Choose Language
Old Testament Books
New Testament Books
1Израиль пиослэн Египет музъемысь потэмзылэн ньыль сю тямыстонэтӥ араз, Соломонлэн Израильлы ньылетӥ арзэ эксэй луоназ, зӥф – кыкетӥ толэзе, со Кузё-Инмарлы храм пуктыны кутскиз.2Кузё-Инмарлы Соломонлэн пуктэм храмезлэн кузьдалаез куатьтон гырпум кузьда вал, пасьталаез кызь, ӝуждалаез куамын гырпум ӝужда;3корказез кызь гырпум кузьда, пасьталаез храмлэн пасьталаеныз огкадь, храмлэн азяз пасьталаез дас гырпум пасьта вал.4Корка усьяськисьтэм, чалышвыл мынӥсь решёткаё укноос пуктӥз.5Храмлэн борддор котыртӥз пристрой лэсьтӥз, храм котыртӥ, давир котыртӥ но; котыр висъетъёс лэсьтылӥз.6Пристройлэн улысь люкетэзлэн пасьталаез вить гырпум пасьта, шорысь люкетэзлэн – куать гырпум, нош куинетӥезлэн пасьталаез сизьым гырпум пасьта вал; храмлэн кыр палтӥз пристрой храмлэн борддоръёсыз борды медаз йӧтӥськы шуыса, висъёс (уступъёс) лэсьтӥзы.7Храмез пуктыку, вӧлыса дасям изъёсты уже кутӥзы; молот куара но, ожон куара но, мукет нокыӵе но корт арбериослэн куаразы храм пушкын сое пуктыкузы ӧз кылӥськы.8Шорысь люкетэ пырон храмлэн бурпалаз вал. Котырес тубат кузя шорысь люкетэ пырылӥзы, нош отысен – куинетӥ люкетэ.9Храмез пуктыса быдэстэм бере сое кедырпулъёсын шобыртӥз.10Храмлэн урдэсказ вить гырпум ӝуждаесь висъетъёс пуктылӥз; храм борды соосты кедырпу коръёсын юнматӥз.
11Кузё-Инмар дорысь Соломонлы таӵе кылъёс верамын вал:12«Тани, тон храм пуктӥськод; Мынам пуктон-косонъёсыя улӥд ке, верам кылъёсме быдэсъяд ке, вань курон-косонъёсме чакласа-утьыса улӥд ке, соку Мон атаедлы, Давидлы, верам кылме тон вылын быдэсто.13Соку Мон израиль пиос пӧлын уло, израиль калыкме уг кушты».
14Соломон храм пуктӥз, быдэстӥз сое.15Храм борддорез пуш палтӥз кедырпулэн шуккиз; выж вылысен вӧлдэтозяз пулэн шуккиз, выж вылэ кипарис пул вӧлдӥз.16Храмлэн бертӥз, дурысеныз кызь гырпум кельтыса, борддор лэсьтӥз; борддорзэ но, вӧлдэтсэ но кедырпулэн шуккиз, Святойлэсь но Святой интылы давир пуктӥз.17Храмлэн азьпал люкетыз ньыльдон гырпум кузьда вал.18Храмлэн пушказ, кедырпулъёс вылэ вандылыса, киярлы, вайёссэ лэзьям сяськалы укшась макеос суредазы; ваньмыз кедырпулэн шобыртэмын, изъёс ӧз адӟиське.19Кузё-Инмарлэн сӥзён-косонэныз ковчегез интыян понна храмлэн пушказ давир пуктыса дасяз.20Давирлэн кузьдалаез кызь гырпум кузьда, пасьталаез кызь гырпум пасьта, ӝуждалаез кызь гырпум ӝужда; чылкыт зарниен сое шобыртӥз; кедырпулэсь лэсьтэм курбон сётон ӝӧкез но шобыртӥз.21Храмлэсь пушсэ Соломон чылкыт зарниен шобыртӥз, давир азе зарни жильы кыскиз, давирез зарниен шобыртӥз.22Быдэс храмез зарниен шобыртӥз, быдэс храмез пумозяз, давир азьын сылӥсь курбон сётон ӝӧкез но быдэссэ зарниен шобыртӥз.
23Давир пушкы вӧйпулэсь дас гырпум ӝуждаем кык херувимъёс лэсьтӥзы.24Херувимлэн одӥгез бурдыз вить гырпум кузьда, мукетыз бурдыз вить гырпум кузьда; одӥг бурд йылысеныз мукет пал бурд йылозяз – дас гырпум.25Дас гырпум кузьда ик вал мукетыз но херувим; одӥг быдӟаесь, одӥг тусъемесь вал кыкез ик херувимъёс.26Одӥгезлэн херувимлэн ӝуждалаез дас гырпум ӝужда, мукетызлэн херувимлэн но со ӝужда ик.27Херувимъёсты со храмлэн пуш пал люкетаз пуктӥз. Херувимъёслэн бурдъёссы вайяськыса улӥзы, одӥгезлэн бурдыз огпал борддоре вуэ, нош мукетызлэн херувимлэн бурдыз мукет борддор дорозь вуэ вал; нош мукетъёсыз бурдъёссы храм шорын ваче бурд вуылӥзы.28Херувимъёсты со зарниен шобыртӥз.
29Храмлэн вань борддоръёсаз, котыр ласянь вӧлыса-вандылыса, херувимъёсты, пальмапуосты лэсьтӥз, ошылӥськем ваё сяськаосты – кырласянь но, пушласянь но лэсьтӥз.30Храмлэсь пуш паласьсэ но, кыр паласьсэ но выжзэ зарниен шобыртӥз.31Давире пырон ӧсъёссэ вӧйпулэсь лэсьтӥз, янакъёссэ вить сэрего кариз.32Ӧсъёслэн кык пал люкетъёсазы, вӧйпулэсь вӧлыса-вандылыса, херувимъёсты, пальмапуосты, ошылӥськем ваё сяськаосты лэсьтӥз но зарниен шобыртӥз; херувимъёсты но, пальмапуосты но зарниен шобыртӥз.33Храме пырон ӧсэз ньыль сэрего, вӧйпулэсь лэсьтӥз,34кыксэ ӧсэз кипариспулэсь лэсьтӥз; одӥг ӧслэн кыкез ик люкетэз вырыса улӥз, мукетызлэн ӧслэн но кыкез ик люкетэз вырисесь вал.35Соос вылэ херувимъёсты, пальмапуосты, ошиськись ваё сяськаосты вӧлыса-вандылыса лэсьтӥз, соосты зарниен шобыртӥз.36Пушкысь азбарез куинь рад вӧлэм изъёсын котыртӥз, одӥг радзэ ньыль сэрго вӧлэм кедырпуэн котыртӥз.
37Ньылетӥ араз, Зӥф толэзе [кыкетӥ толэзе] Кузё-Инмарлэн храмезлы инъет понӥз.38Нош дас одӥгетӥ араз, Бул толэзе – со тямысэтӥ толэзь – храмез но маиз солэн вань, вань люкетъёсыныз-арбериосыныз валче пуктонзэ со йылпумъяз; сизьым ар ӵоже сое лэсьтӥз.
Глава 6
