Choose Language
Old Testament Books
New Testament Books
1Кузё-Инмарлэсь храмзэ, эксэй корка пуктонзэ – ваньзэ, мае Соломонлэн лэсьтэмез потэ вал, быдэстӥз, но2соку Соломонлы Кузё-Инмар кыкетӥ ползэ возьматскиз, Гаваонын кадь ик.3Кузё-Инмар солы шуиз: «Мон кылӥ тынэсьтыд вӧсяськемдэ, Мынэсьтым мар курид, сое но кылӥ; [тынад вӧсяськемедъя ваньзэ лэсьтӥ]. Пумтэм вапумъёсы Мынам нимы отын мед улоз шуыса, тынэсьтыд пуктэм храмдэ Мон дун-чылкыт кари; синъёсы но, сюлмы но вань нуналъёс ӵоже отын улозы.4Мынам син азьтӥм кызьы тынад атаед, Давид, ветлӥз, чылкыт сюлмын, шонерлыко, ваньзэ тыныд сётэм сӥзёнъёсме, вань пуктон-косонъёсме, законъёсме быдэсъяса улӥд ке,5соку тынэсьтыд быдэс Израилен кивалтон эксэй пукондэ пумтэм вапумъёслы пукто, кызьы Мон Давидлы, атаедлы, верай: ”Тон бордысь потэм Израильлэн эксэй пукон вылаз пукись уз быры”.
6Нош тӥ, тӥляд нылпиосты Мон бордысь палэнскиды ке, Мынэсьтым тӥледлы сётэм курон-косонъёсме, пуктон-косонъёсме ӧд ке быдэсъялэ, мыныса мукет инмаръёслы йыбыртъяса, ужаса-тыршыса улӥды ке,7соку Мон Израилез солы сётэм музъем вылысьтым быдто, Аслам нимылы сӥзьыса вӧсям храмме син азьысьтым палэнто, соку Израиль вань калыкъёс пӧлын мадёнлы, серекъян-веранлы пӧрмоз.8Та ӝужыт храм вӧзтӥ котькудӥз ортчись мурт туж куалектоз но шултыса шуоз: ”Мар понна Кузё-Инмар та музъемлы, та храмлы тазьы кариз?”9Шуозы: ”Атайёссэс Египет музъемысь поттэм Инмарзэс Кузё-Инмарез вунэтэмзы понна, мукет инмаръёсты кабыл басьтыса, соослы йыбыртъяса, ужаса-тыршыса улэмзы понна, – со понна Кузё-Инмар соос вылэ вань та шугадӟонэз лэзиз”».
10Кызь ар ортчыса, Соломон Кузё-Инмарлы но, эксэйлы но корка пуктыса вуэм бере,11Тирлэн Хирам эксэез Соломонлы солэн мылкыд каремезъя кедырпу, кипариспу, зарни нуллэм-вуттэмез понна Соломон Хирамлы Галилеяысь кызь городъёсты сётӥз.12Хирам, Тирысь потыса, Соломонлэсь солы сётэм городъёссэ учкиз, но соос солы ӧз кельше.13Со шуиз: «Братэ, мар со сыӵеесь мыным сётэм городъёсты?» Соосты ”Кавул музъем” шуыса нимаз, туннэ нуналозь но соос озьы нимасько.14Хирам эксэйлы сю кызь талант зарни ыстӥз.
15Кузё-Инмарлы храм, аслыз корка, Миллоез, Иерусалимлы борддор, Гацор, Мегиддо, Газер городъёсты пуктон понна тани Соломон эксэй выт люкан сярысь косон сётӥз.16Фараон, Египетлэн эксэез, лыктыса Газерез киултӥз, сое тылын сутӥз, городын улӥсь хананейёсты виылӥз, йырдон карыса, сое нылызлы, Соломонлэн кышноезлы, кузьмаз.17Соломон Газерез но улысь Беф-Оронэз пуктӥз,18луоё кыр дуннее Ваалаф но Фадмор городъёс пуктӥз,19запас ваньбур возьыны Соломон киысь вань городъёсты пуктӥз, ожмаськон уробоосты возён городъёс, борӟемен ветлон валъёсты возён городъёс – ваньзэ, мае Соломонлэн Иерусалиме но Ливанэ, ас киулысьтыз вань музъемъёсы пуктэмез потэ вал.20Израиль пиос бордысь потымтэ аморрей, хеттей, ферезей, [хананей], евей, иевусей но [гергесей] калыкъёслэсь кылем люкетсэс,21соос бере кылем нылпиоссэс, кудъёссэ израиль пиос быдтыны ӧз быгатэ, Соломон туннэ нуналозьлы ляльчиын ужась кариз.22Нош израиль пиосты Соломон ляльчи ӧз кары, соос солэн ожгарчиосыз луизы, медоосыз луизы; соосты кузёйыръёс, ож ужен кивалтӥсьёс, ожмаськон уробоосын, борӟемен ожмаськисьёслы азьветлӥсьёс кариз.23Тани Соломонлэн ужъёсыныз кивалтыны пуктэм кузёйыръёс: ужась калыкен кивалтӥсьёс вить сю витьтон мурт вал.
24Фараонлэн нылыз Давидлэн городысьтыз Соломонлэн солы шуыса пуктэм корказ улыны выжиз. Собере Соломон Миллоез пуктӥз.
25Арлы быдэ куинь пол Кузё-Инмарлы сӥзьыса пуктэм курбон сётон ӝӧк вылаз Соломон тылын сутӥськись курбонъёс, тупаса улонлы сӥзем курбонъёс сётылӥз, со вылын ик, Кузё-Инмарлы сӥзьыса, ческыт зыно ӵындытон ортчытылӥз. Корка пуктонзэ со йылпумъяз.
26Идумей музъемысь, Горд Кам зарезь дуре, Елаф вӧзысь Ецион-Гавере Соломон зарезь вылтӥ уясь пыж лэсьтӥз.27Пыжен уясь, зарезез тодӥсь муртъёссэ Хирам Соломонлэн адямиосыныз огазе ыстӥз;28соос Офире мынӥзы, отысь ньыль сю кызь талант зарни басьтӥзы но Соломон эксэйлы вайизы.
Глава 9
