Choose Language
Old Testament Books
New Testament Books
1Иоавлы шуизы: «Тӥни, эксэй бӧрдэ, Авессалом понна викышъя».2Со нуналэ басьтэм вормон вань калык понна бӧрдонлы пӧрмиз, уго со нунал калык кылӥз, эксэй пиез понна куректыса улэ шуыса.3Соку калык городэ ватӥськыса кадь пыриз, кызьы ожмаськон мыныку пегӟыса кошкемъёс возьытэ вуо но лушкемен ветлоно луо.4Нош эксэй ымнырзэ шобыртӥз но бадӟым куараен чигиськыса бӧрдӥз: «Авессалом пие! Авессалом пие, пие мынам!»5Иоав вуиз но эксэй корка пырыса шуиз: «Тон туннэ тынэсьтыд улондэ, пиосыдлэсь, нылъёсыдлэсь улонзэс, кышноосыдлэсь, ляльчи кышноосыдлэсь улонзэ утись медоостэ возьытэ вуттӥд;6тон яратӥськод тонэ адӟемпотостэм карисьёсты, нош кинъёс тонэ ярато, соосты синазькыль кариськод, уго тон туннэ ачид возьматӥд азьветлӥсьёсыд но, медоосыд но тон понна нокыӵе но уг поты; туннэ мон тодӥ: Авессалом улэп кыльысал ке, нош ми ваньмы кулысалмы ке, тыныд со ярамонгес-кельшымонгес луысал.7Озьыен, султыса пот но ляльчиосыдлэн сюлмазы пырымон вера; уго Кузё-Инмарлэн нимыныз кыл сётӥсько, тон ӧд ке поты, та уе тынад одӥг адямиед но уз кыльы; пинал дырысеныд та дырозь тон чидано луэм вань шугадӟонъёслэсь но со тон понна уродгес луоз».8Эксэй султыса капка доры пуксиз, нош вань калыклы шуизы эксэй капка дорын, пе, пуке. Вань калык эксэй доры лыктӥз [капка выжые]; нош израиль пиос асьсэлэн балаганъёсазы бызьыса кошкизы.
9Вань калык, вань Израиль выжыос ченгешыса шуизы: «[Давид] эксэй вань тушмонъёсмылэн кизылэсь милемыз утиз, филистим калыклэн киулысьтыз мозмытӥз, нош та дыръёсы со ас музъемысьтыз, [ас эксэйлыкысьтыз] Авессаломлэсь пегӟыса кошконо луиз.10Нош милям вӧйын зырӟыса асьмелы эксэе пуктэммы, Авессалом, оже быриз; нош али эксэез берыктонын малы ӝегатскиськоды?» [Быдэс Израильлэн та кылъёсыз эксэй доры вуизы.]
11Соку Давид эксэй Садокен Авиафар священникъёслы вераны ыстӥз: «Иуда выжылэн тӧроосызлы вералэ: ”Эксэез ас юртаз берытскыны курисьёс пӧлын малы тӥ пумаз сылӥськоды, куке быдэс Израильлэн верам кылыз эксэй юртэ вуиз ини?12Тӥ, агай-вынъёсы, мынам лыосы, тӥ – мынам лулмугоры; эксэез ас юртаз берыктонын малы тӥ самой бераз кельтӥськиськоды?”13Амессайлы но шуэ: ”Тон – мынам лыэ, мынам лулмугоры ӧвӧл-а? Инмар мыным озьы но озьы мед кароз, эшшо но тросгес мед кароз, тон Иоав интые пырак ӵожелы ожгарчиосылэн кивалтӥсьсы ӧд ке луы!”»14Вань иудей пиослэсь, одӥг муртлэсь кадь, со сюлэмзэс берыктӥз. Соку соос эксэйлы тазьы вераны ыстӥзы: «Берытскы, медоосыд но мед берытскозы».15Эксэй берытскиз но Иордан дуре лыктӥз, нош иудейёс эксэез пумитаны, эксэез Иордан вамен выжытон понна Галгалэ лыктӥзы.
16Бахуримысь Вениамин выжыысь Гералэн Семей пиез дыртыса мынӥз, Давид эксэйлэн пумитаз иудей пиосын ӵош мынӥз.17Соин ӵош Вениамин выжыысь сюрс мурт, Саул юртысь Сӥва медо пи дас вить пиосыныз, кызь ляльчиосыныз ӵош; эксэйлэн син азяз соос Иордан вамен выжизы, [эксэйлы Иордан вамен выжон дасязы].18Эксэйлэсь семьязэ шур вамен поттӥзы но солы служить карыса улӥзы; пыжез сопал дураз поттэм бере, эксэй Иордан вамен потыны дасяськыку, Гералэн Семей пиез эксэй азе [ымныр вылаз] выдӥз.19Со эксэйлы шуиз: «Кузёе, йыруж лэсьтӥсьёс пӧлы эн пырты монэ; эксэе, кузёе, Иерусалимысь потон нуналэ мон, тынад ляльчиед, кыӵе сьӧлыкъёс лэсьтӥ, соосты тодад эн возьы, эксэе, соосты ас сюлмад эн возьы;20ляльчиед тодэ уго, сьӧлыказ шуыса, тани, мон туннэ быдэс Иосиф выжыысь нырысь ик лыктӥ кузёелэн, эксэелэн, пумитаз потон понна».21Саруялэн Авесса пиез шуиз: «Кузё-Инмарлэсь вӧйын зырӟыса пуктэмзэ урод кылъёсын тышкаськемез понна Семей улэп кылёз шат?»22Соку Давид шуиз: «Саруя пиос, тӥляд мон бордын мар ужды? Туннэ тӥ мыным пумитъяськись луиськоды-а? Туннэ Израильысь кинэ ке виёно-а? Уг тодӥськы-а мон, туннэ Израильлэн эксэез луисько шуыса?»23Эксэй Семейлы шуиз: «Тон уд кулы». Со азьын эксэй кыл сётӥз.
24Сауллэн [Ионафан пиезлэн] пиез Мемфивосфей эксэйлэн пумитаз потӥз. Эксэй Иерусалимысь потэм дырысен, каньылэн берытскытозь, со пыдъёссэ ӧз миськы, [гижыоссэ ӧз вандылы], тушез сярысь ӧз сюлмаськы, дӥськутсэ ӧз миськылы.25Иерусалимысь эксэйлэн пумитаз со потэм бере эксэй солы шуиз: «Мемфивосфей, малы тон монэн ӵош ӧд мыны?»26Соиз тазьы ответ сётӥз: «Кузёе, эксэе! Медое монэ ӧрекчаз; уго мон, тынад ляльчиед, шуисько вал: ”Ишакме серметало-энерало но, со вылэ пуксьыса, эксэен ӵош мыно”, уго ляльчиед чут маке.27Нош со кузёе, эксэе, азьын тынад ляльчиед вылэ ӧвӧлтэм кылъёс вераз. Но кузёе мынам, эксэе, Инмарлэн Кылчинэзлы укша; мар тыныд кулэ, сое лэсьты.28Кузёе, эксэе, азьын атаелэн быдэс выжыез виыны ярамон ке но вал, нош тон монэ, ляльчидэ, ӝӧк сьӧрад сиськисьёс вискы пуктӥд; эксэй азьын урттылӥськыны быгатӥсько на-а?»29Эксэй солы шуиз: «Малы тон тае ваньзэ вераськод? Мон верай, тон но, Сӥва но бусыосты куспады мед люкоды шуыса».30Нош Мемфивосфей эксэйлы ответ сётыса шуиз: «Кузёе, эксэе, каньылэн гуртаз бертӥз бере, со ваньзэ мед басьтоз».
31Галаад пи Верзеллий Роглимысь лыктӥз но эксэен ӵош Иордан вамен выжиз сое Иордан шур сьӧры келян понна.32Нош Верзеллий туж мӧйы вал ини, ог тямыстон арес котырын. Давид Маханаимын улыку, солы со сиён нуллэ вал, уго со узыр адями вал.33Соку эксэй Верзеллийлы шуиз: «Мон сьӧры мын, мон тонэ Иерусалимын сиёнэн тыр каро».34Нош Верзеллий эксэйлы шуиз: «Иерусалиме эксэен ӵош мынон понна кема-а мыным улыны кылемын на?35Али мыным тямыстон арес; ӟечсэ уродлэсь висъяны быгато на-а? Сием сиёнэлэсь, юэм юонэлэсь шӧмзэ тодыны быгатоз на-а ляльчиед? Кырӟась пиослэсь, кырӟась нылъёслэсь куаразэс кылыны быгато на-а? Кузёелы, эксэелы, тынад ляльчиед секыт ныпъет интыын малы луыны кулэ?36Эксэен ӵош ляльчиед Иордан сьӧры кӧня ке но мыноз на; мар понна нош эксэй мыным табыдӟа гажан-жалянзэ кузьманы кулэ?37Ляльчидэ ас городаз атаелэн, анаелэн шайгу доразы кулон понна бертыны лэзь. Нош ляльчиед, [мынам пие], Кимгам, кузёеным, эксэен, ӵош мед мыноз, соин мар каремед потэ, сое ик кар».38Эксэй шуиз: «Кимгам монэн ӵош мед мыноз; мар тыныд кулэ, сое мон солы лэсьто; мае тон кулэ кариськод, ваньзэ мон тон понна лэсьто».39Вань калык Иордан вамен выжиз, эксэй но. Эксэй Верзеллиез чупаз, бакель кариз, собере со ас интыяз берытскиз.40Эксэй Галгалэ мыныны потӥз, Кимгам но соин ӵош ик кошкиз; вань иудей калык, израиль калык пӧлысь но ог ӝыны люкетэз эксэез келяны лыктӥз.
41Но тани, израиль пиос Давид эксэй доры лыктыса, солы шуизы: «Малы милям агай-вынъёсмы, иудей воргоронъёс, тонэ, эксэез, лушказы, тынэсьтыд семьядэ но, вань адямиостэ но тонэн ӵош Иордан пыр келязы?»42Вань иудей воргоронъёс, ответ сётыса, израиль калыклы шуизы: «Соин: эксэй – со милям матысь ӵыжы-выжымы; та пумысен малы тӥ вождэс поттыса улыны кулэ? Ми эксэйлэн ӝӧк вылысьтыз марзэ ке сиыса улӥмы шат, оло нош солэсь кыӵе ке но кузьымзэ басьтӥмы? [Оло нош со милемыз выт тыронлэсь мозмытӥз?]»43Израиль калык иудей воргоронъёслы ответ сётыса шуиз: «Ми эксэйлэн дас люкетэз, озьы ик Давид бордын но тӥ сярысь ми вылӥгес; [тӥ ӧвӧл, ми вашкалагес выжы]. Мар малпаса тӥ милемыз ултӥяды? Асьмелэсь эксэймес берыктон понна нырысь ик ми кылмес ӧм вералэ-а?» Нош иудей воргоронъёслэн верам кылзы кужмогес вал, израиль пиослэн верам кылзы сярысь.
Глава 19
