз, ултӥз ӵыжатыса лэсьтэмын.
31Пушкысь тугоко дорысен йылӥозяз пасез одӥг гырпум кузьда; солэн пасез котырес, юболэн пуктэтэзлы укша, одӥг но ӝыны гырпум кузьда; пась вӧзын ӵыжатыса-вӧлыса лэсьтэм чеберъянъёс; нош урдэс борддоръёсыз котыресэсь ӧй вал, ньыль сэрегоесь вал.32Борддоръёслэн улазы ньыль питранэз, питранъёслэн черссы пуктэтын; котькуд питранлэн ӝуждалаез одӥг но ӝыны гырпум ӝужда.33Питранъёс уроболэн поглянъёсыз кадь ик лэсьтэмын; черсъёссы, эгесъёссы, поглян пиньёссы, спицаоссы – ваньзы ӵыжатыса кисьтэмын.34Котькуд пуктэтлэн ньыль сэрегаз ик ньыль мычиськыса улӥсь макеез вал; пуктэт пушкысь мычиськыса улӥсь макеос потӥзы.35Пуктэтлэн йылӥяз ӝыны гырпум ӝужда котырес ӝутскыса улӥсь арбериез вал; пуктэтлэн йылысьтыз кутонъёсыз но, борддорез но одӥг арберилэсь лэсьтэмын.36Кутонъёсызлэн вылазы, борддоръёсыз борды ӵыжатыса-вӧлыса херувимъёсты, левъёсты, пальмапуосты лэсьтӥз – кытчы, кӧня инты сюроз, нош котыразы ошиськыса улӥсь сяська тугокоос лэсьтӥз.37Тазьы со дас пуктэтъёс лэсьтӥз: ваньзы соос одӥг кадь ӵыжатыса-кисьтыса лэсьтэмын, одӥг кадь быдӟалазы, одӥг кадь вылтуссы.
38Ыргонлэсь дас мисьтӥськон лэсьтӥз, котькудаз мисьтӥськонэ ньыльдон бат ву тэре, котькудӥз мисьтӥськон ньыль гырпум ӝужда, котькудаз дас пуктэт вылын мисьтӥськон сылӥз.39Пуктэтъёсты тазьы интыяз: витьсэ храмлэн бурпалаз пуктӥз, витьсэ храмлэн паллян палаз, нош зарезез храмлэн бурпалаз, шундыӝужанэн лымшор вискы пуктӥз.40Хирам мисьтӥськонъёс, лопаткаос, чашаос лэсьтӥз.
Соломон эксэй дорын Кузё-Инмарлы храм лэсьтонзэ ваньзэ Хирам йылпумъяз:41кык юбо но соос йылысь чашалы укшась кык венецъёс; юбоос йылысь венецъёсты шобыртыны кык сеткаос.42Кык сеткаос бордысь ньыль сю гранат улмоос; котькуд сеткалы кык радэн гранат улмоос, юбоос йылысь кык венецъёсты шобыртон понна лэсьтӥз;43дас пуктэтъёс, пуктэтъёс вылэ дас мисьтӥськонъёс интыяз;44одӥг ыргон зарезь но зарезь улэ дас кык ыргон ошъёс пуктӥз;45тазъёс, лопаткаос, чашаос лэсьтӥз. Соломон эксэй дорын Кузё-Инмарлэн храмезлы Хирам вань арбериосыз ыргонэз волятыса лэсьтӥз.46Эксэй соосты кисьтӥз горд сюё музъемын, Иордан вӧзын, Сокхофен Цартан вискын.47Вань та арбериосты Соломон интыязы пуктылӥз. Туж но туж трос луэменызы, ыргонлэн весэз лыдъямын ӧвӧл.
48Кузё-Инмарлэн храмысьтыз вань арбериосты Соломон лэсьтӥз: зарнилэсь курбон сётон ӝӧк, курбон нянь тырон зарни ӝӧк;49лампада пуктонъёс – витез бурпалаз, витез паллян палаз – храмлэн пыдлось висъетэз азе, соос чылкыт зарнилэсь лэсьтэмын; сяськаос, лампадаос, кискачъёс – ваньзы зарнилэсь лэсьтэмын;50тусьтыос, пуртъёс, чашаос, тэркыос, кадилоос чылкыт зарнилэсь лэсьтэмын, храм пушкысь Святойлэсь но Святой интыяз пырон ӧсъёссылэн, храме пырон ӧсъёслэн ӟирыоссы зарнилэсь ик лэсьтэмын.
51Тазьы Соломон эксэй Кузё-Инмарлэсь храмзэ лэсьтон вань ужъёсты быдэстӥз. Атаезлэсь, Давидлэсь, сӥзиськемзэ Соломон вайиз; азвесез, зарниез, пӧртэм арбериосты Кузё-Инмарлэн храмысьтыз узырлык тыронэ поныны сётӥз.
Глава 7
