Choose Language
Old Testament Books
New Testament Books
1Сауллэн [Иевосфей] пиез кылӥз, Авенир Хевронын кулӥз шуыса, но солэн суйыз-пыдыз юскиськиз, быдэс Израиль но ӝоже усиз.2Сауллэн [Иевосфей] пиезлэн ожгарчиосын кивалтӥсьёсыз кык кузя вал; огезлэн нимыз – Баана, мукетызлэн – Рихав, соос Вениамин выжыысь, Беероф карысь Реммонлэн пиосыз луо, уго Беероф Вениамин музъеме интыяськемын вал.3Беероф карын улӥсьёс Гиффаиме бызьыса кошкизы, та дырозь но соос отын пыртос калык интыын уло.
4Сауллэн Ионафан пиезлэн чут пиез вал. Изреельысь Саулэн Ионафан сярысь ивор вуыку, солы вить арес вал, нуны утисьсы сое кияз кутыса пегӟиз. Нуны утись дыртыса бызьыкуз, нуны киысьтыз усиз но чут кылиз. Солэн нимыз Мемфивосфей.
5Беероф карысь Реммонлэн Рихав но Баана пиосыз лыктӥзы, Иевосфейлэн коркаез доры нуналлэн самой пӧсь вакытаз вуизы; нош со нуназе шорын валесаз кӧлэ вал.6[Корка возьмась чабей шорӟон куспаз нырулэм, умме усем.] Рихав но солэн Баана выныз корка пушкы пыризы чабей басьтон амалын; кӧтаз бышкалтӥзы но бызьыса кошкизы.7Корка пырыкузы, [Иевосфей] кӧлон висъетаз валес вылаз кылле вал; сое погыртӥзы, виизы, йырзэ ӵогизы, йырзэ сьӧразы басьтӥзы но быдэс уй ӵоже кыр дунне пыр мынӥзы.
8Иевосфейлэсь йырзэ Хевронэ Давид доры вуттӥзы но эксэйлы шуизы: «Тани лулдэ утчась тушмонэдлэн, Сауллэн Иевосфей пиезлэн, йырыз; туннэ Кузё-Инмар кузёе, эксэй понна Сауллы, [тынад тушмонэдлы], солэн нылпиосызлы пунэмзэ берыктӥз».9Беероф карысь Реммонлэн пиосызлы Рихавлы но солэн Баана вынызлы Давид ответ сётыса шуиз: «Котькыӵе но куректон-кайгуослэсь лулме мозмытӥсь Кузё-Инмар улэп!10Кин мыным таӵе ивор вайиз: ”Тани Саул [но Ионафан] кулӥз”, ассэ шумпотон ивор вайись шуыса лыдъясез мон кутӥ но, солы мед-кузьым сётэм интые, Секелагысен вии.11Нош табере тӥ, ярантэм адямиос, янгыштэм муртэ ас корказ, валес вылаз вииды; тӥляд киысьтыды мон солэсь вирзэ уг утча-а, музъем вылысь уг быдты-а тӥледыз?»12Давид медоосызлы косон сётӥз, соосты виизы, суйзэс, пыдзэс ӵогизы, Хевронысь ӵыпет вӧзы соосты ошизы. Нош Иевосфейлэсь йырзэ басьтӥзы но Хевронысь Авенирлэн шайгуаз ватӥзы.
Глава 4
