Choose Language
Old Testament Books
New Testament Books
1Ар ортчыса, эксэйёс ож сюрес вылэ потон дыръёсы, Давид Иоавез но аслэсьтыз медооссэ, вань израиль пиосты соин ӵош ыстӥз; соос аммон ожгарчиосты погыртӥзы, Равва карез котыртӥзы; нош Давид Иерусалиме кылиз.
2Одӥг пол ӝытазе Давид, валесысьтыз султыса, эксэй юртлэн липет вылтӥз лёгаськыса ветлэ вал, соку со пыласькись кышномуртэз адӟиз; со туж чебер кышномурт вал.3Давид та кышномуртлэсь кин луэмзэ тодыны ыстӥз. Солы шуизы: «Со Елиамлэн Вирсавия нылыз, хеттей выжыысь Уриялэн кышноез».4Сое киултыны Давид медооссэ ыстӥз; со кышномурт Давид доры лыктӥз но, со соин изиз. Кырсезлэсь сузяськем бераз ас дораз бертӥз.
5Со кышномурт секытэн луиз, Давидлы ивор лэзиз: «Мон нуны ваёно».6Давид Иоавлы ивортыны лэзиз: «Хеттей пи Урияез мон доры ысты». Иоав Урияез Давид доры ыстӥз.7Урия со доры лыктӥз, Давид солэсь юаз, кызьы улэ Иоав, кызьы улэ калык, кызьы мынэ ожаськон.8Давид Уриялы шуиз: «Дорад бертыса, пыддэ миськы». Урия эксэй юртысь потӥз, нош со бӧрсьы эксэй сиён нуизы.9Нош Урия эксэй коркалэн ӟезьы вӧзаз ас кузёезлэн медоосыныз ӵош изиз, ас дораз ӧз берты.
10Давид доры ивор вуттыса, тазьы шуизы: «Урия дораз ӧз берты». Давид Уриялы шуиз: «Тани, тон сюрес вылысь вуид; малы нош дорад ӧд берты?»11Урия Давидлы шуиз: «[Инмарлэн] ковчегез, Израиль но, Иуда но балаганъёсын уло, Иоав кузёе, кузёелэн ляльчиосыз но бусыын уло, но мон, пе, сиыны, юыны, кышноеным изьыны коркам пыри! Тынад улонэныд, тынад улонэдлэн лулыныз кыл сётӥсько: тазьы мон уг лэсьты».12Давид Уриялы шуиз: «Та нуналэ но татчы ик кыль, нош ӵуказе тонэ кошкыны лэзё». Та нуналэ ӵуказе нуналозьлы Урия Иерусалиме кылиз.13Давид сое дораз ӧтиз, Урия со азьын сииз, юиз, Давид сое кудӟытозяз сектаз. Нош ӝыт Урия аслаз валесаз кузёезлэн медоосыныз огазьын изьыны кошкиз, ас дораз ӧз берты.
14Ӵукна Давид Иоавлы гожтэт гожтӥз, Урия бӧрсьы сое келяз.15Гожтэтаз таӵе кылъёс гожтӥз: «Урияез султытэ самой кужмо ожмаськон интые, нош асьтэос со котырысь палэнске, сое мед погыртозы, мед виёзы».16Иоав городэз котыртыку, Урияез пуктӥз кышкасьтэмъёслэн сылон интыязы, та инты сярысь со азьвыл ик тодэ вал.17Городысь калык потӥз но Иоавен ожмаськыны кутскиз, калык пӧлысь, Давидлэн медоосыз пӧлысь кӧня ке но мурт виемын вал; хеттей пи Урия но виемын вал.
18Ожмаськонлэн мынэмез сярысь Иоав Давидлы ивор вераны ыстӥз.19Ыстэм муртлы тазьы вераны косӥз: «Ожмаськонлэн кызьы мынэмез сярысь эксэйлы верад ке,20адӟид ке, эксэй вожзэ поттэ шуыса, со тазьы шуиз ке: ”Малы тӥ ожмаськыны городлэн сокем матаз мынӥды? Тӥ ӧд тодэ шат, кар борддор вылысен тӥ вылэ оломар но куялозы шуыса?21Иеровааллэсь Авимелех пизэ кин вииз? Кышномурт со вылэ борддор йылысен кикӧлэсь люкетсэ куштыса ӧз-а виы? Со Тевецын кулӥз. Малы бен тӥ борддорлэн сокем матаз мынӥды?” Соку тон вера: ”Тынад ляльчиед но, хеттей пи Урия, виемын”».
22[Иоавлэн ыстэм муртэз Иерусалиме эксэй доры] мынӥз; отчы вуэм бераз Давидлы ваньзэ вераз, мар понна сое Иоав ыстӥз, ожмаськонлэн мынэмез сярысь ваньзэ пыр-поч вераз. [Давидлэн Иоавлы туж вожез потӥз, ыстэм муртлы со шуиз: «Малы тӥ городлэн матаз мынӥды ожмаськыны? Тӥ ӧд тодэ шат, кар борддор йылысен тӥледыз виылозы шуыса? Кин вииз Иеровааллэсь Авимелех пизэ? Кышномурт ӧз кушты-а со вылэ борддор йылысен кикӧлэсь люкетсэ но, Тевецын со кулӥз? Малы тӥ борддорлэн матаз мынӥды?»]23Соку ыстэм мурт Давидлы шуиз: «Со адямиос вормо вал ини милемыз, соос бусые, ми доры, потӥзы, соку ми соос сьӧры уйиськыса капкатӥ пырон дорозь мынӥмы.24Соку пукыӵчиос ляльчиосыд шоры борддор йылысен пукыӵенызы ыбылӥзы, эксэйлэн ляльчиосыз пӧлысь кӧня ке но мурт виемын вал; ляльчиед хеттей пи Урия но кулӥз».25Соку ыстэм муртлы Давид шуиз: «Иоавлы тазьы шу: ”Та уж тонэ медаз сюлэмшугъяськыты, уго кытӥ-отӥ меч погыртэ я созэ, я тазэ; та городлы золгес ожмаськыны кутскы но куашкаты сое”. Озьы солэсь мылкыдзэ ӝут».
26Урия кышно картэз Урия кулэм шуыса кылӥз но картсэ жаляса бӧрдӥз.27Бӧрдыса улэмысь дугдэм бераз Давид со доры медозэ ыстӥз, сое ас дораз вайиз. Солы кышно луиз, Давидлы пи нуны вайиз. Давидлэн та ужез Кузё-Инмарлы туж ярантэм вал.
Глава 11
