Choose Language
Old Testament Books
New Testament Books
1Соломонэз атаез интые, вӧйын зырӟыса, эксэе пуктэм сярысь кылэм бераз Тирлэн эксэез Хирам Соломон доры медооссэ ыстӥз; уго Хирам Давидлы вань улытозяз эш вал.2Соломон Хирам доры тазьы вераны ыстӥз:3«Тон тодӥськод, котыр ёросъёсысь калыкъёсын ожмаськыса улэмен сэрен соосты Кузё-Инмар Давидлэн пыд улаз понытозь, мынам атае, Давид, Инмарезлэн Кузё-Инмарлэн нимызлы сӥзем корка пуктыны ӧз быгаты.4Нош та виын Инмаре Кузё-Инмар мыным котыр ласянь каньыллык сётӥз: тушмонъёс но ӧвӧл, могӟетъёс но ӧвӧл.5Тани, мон Инмарелэн Кузё-Инмарлэн нимызлы сӥзем корка пуктыны малпасько, кызьы Кузё-Инмар атаелы, Давидлы, вераз вал: ”Эксэй пукон вылад тон интые пуксёно тынад пиед, кудзэ Мон пукто, Мынам нимылы сӥзем корка пуктоз”.6Озьы бере, Ливанысь кедырпу кораны кос; мынам ляльчиосы тынад ляльчиосыныд огазьын луозы, тынад ляльчиосыдлы уждун тыро, кӧня дун пуктод; тон тодӥськод уго, тынад Сӥдонад улӥсьёсыд кадь мынам кор кораны быгатӥсьёсы ӧвӧл».
7Соломонлэсь верам кылъёссэ кылыса, Хирам туж шумпотӥз, со шуиз: «Данлыко Кузё-Инмар, та трос лыдъем калыкен кивалтыны Давидлы визьлыко пи Сётӥсь!»8Хирам Соломонлы тазьы вераны ыстӥз: «Адямиос пыр ыстэм ивордэ, ваньзэ сак кылзӥ; кедырпуос, кипариспуос пумысен вань куронъёстэ быдэсто.9Мынам ляльчиосы соосты Ливанысь зарезь дуре нуллозы, зарезь вылтӥ пурен мыным возьматэм интыяд вутто, отчы соосты огазе тыро, тон отысь басьтод; но тон мынэсьтым мылкыд каронме быдэсты: мынам юртам нянь нуллы».10Хирам Соломонлы кедырпу, кипариспу кӧня кулэ, сомында сётӥз.11Нош Соломон Хирамлы солэсь калыксэ сюдыны кызь сюрс мера-кор чабей, кызь мера-кор вӧйпу мульыысь пызьыртэм вӧй сётылӥз; Соломон Хирамлы арлы быдэ тамында сётылӥз.12Кузё-Инмар Соломонлы визьлык сётӥз, кызьы солы сӥзьыса вераз вал. Хирамен Соломон тупаса улӥзы, куспазы эшъяськон кусып кылдытӥзы.
13Быдэс Израилез Соломон эксэй ас вылаз ужатӥз; куамын сюрс мурт со вылэ ужаса улӥз.14Вошъяськыса, толэзьлы быдэ дас сюрс муртэн Ливанэ ыстылӥз: одӥг толэзьзэ соос Ливанын улӥзы, нош кык толэзьзэ – доразы. Адонирам соосын кивалтыса улӥз.15Соломонлэн вал на сизьымдон сюрс мурт секыт арбериосты нуллӥсьёсыз, тямыстон сюрс мурт гурезьёсын из кораса улӥсьёсыз,16ужлэсь мынэмзэ чакланы Соломонлэсь куинь сюрс куинь сю пуктэм кивалтӥсьёссэс лыдэ басьтытэк.17Эксэй коркалы инъет пуктон понна бадӟымесь изъёс, дуно изъёс, вӧлыса дасям изъёс нуллыны косӥз.18Со изъёсты Соломонлэн ужасьёсыз, Хирамлэн ужасьёсыз, Гивалын улӥсьёс вӧлӥзы; корка пуктыны [куинь ар ӵоже] коръёс, изъёс дасязы.
Глава 5
