Choose Language
Old Testament Books
New Testament Books
1Вань израиль выжыос Хевронэ Давид доры лыктыса шуизы: «Ми – тынад лыосыд, тынад мугорыд.2Эшшо толон, толон валлян, Саул милям эксэймы луон дыръя, тон поттад-пыртад, валтылӥд Израилез; ”тон Мынэсьтым израиль калыкме возьмалод, Израильлэн азьветлӥсез тон луод”, – тыныд Кузё-Инмар шуиз».3Израильлэн вань тӧроосыз Хевронэ эксэй доры лыктӥзы но, Давид эксэй соосын Хевронын, Кузё-Инмар азьын, сӥзён-косон пыр кусып кылдытӥз; соку Давидэз [быдэс] Израильлы, вӧйын зырӟыса, эксэе пуктӥзы.
4Эксэе пуксьыкуз, Давидлы куамын арес вал; ньыльдон ар ӵоже эксэйын пукиз.5Хевронын Иудеялы сизьым ар но куать толэзь ӵоже эксэй вал, Иерусалимын быдэс Израилен но Иудеяен со эксэй луыса кивалтӥз куамын куинь ар ӵоже.
6Эксэй ас адямиосыныз ӵош Иерусалиме со шаерын улӥсь иевусейёслы пумит ожен мынӥзы; но соос Давидлы шуизы: «Тон татчы уд пыры; тонэ синтэмъёс но, пыдтэмъёс но уллялозы» – та «татчы Давид уз пыры» шуэмез возьматэ.7Но Давид Сӥон изкарез киултӥз; со Давидлэн городэз луиз.8Со нуналэ Давид шуиз: «Ваньмыз, иевусейёсыз виылӥсьёс, шибодыен мед бышкалтозы чутъёсты но, синтэмъёсты но, Давидлэсь лулзэ адӟонтэм карисьёсты». Соин ик шуэмын уго: синтэм но чут мурт [Кузё-Инмарлэн] корказ уз пыре.
9Давид изкаре улыны интыяськиз, сое ”Давидлэн карез” шуыса нимаз, Милло дорысен кутскыса, котыр ласянь, пушсэ но тупатъяз-выльдӥз.10Ужаз-улоназ Давидлэн азинлыкез вал, со ӝутскиз, Саваоф Инмар Кузё-Инмар соин ӵош вал.
11Тирлэн эксэез Хирам Давид доры адямиоссэ ыстӥз, нош озьы ик кедырпу коръёс келяз, тӥрен ужасьёсты, из ужен вырисьёсты ыстӥз – соос Давидлы корка ӝутӥзы.12Давид валатскиз, Кузё-Инмар сое Израильлы эксэе пуктӥз но Аслаз израиль калыкез понна солэсь эксэйлыксэ вылэ ӝутӥз шуыса.
13Хевронысь вуэм бераз Давид Иерусалимысь аслыз ляльчи кышноос, эшшо кышноос басьтӥз на.14Давидлэн эшшо вордскизы на пиосыз, нылъёсыз. Иерусалимын вордскем нылпиосызлэн тани нимъёссы: Самус, Совав, Нафан, Соломон,15Евеар, Елисуа, Нафек, Иафиа,16Елисама, Елидае, Елифалеф, [Самае, Иосиваф, Нафан, Галамаан, Иеваар, Феисус, Елифалаф, Нагев, Нафек, Ионафан, Леасамис, Ваалимаф, Елифааф].
17Давидэз Израильлы эксэе вӧйын зырӟыса пуктӥллям шуыса, Филистим музъемын улӥсьёс кылэмзы бере быдэс филистим калык Давидэз утчаны ӝутӥськиз. Та сярысь кылэм бераз Давид изкаре мынӥз.18Филистим ожгарчиос лыктыса, Рефаим нёжалэ интыяськизы.19Давид вӧсяськыса Кузё-Инмарлэсь тазьы юаз: «Филистим калыклы пумит мыным мыноно-а? Соосты мынам киулам сётод-а?» Кузё-Инмар Давидлы шуиз: «Мын, филистим калыкез Мон тынад киулад сёто».20Давид, Ваал-Перациме мыныса, соосты отчы погыртӥз, соку Давид шуиз: «Кузё-Инмар тушмонъёсме ву кадь азям пазяз». Соин ик со интылы Ваал-Перацим*а ним сётэмын.21[Филистим калык] отчы сульдэръёссэс-идолъёссэс кельтӥллям, нош Давид ас калыкеныз соосты огазе люказ, [соосты тылын сутыны косӥз].
22Филистим калык нош ик лыктӥз но Рефаим нёжалэ интыяськиз.23Давид Кузё-Инмарлэсь вӧсяськыса юаз: [«Филистим калыклы пумит мыным мыноно-а, соосты мынам киулам сётод-а?»] Солы Со шуиз: «Соослэн пумитазы эн поты, мышкытӥзы пыр, тутпу сурд паласен мын.24Тутпуослэн йылтӥзы мынӥсьлэсь куаразэ кылӥд ке, соку вырӟы, соку тынад азьтӥд Кузё-Инмар мыноз филистим ожгарчиосты погыртон понна».25Давид Кузё-Инмарлэн верамезъя лэсьтӥз но Гаваысен Газерозь филистим калыкез погыртӥз.
*а 5:20 Ваал-Перацим – «пазян; погыртон; куашкатон» шуэм луэ
Глава 5
