Choose Language
Old Testament Books
New Testament Books
1Соломонлэн кияз эксэйлык юнмам бере Соломон Египетлэн эксэеныз – фараонэн – ӵыжы-выжы кусып кылдытӥз: фараонлэсь нылзэ кышно басьтӥз но аслэсьтыз корказэ, Кузё-Инмарлэсь корказэ пуктытозяз, Иерусалим котыре борддор ӝутытозяз, кышнозэ Давидлэн городаз пыртӥз.2Со виын калык гурезь йылъёсын курбонъёс сётылэ на вал, уго Кузё-Инмарлэн нимызлы сӥзем корка пуктэмын ӧй на вал.3Атаезлэсь, Давидлэсь, косонъёссэ быдэсъяса улӥз, Соломон Кузё-Инмарез яратӥз; но со но курбонъёс, ческыт зыно ӵынатонъёс гурезьёс йылын ортчытъяз.
4Эксэй Гаваонэ курбон сётыны мынӥз, отын самой вылӥез курбон сётон инты вал уго. Со курбон сётон интыын Соломон сюрс тылын сутӥськись курбонъёс сётӥз.5Гаваонысен Кузё-Инмар Соломонлы уйин уйвӧтаз возьматскиз, Инмар солы шуиз: «Кур, мар тыныд сётоно».6Соломон шуиз: «Аслад Давид ляльчиедлы, мынам атаелы, Тон бадӟым гажан-жаляндэ возьматӥд; Тынад азяд дун-чылкыт, шекланытэк, чылкыт сюлмын улэмез понна та бадӟым гажан-жаляндэ утид но солы престол вылаз пукон понна пи кузьмад, али озьы ик вань.7Инмаре Кузё-Инмаре, али Тон Аслэсьтыд ляльчидэ атае, Давид, интые эксэе пуктӥд; нош мон, пинал пи, пыронме но, потонме но уг тодӥськы.8Тынад ляльчиед – Тынад быръем калыкед пӧлын, трос лыдъем калык пӧлын, трос луэменыз сое лыдъяны но, ӵотаны но уг луы.9Ас ляльчиедлы визьнодо сюлэм сёт, калыкеныд кивалтыны мед быгатоз, ӟечен уродэз ог-огзылэсь висъяны мед быгатоз; уго кин та трос лыдъем калыкеныд кивалтыны быгатоз?»
10Кузё-Инмарлы яраз, Соломон тае куриз шуыса.11Инмар солы шуиз: «Тае куремысьтыд – кема улон аръёс, аслыд узырлык, тушмонъёсыдлэсь лулзэс курымтэед понна – кивалтыны быгатон понна визьлык куремысьтыд,12тани, мон тынад кылыдъя лэсьто: визьлыко, визьнодо сюлэм тыныд сёто, азьвыл но тыныд укшасез ӧй вал, тон бере но тыныд укшасез уз поты.13Мае тон ӧд куры, сое но Мон тыныд сётӥсько: узырлык, данлык, вань улоно нуналъёсыд ӵоже эксэйёс пӧлын тыныд укшасез уз луы.14Мынам сюрес кузям ветлӥд ке, законъёсме, курон-косонъёсме быдэсъяса улӥд ке, кызьы тынад атаед, Давид, улӥз, тынэсьтыд улоно нуналъёстэ кузято».15Соломон сайказ – та уйвӧтын адӟон вал шуыса валаз. Со Иерусалиме мынӥз но [курбон сётон азе], Кузё-Инмарлэн сӥзён-косонэн ковчегез азе султыса, тылын сутӥськись курбонъёс сётӥз, тупаса улонлы сӥзем курбонъёс сётӥз, вань медооссэ-ужасьёссэ люкаса, сиён-юон дыр ортчытӥз.
16Соку кык калгись нылкышноос, эксэй доры лыктыса, солэн азяз султӥзы.17Одӥгез нылкышно шуиз: «Э, кузёе! Мон та кышномуртэн одӥг коркан улӥськомы; со коркан та кышномурт азьын мон нуны вайи.18Мон нуны ваем бере, куинь нунал ортчыса, та кышномурт но нуны вайиз; ми асьме понна вал, палэнысь мурт ми пӧлын ӧй вал; коркан ми кыкнамы гинэ вал.19Уйин та кышномуртлэн пиез кулӥз, шӧдытэк изьыса ӝокатэм.20Со, уйин султыса, мынэсьтым пиме мон бордысь басьтӥз, мон, тынад ляльчиед, соку изисько вал, пиме гадь бордаз кариз, нош аслэсьтыз кулэм пизэ мынам гадь дорам понӥз.21Ӵукна пиме нонтыны султӥ но, – со кулэмын, нош ӵукна со шоры ӟеч-ӟеч учки но адӟи – со мынам ваем нуные ӧй вал».22Мукетыз кышномурт шуиз: «Озьы ӧвӧл, мынам пие улэп, нош тынадэз кулэмын». Нош таиз шуиз: «Озьы ӧвӧл, тынад пиед кулэмын, нош мынамез улэп». Тазьы таос эксэй азьын веразы.23Соку эксэй шуиз: «Таиз кышномурт шуэ: ”Мынам пие улэп, тынадэз кулэмын”, нош мукетыз кышномурт шуэ: ”Озьы ӧвӧл, тынад пиед кулэмын, нош мынам пие – улэп”».24Эксэй шуиз: «Вае мыным меч». Эксэйлы меч вайизы.25Эксэй шуиз: «Улэп нуныез шори ӵогыса уретэ но одӥг люкетсэ огезлы, мукетсэ – мукетызлы сётэ».26Кышномурт, кудӥзлэн пиез улэп вал, пизэ жаляменыз вань пушкыз-ерыз бугыръяськыса, эксэйлы шуиз: «Э, кузёе! Улэп нуныез та кышномуртлы сётэ, эн вие сое». Нош мукетыз кышномурт шуиз: «Тыныд но, мыным но со медаз луы, ӵоге сое».27Ответ сётыса, эксэй шуиз: «Таизлы улэп нуныез сётэ, со – нунылэн анаез, эн вие».28Быдэс Израиль суд сярысь кылӥз, кызьы но мар кариз эксэй. Эксэйлэсь кышканы кутскизы, уго адӟизы, Инмарлэн визьлыкез суд лэсьтон понна со пушкын улэ шуыса.
Глава 3
