Choose Language
Old Testament Books
New Testament Books
1Давидлэн кулон дырыз вуиз, со Соломон пиезлы сӥзён сётыса шуиз:2«Тани, вань адямиослэн кошкон сюрес вылтӥзы мон но кошкыны кулэ, нош тон юн сямо, кышкасьтэм лу,3Инмаредлэсь Кузё-Инмарлэсь сӥзён-косонзэ уть, Солэн сюрес кузяз ветлыса, Солэсь курон-косонъёссэ утьыса, законъёссэ, пуктон-косонъёссэ быдэсъяса ул, кызьы таос сярысь Моисейлэн законаз гожтэмын, – мар гинэ уд лэсьты, котькытын но, кытчы гинэ уд вазиськы – котькыӵе удысын визьнодо мед луод;4Кузё-Инмар мон сярысь тазьы верам кылзэ мед быдэстоз шуыса: ”Тынад пиосыд улон-вылон сюресъёссэс чакласа-эскерыса улӥзы ке, Мон азьтӥ чылкыт сюлмын, ӧрекчаськытэк, лулзэс-сюлэмзэс поныса ветлӥзы ке, соку Израильлэн эксэй пукон вылысьтыз уз ышы-быры тон бордысь потэм пиосмурт”.5Эшшо: тон тодӥськод, мар мыным лэсьтӥз Саруялэн Иоав пиез, мар кариз со Израиль армилэн кык кивалтӥсьёсыныз – Нирлэн Авенир пиеныз, Иеферлэн Амессай пиеныз, кызьы соосты вииз, кызьы со тупаса улон дыръя ож дыръя кадь вирез кисьтӥз, со вирен ик кускысьтыз езэ, пыдысьтыз кутчанзэ горд кариз.6Визьмын лэсьты – солэсь пурысьтам йырсиоссэ каньылэн дунне пыдэсэ лэзёно медад луы.7Нош Галаадысь Верзеллийлэн пиосызлы ӟеч кар, ӝӧк вылысьтыд сиисьёс пӧлын соос мед луозы, уго Авессалом агаедлэсь пегӟыса улон дыръям соос мон доры лыктӥзы.8Тани эшшо тон дорын Бахуримысь Вениамин выжыысь Гералэн Семей пиез: Маханаиме мыныкум, со монэ туж лекесь кылъёсын куаретӥз; нош со Иордан дорысен мынам пумитам потӥз, соку мон Кузё-Инмарлэн нимыныз кыл сётӥ: мон тонэ мечен ӵогыса уг виы.9Нош тон сое вӧсь карытэк эн кельты, уго тон визьлыко адями, тодӥськод, мар соин карыны солэсь пурысьтам йырсизэ вирен сураса дунне пыдсы вуттон понна».
10Атайёсыз кадь ик Давид кулӥз, Давидлэн городаз сое ватӥзы.11Давид ньыльдон ар ӵоже Израильлэн эксэез вал; сизьым арзэ Хевронын эксэй пуконын пукиз, куамын куинь арзэ эксэй луыса Иерусалимын улӥз.12Соломон Давидлэн, атаезлэн, эксэй пуконаз пуксиз, солэн эксэй кивалтонэз туж юн вал.
13Аггифалэн Адония пиез Соломонлэн анаез Вирсавия доры лыктӥз [но со азе йыбырттӥз]. Вирсавия шуиз: «Ӟеч малпанэн-а тон лыктӥд?» Со шуиз: «Ӟеч малпанэн».14Адония шуиз: «Мынам тыныд верано кылы вань». Вирсавия шуиз: «Вера».15Адония шуиз: «Тон тодӥськод, эксэйлык мон киын вал шуыса, быдэс Израиль мон шоры учкыса улэ вал вуоно эксэй шоры кадь; нош эксэйлык мон киулысь кошкиз, со мынам братэлы сюриз, уго таӵе вал Кузё-Инмарлэн эрикез.16Нош али мон тынэсьтыд одӥгзэ курисько, пумит эн луы». Вирсавия шуиз: «Вера».17Адония шуиз: «Тонэ курисько: Соломон эксэен вераськы, со тыныд пумит уз луы – Сунам карысь Ависагаез со мыным кышнолы мед сётоз».18Вирсавия шуиз: «Ярам, тон сярысь мон эксэйлы верало».
19Вирсавия Соломон эксэй доры Адония сярысь вераны пыриз. Эксэй со азе султӥз, йыбырттӥз но эксэй пукон вылаз пуксиз. Эксэйлэн анаезлы но эксэй пукон пуктӥзы, со Соломонлэн бурпалаз пуксиз но шуиз:20«Мынам тынэсьтыд одӥг пичи гинэ куронэ вань, пумит эн луы вал». Эксэй солы шуиз: «Кур, анае, курондэ быдэстытэк уг кельты».21Вирсавия шуиз: «Адония агаедлы Сунам карысь Ависагаез кышнолы сёт».22Ответ сётыса, Соломон эксэй анаезлы шуиз: «Малы нош Адониялы Сунам карысь Ависагаез куриськод? Солы эксэйлык но кур, со мынам бадӟым агае ук, солы [эш луо] Авиафар священник но Саруялэн Иоав пиез – [ожен кивалтӥсь]».
23Соломон эксэй Кузё-Инмарлэн нимыныз кыл сётыса шуиз: «Тае но, тае но мыным Инмар мед кароз, эшшо тросгес но мед кароз, Адония та кылыз понна виемын ӧз ке луы.24Нош али – улэп Кузё-Инмар – монэ юнматӥсь, атаелэн, Давидлэн, эксэй пукон вылаз пуктӥсь, эксэй юртэз кылдытӥсь, кызьы Со вераз вал, – туннэ ик Адония кулыны кулэ».25Соломон эксэй Иодайлэсь Ванея пизэ ыстӥз, со Адонияез погыртӥз но, соиз кулӥз.
26Нош Авиафар священниклы эксэй шуиз: «Мын Анафофе, аслад бусыяд; тонэ виыны яра, но али мон тонэ уг виы, уго тон мынам атае Давид азьын Дунне Кутӥсь Кузё-Инмарлэсь ковчегзэ нуллӥд, мае атае чидано луиз, тон но чидад».27Соломон Авиафарез Кузё-Инмарлэн священникез луонлэсь мозмытӥз; Кузё-Инмарлэн Сӥломысь Илийлэн выжыез сярысь верамез быдэсмиз.
28Та сярысь ивор Иоав доры вуиз, уго Иоав Адония пала кариськылӥз, Соломон пала ӧз кариськылы, Иоав Кузё-Инмарлэн вӧсяськон скинияяз бызьыса мынӥз но курбон сётон ӝӧклэн сюръёсыз борды кутӥськиз.29Иоав Кузё-Инмарлэн вӧсяськон скинияяз пегӟиз но курбон сётон ӝӧк вӧзы кариськиз шуыса, Соломон эксэйлы ивор вуттӥзы. Соломон Иодайлэсь Ванея пизэ тазьы вераса ыстӥз: «Мын, ви сое, [ват сое]».30Ванея, Кузё-Инмарлэн вӧсяськон скинияяз лыктыса, солы шуиз: «Тазьы шуиз эксэй: ”Пот”». Соиз шуиз: «Уг, мынам татын ик кулэме потэ». Ванея та кылъёсты эксэйлы вераса шуиз: «Иоав тазьы шуиз, тазьы со ответ сётӥз».31Эксэй солы шуиз: «Лэсьты озьы, кызьы со шуиз, ви сое, ват; мон вылысь но, атаелэн выжыез вылысь но Иоавлэсь кисьтэм янгыштэм вирез басьты;32Кузё-Инмар пунэмзэ солэн йыр вылаз мед берыктоз кык янгыштэм, ачиз сярысь умойгес воргоронъёслэсь вирзэс кисьтэм понна: атаелы, Давидлы, ивор сётытэк, мечен вииз со Израиль армилэсь кивалтӥсьсэ – Нирлэсь Авенир пизэ, Иудей армилэсь кивалтӥсьсэ – Иеферлэсь Амессай пизэ.33Соослэн вирзы Иоавлэн йыр вылаз, нылпиосызлэн нылпиоссылэн йыр вылазы пумтэм вапумъёс мед улоз, нош Давидлы, солэн нылпиосызлэн нылпиоссылы, юртэзлы, эксэй пуконэзлы Кузё-Инмар дорысь каньыллык мед лыктоз пумтэм вапумъёс ӵожелы».34Иодайлэн Ванея пиез мынӥз но Иоавез погыртӥз, вииз сое, кыр дуннеысь юртаз со ватэмын вал.35Соломон эксэй Иодайлэсь Ванея пизэ Иоав интые ожгарчиосын кивалтӥсе пуктӥз; [Соломон эксэйлыкен Иерусалимысен кивалтӥз], Садок священникез эксэй Авиафар интые архиерее пуктӥз.
[Кузё-Инмар Соломонлы нодлык, туж бадӟым визьлык, тодон-валан сётӥз – зарезь дурысь луо мында. Соломон нодлыкогес вал шундыӝужан палан улэм вань вашкала адямиослэсь, Египетысь вань визьлыкоослэсь но. Аслыз кышнолы фараонлэсь нылзэ басьтӥз но сое Давидлэн городаз пыртӥз – нырысь ик, Кузё-Инмарлы корка, аслыз корка пуктытозязлы но Иерусалим котыре борддор ӝутытозязлы; сизьым ар куспын пуктӥськонзэ йылпумъяз. Соломонлэн сизьымдон сюрс мурт секыт арбериосты нуллӥсьёсыз вал, тямыстон сюрс из корасьёсыз гурезьёсын улӥзы. Соломон зарезь лэсьтӥз, пыкъетъёс пуктылӥз; бадӟымесь ву возён чанъёс, юбоос пуктылӥз; ыргон зарезь, азбараз ву бызён лэсьтӥз; изкар ӝутӥз, сое юнматӥсь арбериос пуктылӥз, Давидлэсь городзэ люкиз. Соку фараонлэн нылыз Давидлэн городысьтыз ас корказ выжиз, кудзэ Соломон солы шуыса пуктӥз. Соку Соломон город котыре борддор ӝутӥз. Арлы быдэ куинь пол Соломон Кузё-Инмарлы сӥзьыса пуктэм курбон сётон интыын тылын сутӥськись курбонъёс, тупаса улонлы сӥзем курбонъёс вайылӥз, Кузё-Инмар азьын, отын, ческыт зыно ӵындытонъёс ортчытылӥз; корка пуктонзэ йылпумъяз. Соломонлэн ужъёсыныз кивалтыны куинь сюрс куать сю йыръёс пуктэмын вал, соос ужась калыкен кивалтӥзы. Ассур, Магдон, Газер, вылысь Веф-Орон, Ваалаф городъёсты пуктӥз; но та городъёсты со Кузё-Инмарлы корка ӝутэм бераз, Иерусалим котыре борддор ӝутэм бераз пуктӥз. Давид эшшо улэп дыръя Соломонлы таӵе косон сётыса шуиз: «Тани, тон дорын Бахуримысь Иеминилэн Гера пиезлэн Семей пиез; Маханаиме мыныкум, со монэ туж лек кылъёсын куаретӥз, нош со Иордан дорысен мынам пумитам потӥз, но со азьын Кузё-Инмарлэн нимыныз кыл сётыса шуи: ”Мон тонэ мечен уг виы”, нош тон сое, вӧсь карытэк, эн кельты, уго тон визьлыко адями, тодӥськод, мар соин карыны – пурысьтам йырсизэ вирын наштаса дунне пыдэскы пыртон понна».]
36Эксэй Семеез ӧтьыса вайиз но солы шуиз: «Иерусалиме аслыд корка пукты, отын ул, отысь нокытчы но эн пота.37Тод: отысь потон нуналад, Кедрон ӧр вамен выжем берад, одно ик тон кулод; ас вирыд аслад йыр вылад луоз».38Семей эксэйлы шуиз: «Ярам; кузёе, эксэй, кызьы косӥз, озьы ик ляльчиед лэсьтоз». Кема дыр ӵоже Семей Иерусалимын улӥз.39Но куинь ар ортчыса, тазьы луиз: Семейлэн кык ляльчиосыз Гефлэн эксэез, Маахалэн Анхус пиез, доры пегӟизы. Семейлы тазьы шуыса веразы: «Тани, тынад ляльчиосыд Гефын».40Семей султыса ишакез вылэ энер понӥз но Гефе Анхус доры ляльчиоссэ утчаны кошкиз. Семей берытскиз, Гефысь ляльчиоссэ вайиз.41Соломонлы ивор вуттӥзы, Семей Иерусалимысь Гефе ветлыса берытскиз шуыса.42Эксэй Семеез ӧтьытыса вайиз но шуиз: «Кузё-Инмарлэн нимыныз мон тыныд кыл ӧй сёты-а, тазьы шуыса тыныд ӧй вера-а: ”Тод, Иерусалимысь потыса кытчы ке мынӥд, со нуналэ одно ик кулод”? Тон мыным шуид: ”Ярам”.43Кузё-Инмар азьын кыл сётыса косонъёсме малы бен ӧд быдэсты?»44Эксэй Семейлы шуиз: «Тон тодӥськод, сюлмыд но тодэ атаелы, Давидлы, вань урод ужъёс лэсьтэмдэ; тынэсьтыд уродлыктэ Кузё-Инмар йыр вылад мед берыктоз!45Нош Соломон эксэй данлыко мед луоз, Давидлэн эксэй пуконэз но Кузё-Инмар азьын пумтэм вапумъёс ӵоже вырӟылытэк мед сылоз!»46Эксэй Иодайлэн Ванея пиезлы косон сётӥз, со мынӥз но Семеез погыртӥз, со кулӥз.
Глава 2
