Choose Language
Old Testament Books
New Testament Books
1Та бере тазьы луиз: Давидлэн Авессалом пиезлэн чебер сузэрез вал, Фамарь нимо, сое Давидлэн Амнон пиез яратӥз.2Фамарь сузэрез понна со сокем ӝожомыса улӥз – висьыны кутскиз; уго со нылмурт вал, соин маке лэсьтыны секыт луоз шуыса малпаз Амнон.3Но Амнонлэн Ионадав нимо эшез вал, со Давидлэн Самай агаезлэн пиез вал; Ионадав кескич-амало адями.4Со солы шуиз: «Эксэй пи, малы тон нуналысь нуналэ начармиськод, – уд вера-а мыным?» Амнон солы шуиз: «Авессалом вынылэн Фамарь сузэрезлы мон синмаськи».5Ионадав солы шуиз: «Валесад выд но висись мурт кадь аналтӥськы; атаед тонэ чакланы лыктӥз ке, солы шу: ”Фамарь сузэре, мон доры лыктыса, мед сюдоз, мынам син азям сиён мед дасялоз, мон сое мед адӟом, солэн киысьтыз сиыны мед быгатом”».
6Амнон выдӥз, висись мурт кадь аналскиз, эксэй сое чакланы пыриз; соку Амнон эксэйлы шуиз: «Фамарь сузэре, татчы лыктыса, мынам син азям одӥг яке кык уднянь мед пыжоз, мон солэн киысьтыз сиё».7Фамарьлэн дораз солы тазьы вераны Давид адямизэ ыстӥз: «Амнон агаедлэн корказ мын, солы сиён дася».8Со Амнон агаезлэн корказ мынӥз, нош со валесын кылле. Фамарь пызь басьтыса вуэн сураз но Амнонлэн син азяз уднянь пыжиз,9табазэ кутӥз но отысь удняньзэ солэн азяз тыриз; Амнонлэн сиемез ӧз поты. Соку Амнон шуиз: «Вань адямиос мон дорысь мед потозы». Солэн коркасьтыз вань калык потӥз.10Соку Амнон Фамарьлы шуиз: «Сиёнэз пыдлось комнатае ну, отысен тынад киысьтыд сиё». Фамарь, пыжем удняньёсты басьтыса, пыдлось комнатае Амнон агаезлы нуиз.11Фамарь сиёнзэ со мед сиёз шуыса азяз пуктэм бере Амнон сое кутыса шуиз: «Ойдо, монэн артэ выд, сузэре».12Но Фамарь шуиз: «Уг яра, братэ, монэ эн сантэма, уго Израильын тазьы уг лэсьто; та укылтэм ужез эн лэсьты.13Данлыкме ыштэм бере кытчы мон мыном? Израильысь вань укылтэмъёс пӧлысь самой укылтэмез тон луод. Тон эксэен вераськы; со пумит уз луы монэ тыныд сётыны».14Нош Амнонлэн верамзэ кылэмез но ӧз поты, вормиз сое, сантэмаз, соин артэ кыллиз.
15Та бере Амнон Фамарез туж адӟемпотостэм кариз, сое адӟемпотостэм каронэз сое азьвыл яратонэзлэсь кужмогес луиз; Амнон Фамарьлы шуиз: «Султы, кошкы мон дорысь».16[Фамарь] солы шуиз: «Эн улля, [братэ]; монэ улляд ке, монэн тон мар лэсьтӥд, со солэсь но уродгес уж луоз». Амнонлэн солэсь верамзэ кылэмез но ӧз поты.17Аслыз ужаса-тыршыса улӥсь пинал пиез ӧтьыса, солы шуиз: «Та муртэз мон дорысь улляса лэзь, со бӧрсьы ӧсэз пытса».18Со ныл пӧртэм буёло дӥськутэн дӥсяськемын вал, сыӵе выл дӥськутэз нуллӥзы бызьымтэ эксэй нылъёс. Медо со нылэз поттыса лэзиз но ӧсэз пытсаз.19Фамарь йыр вылаз пень пызьназ, вылысьтыз пӧртэм буёло дӥсянзэ кесяз, киосыныз йыр бордаз кутӥськыса вузыса мынӥз.20Авессалом агаез солы шуиз: «Амнон агаед тонэн огазьын вал-а? Нош али шып кариськы, сузэре; со – тынад агаед; та уж пумысен чигиськыса, бӧрдыса эн улы». Авессалом агаезлэн юртаз Фамарь огназ улӥз.
21Та уж сярысь Давид ваньзэ тодэм бере солэн туж вожез потӥз [но Амнон пиезлэсь лулзэ ӝоже ӧз уськыты, уго со аслэсьтыз нырысь вордӥськем пизэ туж яратэ вал].22Нош Авессалом Амнонэн ӟечен но, уродэн но ӧз вераськы; уго Авессалом Амнонэз Фамарь сузэрзэ сантэмамез понна кӧтвеськантэм кариз.
23Кык ар ортчыса, Ефрем музъем вӧзысь Ваал-Гацорын Авессалом ыжъёссэ ӵышкиз, отчы эксэйлэсь вань пиоссэ ӧтиз.24Авессалом эксэй доры лыктыса шуиз: «Тани, туннэ ляльчиедлэн дораз ыж ӵышке; эксэй аслаз медоосыныз, ляльчиеныд ӵош мед мыноз».25Нош эксэй Авессаломлы шуиз: «Ум, пие, ваньмы ӵош ум мынэ, тыныд секыт медаз луы». Нош Авессалом туж-туж куриз сое; но солэн аслаз отчы мынэмез ӧз поты, но бакель кариз.26Авессалом солы шуиз: «Соку милемын ӵош Амнон братэ ке но мед мыноз». Эксэй солы шуиз: «Малы со тонэн ӵош мыныны кулэ?»27Авессалом сюлворыса курем бере, соин ӵош Амнонэз но, вань эксэй пиосты но мыныны лэзиз. [Соку Авессалом кызьы эксэй юондыр ортчытэ, сыӵе ик юондыр ортчытӥз.]28Авессалом егит пиосызлы, тазьы вераса, косон сётӥз: «Чаклаське, вина юыса, Амнонлэн сюлмыз шулдырмиз ке, мон тӥледлы шуо: ”Амнонэз погыртэ”, соку тӥ сое вие, эн кышкалэ; та ужез лэсьтыны мон косӥсько, сэзь кариське, эн кышкалэ».29Авессаломлэн егит пиосыз Амнонлы озьы лэсьтӥзы, кызьы соосты Авессалом косӥз. Соку вань эксэй пиос султыса ишакъёссы вылэ пуксизы но ворттыса кошкизы.
30Соос сюрес вылын на вал, Давид доры таӵе ивор вуттӥзы: Авессалом вань эксэй пиосты виылӥз, одӥгез но улэп ӧз кыльы.31Эксэй султӥз но дӥськутсэ ӵажак кесяз, музъем вылэ выдӥз; соин ӵош сылӥсь вань медоосыз но дӥськутсэс кесязы.32Давидлэн Самай агаезлэн Ионадав пиез шуиз: «Кузёе [эксэй] медаз малпа, вань егит пиосты, эксэй пиосты, виизы шуыса; одӥг Амнон гинэ кулӥз, уго Амнон солэсь сузэрзэ сантэмам нуналысен та дырозь Авессалом сыӵе малпанэн улӥз.33Озьыен, мынам кузёе эксэй куректыса-кайгырыса медаз улы, вань эксэй пиос кулӥзы шуыса: Амнон гинэ кулӥз».
34Авессалом пегӟиз. Возьмаськыса сылӥсь егит пи синзэ ӝутыса учкиз но адӟиз: гурезь бамалтӥ трос калык мынэ. [Возьмаськись лыктыса эксэйлы вераз: «Гурезь бамалысь, Оронэ мынӥсь сюрес вылысь, мон трос калыкез адӟи».]35Соку Ионадав эксэйлы шуиз: «Со эксэй пиос мыно; кызьы ляльчиед вераз, озьы ик вань».36Тазьы гинэ вераса вуиз, эксэй пиос татчы вуизы но черекъяса бӧрдыны кутскизы. Ачиз эксэй но, солэн вань медоосыз но туж-туж чигиськыса бӧрдӥзы.
37Авессалом Гессур эксэй доры пегӟиз, [Хамаахад музъеме], Емиудлэн Фалмай пиез доры. Нуналлы быдэ Давид [эксэй] пиез понна бӧрдыса улӥз.38Авессалом пегӟыса Гессуре вуиз, отын куинь ар улӥз.39Давид эксэй Авессалом сьӧрын уйиськыса ӧз ни ветлы, уго Амнон кулэм пумысен солэн сюлмыз буйгаз.
Глава 13
