Choose Language
Old Testament Books
New Testament Books
1Соломон эксэй быдэс Израильлы эксэй вал.2Тани солэн кивалтон ужъёсын вырисьёсыз: Садок священниклэн пиез Азария,3Сӥвалэн пиосыз Елихореф но Ахия, подъясьёс; Ахилудлэн пиез Иосафат, эксэйлэсь ужъёссэ гожъясь;4Иодайлэн пиез Ванея, армиен кивалтӥсь; Садок но Авиафар – священникъёс;5Нафанлэн пиез Азария, улосвылъёсын кивалтӥсьёслэн кивалтӥсьсы; Нафан священниклэн пиез Завуф – эксэйлэн эшез;6Ахисар – эксэй коркаен кивалтӥсь; Авдалэн пиез Адонирам – выт бичан ужъёсын кивалтӥсь.
7Соломонлэн быдэс Израильлэн улосвылъёсыныз дас кык кивалтӥсьёсыз вал, соос эксэйлы но, солэн юртэзлы но сиён-юон вуттылӥзы: соос пӧлысь котькудӥз арлы быдэ одӥг толэзьлы тырмымон сиён-юон вуттыны кулэ луиз.8Тани соослэн нимъёссы: Бен-Хур – Ефрем гурезьын;9Бен-Декер – Макацын но Шаалбимын, Вефсамисын но Елонын, Беф-Хананын;10Бен-Хесед – Арюбофын, солэн ик киулаз вал Соко, быдэс Хефер музъем но;11Бен-Авинадав – быдэс Нафаф-Дорын; Тафаф, Соломонлэн нылыз, солы кышно вал;12Ахилудлэн пиез Ваана – Фаанахын, Мегиддоын, быдэс Беф-Санын, кудӥз Изреельлэн улазгес Цартанлы матэ интыяськемын, Беф-Санысен Авел-Мехолаозь, Иокмеамлэн сьӧрозяз ик;13Бен-Гевер – Галаадысь Рамофын; со киын вал Манассиялэн Иаир пиезлэн Галаадэ интыяськем гуртъёсыз; со киын ик вал Васанысь Аргов улосвыл, борддорен котыртэм, ыргон ворсэтэн куатьтон бадӟымесь городъёс;14Гиддолэн Ахинадав пиез – Маханаимын;15Неффалим музъемын – Ахимаас, со кышно басьтӥз Соломонлэсь Васемафа нылзэ;16Хушайлэн пиез Ваана – Асир музъемын, Баалофын но;17Паруахлэн пиез Иосафат – Иссахар музъемын;18Елалэн Шимей пиез – Вениамин музъемын;19Урийлэн Гевер пиез – Галаад музъемын, аморрейёслэн Сӥгон эксэйзылэн музъемаз, Васанлэн Ог эксэезлэн музъемаз. Со та музъемын улосвылэн кивалтӥз.
20Иудеяын но Израильын улӥсьёс зарезь дурысь луо кадь трос вал, сиизы, юизы, шулдыръяськизы.21Ефрат шур дурысен Филистим музъемозь, Египет дорозь интыяськем вань эксэйлыкъёсты Соломон киулаз возиз. Соос саламъёс-кузьымъёс вайылӥзы, Соломонлэн вань улон нуналъёсыз ӵоже солы ужаса-тыршыса улӥзы.
22Нуналлы быдэ Соломонлы тамында сиён-юон вуттылӥзы: куамын мера-кор*а чабей пызь, куатьтон мера мукет пызьёс,23дас куайытэм ош, уллёын ветлӥсь кызь ош, пужейёс, кыркечъёс, сайгакъёс, куайытэм тылобурдоос сяна, сю ыж;24уго со кузёяськыса улӥз шурлэн тапалысьтыз вань музъемъёсын – Типсахысен кутскыса Газаозь, шурлэн тапалысьтыз вань эксэйёсын; котыр ёросъёсысь вань кунъёсын со тупаса улӥз.25Соломонлэн вань улоно нуналъёсыз ӵоже Иудеяен Израиль, Дан дорысен кутскыса Вирсавияозь, каньылэн улӥзы, котькудӥз аслаз виноградпуд улаз, смоквапу улаз улӥз.26Соломонлэн ньыльдон сюрс ожмаськон уробое кытконо валъёсты сюдон интыез, дас кык сюрс – борӟемен мыноно валъёсты султытон интыез вал.27Со улосвылъёсын кивалтӥсьёс соослы тупатэм толэзьёсы эксэйлэн ӝӧк вылаз вуттӥзы ваньзэ кулэзэ, номырлы но ёрмыса ӧз улэ.28Черодзы вуэ ке, валъёслы, мулъёслы эксэй доры йыды, куро вуттылӥзы.
29Инмар Соломонлы визьлык, туж бадӟым нодлык, трос тодон-валан сётӥз – зарезь дурысь луо мында.30Соломонлэн визьлыкез шундыӝужан палан улӥсь вань пиослэсь, вань египет пиослэсь вылӥынгес вал.31Со вань адямиослэсь визьлыкогес луиз, Езрахи Ефанлэсь но, Еманлэсь но, Халколлэсь но, Дардалэсь но – Махоллэн пиосызлэсь но визьлыкогес луиз, котыр ёросъёсысь вань калыкъёс пӧлын солэн нимыз данлыко вал.32Со куинь сюрс мадёнъёс вераз, солэн сюрс вить кырӟанъёсыз вал.33Со вера вал, Ливанын будӥсь кедырпу бордысен кутскыса, мукет писпуос сярысь но, борддор пушкысь будӥсь иссоп будос сярысь; вера вал пудо-животъёс, тылобурдоос, нюж кыстӥськыса ветлӥсьёс, чорыгъёс сярысь но.34Вань калыкъёс пӧлысь адямиос, солэн визьлыкез сярысь кылэм вань эксэйёс дорысь адямиос Соломонлэсь визьлыко веранъёссэ кылзыны ветлӥзы.
*а 4:22 мера – еврей кылын кор; ог 220 литр пызь тэрымон сосуд
Глава 4
