Choose Language
Old Testament Books
New Testament Books
1Ас бӧрсяз ветлӥсь калыкез Давид чаклаз-эскериз но соослы сюрс муртэн, сю муртэн кивалтӥсьёсты пуктӥз.2Давид адямиоссэ ыстӥз – куинетӥ люкетсэ Иоавлэн кивалтэм улсаз, куинетӥ люкетсэ – Иоавлэн братэзлэн Саруялэн Авесса пиезлэн кивалтэм улсаз, куинетӥ люкетсэ – Гефысь Еффейлэн кивалтэм улсаз. Эксэй калыклы шуиз: «Мон ачим тӥледын ӵош мыно».3Калык солэн пумитаз тазьы шуиз: «Эн ветлы, пегӟимы ке но, та шоры уз учке; ми пӧлысь ӝыныез кулӥз ке но, тае уз синйылтэ; нош тон – милям дас сюрс луэменымы ӵошаськод; милемлы умойгес, городысен милемлы юрттыса улӥд ке».4Эксэй соослы шуиз: «Кызьы тӥледлы умойгес, озьы ик лэсьто». Соку эксэй кар капка азе султӥз, нош калык, сю муртэн, сюрс муртэн огазе кариськыса, городысь потӥз.5Эксэй Иоавлы, Авессалы, Еффейлы тазьы шуыса косон сётӥз: «Мыным Авессалом пияшез уте». Вань калык кылӥз эксэйлэсь Авессалом пумысен кивалтӥсьёслы косон сётэмзэ.
6Калык бусые израиль пиослы пумит ожмаськыны потӥз, Ефрем нюлэскын ожмаськон ортчиз.7Давидлэн ляльчиосыз израиль калыкез погыртӥзы; туж трос калык быдтэмын вал со нуналэ – кызь сюрс адями виемын вал.8Быдэсаз со шаерын ожмаськон мынӥз, со нуналэ нюлэскын тросгес адями быриз, ож бусыын меч улын быремъёс сярысь.
9Авессалом Давидлэн ляльчиосыныз пумиськиз; со мул вылын мынэ вал. Соин валче мул бадӟым тыпылэн вайёсыз пушкы ворттыса пыриз, соку Авессаломлэн йырсиосыз тыпылэн вайёсыз борды думылӥськизы, со инэн музъем вискын ошиськыса улӥз, нош солэн улысьтыз мул ворттыса кошкиз.10Тае кин ке но адӟыса, Иоавлы ивор вуттӥз: «Тани, тыпыын ошиськыса улӥсь Авессаломез мон адӟи».11Ивор вуттӥсь муртлы Иоав шуиз: «Тани, тон сое адӟид, нош малы тон сое музъем вылэ ӧд уськыты? Соку мон тыныд дас азвесь сӥкль, одӥг кускерттон сётысал».12Со мурт Иоавлы ответ сётыса шуиз: «Мынам ки вылам сюрс сӥкль азвесь ке но понысалзы, соку но мон эксэй пи вылэ киме ӧй ӝутысал, уго эксэй шара вераз тыныд но, Авессалы но, Еффейлы но: ”Авессалом пиме уте”.13Аслам улонэлы кышкытлык кылдытыса, мон мукет сямен лэсьтысал ке, со эксэйлэсь ватӥськыса ӧй кыльысал, тон ик мон вылэ урдскысалыд».14Иоав шуиз: «Ӝегатӥськыса уг улы тон котырын». Куинь пукыӵ ньӧл кутӥз но тыпы бордын ошиськыса улӥсь Авессаломлэн сюлмаз соосты мертчытӥз, соку со улэп на вал.15Иоавлэн ожмаськон тӥрлык нуллӥсьёсыз, дас егит пиос Авессаломез котыртӥзы но погыртӥзы, виизы.
16Иоав гумыеныз пелляны кутскиз, соку израиль калык сьӧрын уйылӥськыса ветлӥсьёс берытскизы, уго Иоавлы калык жаль потӥз.17Авессаломез кутӥзы но нюлэскысь мур гуэ куштӥзы, вылаз из куяса бадӟым из люк пӧрмытӥзы. Вань израиль пиос пазьгиськизы, котькудӥз ас дораз бызьыса кошкиз.
18Авессалом эшшо улэп дыръяз эксэй нёжалэ аслыз памятник пуктӥз, уго со шуиз вал: «Мынэсьтым нимме буре ваён понна мынам пие ӧвӧл». Со памятниклы аслэсьтыз нимзэ сётӥз, солэн нимыз – ”Авессаломлэн памятникез” – улэ туннэ нуналозь.
19Ахимаас, Садоклэн пиез, Иоавлы шуиз: «Бызьыса мыно, эксэйлы иворто: ”Кузё-Инмар Аслаз судэныз сое тушмонъёсызлэн киулысьтызы мозмытӥз”».20Нош Иоав солы шуиз: «Туннэ тон ӟеч ивор вайись уд луы; туннэ эн, мукетаз нуналэ ивортод, уго туннэ эксэйлэн пиез кулӥз».21Соку Иоав Хусийлы шуиз: «Мын, эксэйлы иворты, мар тон адӟид». Хусий Иоавлы йыбырттӥз но бызьыса кошкиз.22Нош Ахимаас, Садоклэн пиез, ас кыл вылаз сылыса, Иоавлы шуиз: «Котьмар мед луоз, но мон но Хусий сьӧры бызё». Но Иоав шуиз: «Пие, малы тон бызьыса мыныны кулэ? Ӟеч ивор тон уд вайы».23[Соку Ахимаас шуиз:] «Котьмар мед луоз, но мон мыно». [Иоав] солы шуиз: «Мын». Ахимаас шонер сюрес кузя бызьыса мынӥз но Хусийлэн азьпалаз потӥз.
24Со виын Давид кык капкаос вискын пуке вал. Возьмаськись кар капка липет йылэ тубиз но синзэ ӝутыса учкем бераз адӟиз: кыӵе ке но адями бызьыса лыктэ.25Возьмаськись кеськыса эксэйлы ивортӥз. Эксэй шуиз: «Огназ ке, соку солэн иворез ымаз». Нош со мурт матэгес но матэгес вуэ ини.26Возьмаськись мукетсэ но бызьыса лыктӥсез адӟиз; возьмаськись капка возьмасьлы кеськыса шуиз: «Тӥни, эшшо одӥг адями бызьыса лыктэ». Эксэй шуиз: «Та но ивор вайись».27Возьмаськись шуиз: «Нырысь лыктӥсьлэсь вамышъямзэ адӟисько, солэн вамышъямез Садоклэн Ахимаас пиезлы укша». Эксэй шуиз: «Та ӟеч адями, со ӟеч иворен лыктэ».28Ахимаас черектӥськыса эксэйлы шуиз: «Каньыллык». Эксэй азе пыдесъяськыса, музъем бордозь йыбырттыса шуиз: «Данлыко тынад Инмаред Кузё-Инмар! Кузёе, эксэе, вылэ кизэс ӝутӥсьёсты Со кулэтэм кариз!»29Эксэй шуиз: «Ӟеч-а улэ Авессалом пие?» Ахимаас шуиз: «Бадӟым бугыръяськонэз мон адӟи, эксэйлэн Иоав ляльчиез тынэсьтыд ляльчидэ ыстыкуз; но мон уг тодӥськы, мар [отын] вал».30Эксэй шуиз: «Палэнскы, султы татчы». Со палэнэ мыныса султӥз.31Тани, Хусий но вуиз [со бӧрсьы ик]. Хусий [эксэйлы] шуиз: «Ӟеч ивор вайи мон тыныд, кузёе, эксэе! Туннэ Кузё-Инмар тыныд пумит вань урдскемъёслэн киулысьтызы тонэ мозмытӥз, озьы Со возьматӥз тыныд дурбасьтэмзэ».32Эксэй Хусийлы шуиз: «Ӟеч-а улэ Авессалом пие?» Соку Хусий шуиз: «Мар луиз егит пиосмуртлы, озьы ик мед луоз кузёелэн, эксэелэн, тушмонъёсызлы, тыныд пумит вань урод малпасьёслы!»33Эксэй ӝоже усьыса, капка йылысь бадӟым комнатае бӧрдыса тубиз, со тазьы шуыса бӧрдӥз: «Авессалом пие! Пие мынам, Авессалом пие! Э, кин ке но тон интые кулыны мыным эзель сётысал ке, Авессалом пие, пие мынам!»
Глава 18
