Choose Language
Old Testament Books
New Testament Books
1Саруялэн Иоав пиез шӧдӥз, эксэйлэн сюлмыз Авессалом пала кариськиз шуыса.2Иоав медозэ Фекояе ыстӥз но, отысь визьмо кышномуртэз ваем бере, солы шуиз: «Бӧрдэм улэ аналскы, кӧтӝожен улӥсьлэн кадь дӥськут дӥся, вӧйын эн зыраськы, кулэм мурт понна трос нуналъёс ӵоже бӧрдыса улӥсь кышномуртлы астэ укшась кар;3эксэй доры мын, ”озьы но озьы вал” шу». Иоав солы кыӵе кылъёс вераны кулэ дышетӥз.
4Фекояын улӥсь кышномурт, эксэй доры лыктыса, ымнырыныз музъем вылэ выдӥз, йыбырттыса шуиз: «Юртты, эксэй, [юртты]!»5Эксэй солы шуиз: «Мар тыныд кулэ?» Со кышномурт шуиз: «Мон [кемаласен ини] палкышно, картэ кулӥз.6Ляльчи кышноедлэн кык пиосыз вал; бусыысен соос куспазы ченгешон поттӥллям, соосты люкыны ке, отын нокин но ӧй вал, одӥгез огзэ вииз.7Вань выжы-кумыос ляльчи кышноед вылэ урдскизы: ”Братсэ виисез вай ми кие; вием братэзлэн лулыз понна ми сое виёмы, люкет басьтоно пиез быдтомы”. Музъем вылысь картэлэсь нимзэ, выжызэ быдтон понна кылем тылгизьыме кысозы».
8Эксэй кышномуртлы шуиз: «Каньылэн берт дорад, тон пумысен мон косон сёто».9Нош Фекояысь кышномурт эксэйлы шуиз: «Мон вылын, атаелэн выжыез вылын, кузёе эксэй, янгыш мед улоз, нош эксэй но, солэн престолэз но янгыш ӧвӧл».10Соку эксэй шуиз: «Кин тыныд пумит мынӥз, сое мон доры вай, азьланяз со тонэ уз ни йӧтылы».11Кышномурт шуиз: «Инмардэ Кузё-Инмарез, эксэй, буре вай, вир понна пунэм берыктӥсьёс медаз ни йылэ, пиме медаз вие». Эксэй шуиз: «Улэп Кузё-Инмар! Пиедлэн йырсиез но музъем вылэ уз усьы».12Соин кышномурт шуиз: «Кузёелы, эксэйлы, пал кыл вераны ляльчидэ лэзь на».13Со шуэ: «Вера». Кышномурт шуиз: «Инмар калыклы пумит сыӵе малпанэн малы тон улӥськод? Та кылъёсыз верась эксэй ассэ ачиз янгыше уськытӥз, малы ке шуоно уллям муртсэ уг берыкты.14Ми куломы но сюй вылэ кисьтыса огазе люканы луонтэм ву кадь луомы; нош Инмарлэн лулэз быдтэмез уг поты, Со малпа: кызьы меда палэнтэм муртэз Ас бордысьтыз палэнтытэк кельтыны?15Нош али мон лыктӥ эксэйлы, кузёелы, та кылъёсты вераны, малы ке шуоно калык монэ кышкатэ. Ляльчи кышномуртэд шуиз: ”Эксэен вераськыса утчало, ляльчи кышномуртэзлэн верамезъя уз-а меда лэсьты;16эксэй монэ кылзоз но ляльчи кышномуртсэ, монэ, Инмарлэн люкетысьтыз мынам пиеным валче виыны малпасьёслэсь мозмытоз”.17Ляльчи кышномуртэд шуиз: ”Эксэйлэн, кузёелэн, верам кылыз монэ мед буйгатоз, Инмарлэн Кылчинэз мактал, кузёе, эксэй, ӟечсэ но, уродзэ но валаны быгатоз”. Инмаред Кузё-Инмар тонэн валче луоз».
18Эксэй, ответ сётыса, кышномуртлы шуиз: «Мар ке сярысь тынэсьтыд юай ке, эн ваты». Кышномурт шуиз: «Вера, эксэй, кузёе».19Соку эксэй шуиз: «Вань та ужъёсын Иоав уг кивалты-а?» Кышномурт ответ сётыса шуиз: «Кема мед улод, эксэй, кузёе мынам; эксэйлэн, кузёелэн, верам сьӧраз бурпала но, паллян пала но кожыны уг яра; шонер, Иоав ляльчиед та косонэз сётӥз, ваньзэ та кылъёсты ляльчи кышноедлэн кыл вылаз со сётӥз.20Иоав ляльчиед монэ дышетӥз мадён пыр та ужлы таӵе тусбуй сётыны; нош мынам кузёе, [эксэй], Инмарлэн Кылчинэз кадь ик визьмо, со тодэ ваньзэ, мар вань музъем вылын».
21Эксэй Иоавлы шуиз: «Тани, мон [тынад кылыдъя] лэсьтӥ; мын, егит пиез, Авессаломез, берыкты».22Соку Иоав музъем вылэ пыдесъяськыса йыбырттӥз, эксэез данъяса шуиз: «Табере ляльчиед тодэ ни, кузёе, эксэй, аслэсьтыд гажан-жаляндэ солы возьматӥд шуыса, уго эксэй ас ляльчиезлэн верам кылызъя лэсьтӥд».23Иоав султыса Гессуре кошкиз, отысь Авессаломез Иерусалиме вайиз.24Эксэй шуиз: «Со ас дораз мед бертоз, нош ымнырме уз адӟы». Соку Авессалом дораз бертӥз, нош эксэйлэсь ымнырзэ ӧз адӟы.
25Быдэс Израильын Авессалом кадь чебер но ушъямон пиосмурт ӧй вал; пыдтышкысеныз йырйылозяз солэн шекез ӧй вал.26Йырзэ ӵышкыкуз, нош со арлы быдэ ӵышкиськылӥз, малы ке шуоно солы со секыт луылӥз, йырысьтыз йырсиез эксэй весэн мертаса кык сю сӥкль кыске вал.27Авессаломлэн куинь пиез но одӥг Фамарь нимо нылыз вордӥськизы; со чебер кышномурт вал, [со Соломонлэн Ровоам пиезлы кышно луиз, солы Авия пи вайиз].
28Авессалом Иерусалимын кык ар улытозяз, эксэйлэсь ымнырзэ ӧз адӟы.29Эксэй доры ыстон понна Авессалом Иоавез вайыны ыстӥз, нош соизлэн лыктэмез ӧз поты. Мукетъят но ыстылӥз, нош соизлэн лыктэмез ӧз поты.30[Авессалом] медоосызлы шуиз: «Адӟиськоды-а, мынамен артэ Иоавлэн гырон-кизён удысэз, отчы солэн йыдыез киземын; мынэлэ, сое тылын сутэ». Авессаломлэн медоосыз со удысэз тылын сутӥзы. [Иоавлэн медоосыз со доры дӥськутсэс кесяса лыктӥзы но шуизы: «Авессаломлэн медоосыз удыстэ тылын сутӥзы».]31Султыса Иоав Авессаломлэн корказ лыктӥз но шуиз: «Малы тынад медоосыд удысме тылын сутӥзы?»32Соку Авессалом Иоавлы шуиз: «Тани, мон тон доры тазьы вераны ыстӥ: лыкты татчы, мон тонэ эксэй доры тазьы вераны ысто: ”Малы мон Гессурысь лыктӥ? Эсьмаса мыным отын ик улоно вал. Мынам эксэйлэсь ымнырзэ адӟеме потэ. Мон янгыш ке, ви монэ”».
33Соку Иоав эксэй доры мынӥз но ваньзэ вераз. Эксэй Авессаломез дораз ӧтиз. Со, эксэй доры лыктыса, пыдесъяськыса йыбырттӥз. Соку эксэй Авессаломез чупаз.
Глава 14
