Choose Language
Old Testament Books
New Testament Books
1Кузё-Инмар Давидэз вань тушмонъёсызлэн киулысьтызы, Сауллэн киулысьтыз мозмытэм бере, со нуналэ Давид, Кузё-Инмарез данъяса, тазьы кырӟаз:
2«Кузё-Инмар – изгурезе мынам, юнматскон интые,
мозмытӥсе мынам.
3Мынам Инмаре – мынам изгурезе; Со вылэ мон оскиськисько;
щитэ мынам, утиськон сюре, кенере, ватӥськон интые;
Утисе мынам, шугадӟонъёслэсь Тон монэ мозмытӥд!
4Ушъяса Кузё-Инмарлы вазисько но тушмонъёсылэсь утисько.
5Кулонлэн тулкымъёсыз монэ ӟыгыртӥзы,
законлы пумит улонлэн бугырес вуосыз монэ кышкатӥзы.
6Адлэн жильыосыз монэ ӝикатӥзы, кулонлэн сьӧлтэтъёсыз
монэ сьӧлтазы.
7Ӝикаса-ёрмыса улыкум, Кузё-Инмарез вӧсяськыса ӧти,
Инмарелы вазиськи но, Аслаз [святой] юртысеныз Со
куараме кылӥз,
викышъям куарае Солэн пель дораз вуиз.
8Куалекъяз, зурказ музъем,
куалектӥзы, интыысьтызы вырӟизы инъёслэн инъетъёссы,
уго [Кузё-Инмар соослы] вожзэ поттӥз.
9Со вожзэ поттӥз но, ӵын ӝуатӥськиз,
Солэн ымысьтыз сутӥсь-ньылӥсь тыл потӥз;
ӝуась эгыръёс бордысьтыз усьылӥзы.
10Инбамез някыртӥз но васькиз, Солэн пыд улаз пеймытлык,
11херувимъёс вылэ пуксьыса лобӟиз,
тӧллэн бурдъёсыз вылын кошкиз.
12Ин пилемъёслэсь вузэс напчытыса, Ассэ пеймытлыкен шобыртӥз;
13Солэн азяз чилекъямысь тыл эгыръёс гоманы кутскылӥзы.
14Кузё-Инмар инмысен гудыртӥз, Вылысь Инмар куаразэ поттӥз;
15пукыӵ ньӧлъёссэ лэзьыса, соосты пазьгиськытӥз;
чилектӥз но соосты быдтӥз.
16Зарезьлэн ошмес синъёсыз усьтӥськизы,
дуннелэн инъетъёсыз кыре потӥзы,
Кузё-Инмарлэсь кышкыт куаразэ кылыса, вожпотыса шокчем бераз.
17Вылысен Со кизэ мычиз но монэ басьтӥз,
бадӟым вуос пӧлысь монэ поттӥз.
18Кужмо тушмонэлэсь мозмытӥз, мынэсьтым кужмоесьгес,
монэ синазькыль карисьёслэсь Со монэ мозмытӥз.
19Шугадӟон нуналам соос мон вылэ урдскизы,
нош Кузё-Инмар мынам пыкиськон интые вал.
20Со монэ эркын интые поттӥз, мозмытӥз – Со монэ яратэ уго.
21Шонер улэме понна Кузё-Инмар мыным ӟечен берыктӥз,
чылкыт улэме понна Со мыным медзэ-кузьымзэ сётӥз.
22Мон Кузё-Инмарелэн сюресъёсыз вылын сылӥ уго,
Инмаре азьын сьӧлыклэсь кышкатэк ӧй улы,
23Солэн вань курон-косонъёсыз мынам азям уго,
законъёссэ но быдэсъятэк мон ӧй улы.
24Со азьын дун-шектэм улӥ,
медам сьӧлыка шуыса, чакласькыса улӥ.
25Солэн син азяз шонер, чылкыт улэме понна
Кузё-Инмар мыным ӟечлык сётӥз.
26Гажаса-жаляса улӥсьлы гажан-жаляндэ возьматӥськод,
чылкыт сюлэмолы чылкыт мылкыддэ усьтӥськод,
27чылкыт адямилы чылкыт улэмез понна ӟеч кариськод,
кескич адямилы кескич улэмез понна пунэмзэ берыктӥськод.
28Зӥбыт-востэм муртъёсты Тон утиськод,
вылӥ мылкыдоосты шоразы учкыса зӥбломытӥськод.
29Кузё-Инмаре – Тон мынам югыт сётӥсе;
Кузё-Инмар пеймыт улонме югдытэ.
30Тон ке луиськод – армиез пазьгисько;
Инмаре юрттэ ке, борддор йылэ тубисько.
31Инмар! – Дун-Шектэм Солэн сюресэз,
Кузё-Инмарлэн кылыз чылкыт,
ваньмызлы, Солы оскиськисьёслы, Со щит луэ.
32Кузё-Инмар сяна, кин на Инмар,
Инмармы сяна, кин асьмелэн дурбасьтӥсьмы вань на?
33Инмар мыным кужым сётыса, кусме думе,
мыным шонер сюрес дася;
34пыдъёсме пужейлэн кадесь шаплыесь каре,
ӝужыт интыосы монэ султытъя.
35Киосме ожмаськыны дышетэ,
ыргон пукыӵез кадь суйбыгытъёсме золтэ.
36Тон мыным утиськон щитэз сётӥськод,
Тынад гажан-жалянэд монэ вылӥе ӝутэ.
37Пыд улысьтым вамышме кузятӥськод но,
пыдъёсы уг ни куалекъяло.
38Тушмонъёсы сьӧры уйиськыса мынӥсько,
соосты виылӥсько; соосты быдтытэк, уг ни берытскиськы.
39Виылӥсько, погыръясько соосты, уг ни султо, пыд улам усьыло.
40Ожмаськон понна Тон мыным кужым сётыса, кусме думиськод,
мон вылэ урдскисьёсты пыд улам погыртӥськод.
41Тушмонъёсме мышкынызы мон пала берыктӥськод,
соку монэ синазькыль карисьёсты мон виылӥсько.
42Соос юрттэт курыса кесясько, нош утисьсы ӧвӧл,
Кузё-Инмарлы вазисько, нош Со соослэсь уг кылзӥськы.
43Сюй пырыез кадь мон соосты пужнӥсько,
ульчаысь дэриез кадь соосты нелькисько, лёгасько.
44Калыкелэн бугыръяськонэзлэсь Тон монэ мозмытӥд;
мурт выжы калыкъёслы кузё луон понна Тон монэ утид;
тодмотэм калык мыным ужаса-тыршыса улэ.
45Мурт выжы калыкъёс мон азьтӥ чеберъяськыса ветло;
мон сярысь кыло но соку ик мыным тэрытско.
46Мурт выжы калыкъёс юнматэм каръёсазы кӧдэктыса,
дыр-р куалекъяса уло.
47Улэп Кузё-Инмар, бакельлыко мынам Дурбасьтӥсе!
Данъямын мед луоз Инмар, утиськонэлэн изгурезез.
48Мон понна Со пунэмзэ берыктэ, калыкъёсты мынам киулам сётэ,
49тушмонъёсылэсь монэ мозмытэ! Мон вылэ урдскемъёс азьын
Тон монэ вылэ ӝутӥд;
лек адямилэсь Тон монэ мозмытӥд.
50Со понна мон Тонэ, Кузё-Инмаре, мурт выжыос пӧлын данъяло,
Тынэсьтыд нимдэ ушъяса кырӟало,
51Аслэсьтыд эксэйдэ быдӟымлыко утись,
Аслад вӧйын зырӟыса пуктэм Давидэдлы но
солэн нылпиосызлы пумтэм вапумъёс ӵоже
гажан-жаляндэ возьматӥсь!»
Глава 22
