Choose Language
Old Testament Books
New Testament Books
1Кӧня ке дыр ортчыса, аммон калыклэн эксэез кулӥз, солэн интыяз аслаз Аннон пиез пуксиз.2Соку Давид шуиз: «Атаезлэн мыным ӟеч ужъёс лэсьтэмез понна Нааслэн Аннон пиезлы ӟеч уж лэсьто». Атаез понна куректэмезлэсь Аннонэз мед буйгатозы шуыса, Давид со доры медооссэ ыстӥз. Давидлэн медоосыз Аммон музъеме вуизы.3Нош аммон пиослэн кивалтӥсьёссы кузёзылы, Аннонлы, шуизы: «Давид тынэсьтыд атайдэ яратэменыз тон доры буйгатӥсьёсты ыстӥз шуыса, оло, малпаськод-а? Городэз эскерыны, мар вань пушказ сое чакланы, нош бӧрысь сое куашкатыны мед быгатозы шуыса, Давид аслэсьтыз медооссэ тон доры ӧз ысты-а?»4Аннон Давидлэсь медооссэ кутӥз но ваньзылэсь ӝыны тушсэс ӵышкиз, кускемозязы дӥськутсэс шори вандӥз но кошкыны лэзиз.5Та сярысь Давидлы ивор вуттэм бере соослэн пумитазы адямиосты ыстӥз, уго соос туж сантэм каремын вал. Эксэй соослы вераны косӥз: «Тушъёсты будытозь Иерихонын улэ, собере бертэ».
6Аммон пиос адӟизы, Давид азьын синазькыль макеос луизы шуыса; аммон пиос Беф-Реховысь сири пиосты асьсэлы медъяны ыстӥзы, Суваысь пыдын ожмаськись кызь сюрс сири пиосты медъяны, Маахаысь [амалик калыклэн] эксэезлэсь сюрс адямизэ, Истовысь дас кык сюрс адямиосты медъяны ыстӥзы.7Та сярысь ивор кылэм бераз Давид Иоавез кышкасьтэм ожгарчиосын ӵош ыстӥз.8Аммон пиос потыса капка доры ожмаськыны султӥзы, нош Суваысь но Реховысь, Истовысь но Маахаысь сири пиос асьсэ понна бусые нимазы султӥзы.
9Иоав адӟиз, тушмон ожгарчиос солы пумит азьтӥз но, бертӥз но султытэмын шуыса. Соку со Израильысь люкам самой усто ожгарчиосты бырйиз но сири пиослы пумит мыныны султытӥз.10Кылем люкетсэ Авесса братэз киулэ сётӥз, соос аммон пиос пумитэ мыныны мед султозы шуыса.11Соку Иоав шуиз: «Сири пиос монэ вормыны кутскизы ке, тон мыным юрттод; нош аммон пиос тонэ вормыны кутскизы ке, мон тыныд юрттӥськыны лыкто.12Кышкасьтэм лу, асьмелэн калыкмы понна, Кузё-Инмармылэн городъёсыз понна юн сыломы, нош Кузё-Инмар мар Солы кулэ, сое лэсьтоз».13Иоав но солэн котыраз люкаськем калык сири пиосын ожмаськыны кутскизы, соос со дорысь бызьыса кошкыны кутскизы.14Нош аммон ожгарчиос адӟизы сири пиослэсь бызьыса кошкемзэс, но соос но Авесса дорысь бызьыса кошкыны кутскизы, ас городазы берытскизы. Аммон ожгарчиос дорысь Иоав дор палаз берытскиз, Иерусалиме вуиз.
15Сири пиос, израиль ожгарчиослэсь соосты вормемзэс адӟыса, огазе люкаськизы.16Адраазар [Халамак] шур сьӧрысь сири пиосты ӧтьыны лэзиз, соос Еламе люкаськизы; нош Адраазарлэн ож ужъёсын кивалтӥсез Совак соослэн азьветлӥсьсы луиз.17Давид та сярысь кылэм бераз вань израиль пиосты люказ но Иордан тупала выжиз, Еламе вуиз. Сири пиос радэн-радэн Давидлы пумит султӥзы, соин ожмаськизы.18Сири пиос израиль ожгарчиос дорысь бызьыса кошконо луизы. Давид быдтӥз сири пиослэсь сизьым сю ожмаськон уробооссэс, ньыльдон сюрс вал вылын ожмаськисьёссэс; погыртӥз ож ужъёсын кивалтӥсьсэс, Совакез, со отчы ик кулӥз но.19Адраазарлы вань тэрытскыса улӥсь эксэйёс, израиль ожгарчиослэсь соосты погыртэмзэс адӟем беразы израиль калыкен тупаса улон кыл гожтӥзы, соослы тэрытскыса улыны кутскизы. Нош сири пиос азьланяз аммон калыклы юрттӥськыны кышказы ни.
Глава 10
