Choose Language
Old Testament Books
New Testament Books
1Саул доры Гивае [лымшор палась] зӥфейёс лыктӥзы но шуизы: «Тани, Иесимонлэн бурпалаз, Гахила вырйылын, Давид ватӥськыса улэ».2Саул султӥз но Зӥф кыре лэзиськиз, соин ӵош вал куинь сюрс быръем израиль воргоронъёс, соос мынӥзы Зӥф кыре Давидэз утчаны.3Саул интыяськиз Иесимонлэн бурпалысьтыз Гахила вырйылэ, сюрес дуре. Нош Давид со виын кыр дуннеын вал, со адӟиз, кызьы Саул со бӧрсьы луоё кыре мынӥз.4Давид чакласьёсты ыстӥз но тодӥз, Саул зэм ик [Кеильысь] лыктӥз шуыса.5Давид султӥз но [лушкемен] Сауллэн дугдэм интыяз мынӥз. Давид адӟиз Сауллэсь но ожгарчиосын кивалтӥсьсылэсь, Нирлэн Авенир пиезлэсь, изем интызэс. Саул кӧлӥз балаган пушкын, нош калык солэн котыраз интыяськиз.
6Давид берытскиз но хеттей пилы Ахимелехлы но Иоавлэн братэзлы, Саруялэн пиезлы, Авессалы, вазиськыса шуиз: «Сауллэн сылон интыяз кин монэн ӵош мыноз?» Авесса шуиз: «Мон тонэн ӵош мыно».7Давид Авессаен ӵош [Сауллэн] адямиосыз доры уйин лыктӥз. Но, тани, Саул кылле, балаган пушкын изе, шибодыез йыр дораз сюе бышкалтэмын, нош Авенир но вань калык котыраз кыллё.8Авесса Давидлы шуиз: «Тынэсьтыд тушмондэ туннэ Инмар тон кие сётӥз; озьыен, лэзь монэ, одӥг пол шуккыса сое шибодыен сюй борды пачкато, кыкетӥ ползэ уг ни шуккы».9Давид Авессалы шуиз: «Эн виы. Кузё-Инмарлэн вӧйын зырӟыса пуктэмезлы пумит кизэ ӝутӥсь мурт вӧсь карытэк кельтэмын луоз-а?»10Давид шуиз: «Улэп Кузё-Инмар! Кузё-Инмар сое мед погыртоз, яке нуналыз вуыса мед кулоз, яке оже мыныса мед быроз; нош монэ Кузё-Инмар медаз лэзьы Кузё-Инмарлэн вӧйын зырӟыса пуктэмез вылэ киме ӝутыны.11Нош тани али солэн йыр дорысьтыз шибодызэ басьты, вуэн сосудэз кут, собере асьме доры бертом».12Сауллэн йыр дорысьтыз шибодыез, вуэн сосудэз Давид кутӥз но соос асьсэ доры кошкизы. Нокин но ӧз адӟы, нокин но ӧз тоды, нокин но ӧз сайка – ваньзы шӧдытэк изизы, уго Кузё-Инмарлэн сётэм умменыз соос кӧлӥзы.
13Давид тупала выжиз, кыдёкысь гурезь йылэ султӥз; соос куспын бадӟым вис вал.14Давид, калыклы но Нирлэн Авенир пиезлы вазиськыса, тазьы шуиз: «Авенир, ответ сёт». Ответ сётыса, Авенир шуиз: «Кин тон сыӵе – кесяськиськод, эксэйлы люкетӥськод?»15Давид Авенирлы шуиз: «Воргорон ӧвӧл-а тон, Израильын тыныд укшасез вань-а? Малы бен тон аслэсьтыд кузёдэ, эксэез, уд утиськы? Уго калык пӧлысь кин ке но вуылӥз эксэез, тынэсьтыд кузёдэ, виыны.16Умойтэм тон лэсьтӥськод. Улэп Кузё-Инмар! Кузё-Инмарлэсь вӧйын зырӟыса пуктэмзэ, асьтэлэсь кузёдэс, утьымтэды понна тӥ виыны ярамонэсь. Учкы, кытын эксэйлэн шибодыез, вуэн сосудэз, соос солэн йыр дораз сыло вал?»
17Давидлэсь куаразэ тодмаса, Саул шуиз: «Тынад-а со куараед, Давид пие?» Давид шуиз: «Кузёе, эксэе, со мынам куарае».18Эшшо шуиз на: «Мар мон уродзэ лэсьтӥ, мар понна мон сьӧрын уйылӥськыса ветлэ мынам кузёе?19Али мынам кузёе, эксэе, ас ляльчиезлэсь верамзэ мед кылзоз: Кузё-Инмар тонэ мыным пумит ӝутӥз ке, соку та ужед тон дорысь ческыт зын поттӥсь курбон мед луоз; нош адями пиос ке, соку соос Кузё-Инмар азьын каргамын, уго соос та виын монэ уллязы, Кузё-Инмарлэн музъемысьтыз люкет басьтӥсь медам луы шуыса. Соос тазьы шуизы: ”Мын, мурт инмаръёслы ужа-тыршы”.20Мынам виры музъем вылэ Кузё-Инмар азе медаз кисьтӥськы; уго Израильлэн эксэез одӥг пыӵез утчаны потӥз, кызьы гурезьёстӥ кыр курег сьӧрын уйылӥсько».
21Саул шуиз: «Сьӧлыкай мон; Давид пие, берытскы, тыныд мон табере номыр но уродзэ уг ни лэсьты, уго туннэ мынам лулы тыныд дуно потӥз; укылтэм асме вози, туж трос сьӧлыкай».22Давид ответ сётыса шуиз: «Тани эксэйлэн шибодыез; егит пиос пӧлысь одӥгез мед лыктоз но сое мед басьтоз.23Зэмлыко, шонерлыко ужъёсызъя Кузё-Инмар ваньмызлы пунэмзэ мед берыктоз, уго Кузё-Инмар тонэ мон киулэ сётылӥз, нош мынам киме ӝутэме ӧз поты Кузё-Инмарлэн вӧйын зырӟыса пуктэмез вылэ.24Мынам азям туннэ макем дуно вал тынад лулыд, озьы ик мынам лулы но Кузё-Инмар азьын мед дунъяськоз, [Со монэ мед шобыртоз], вань шугадӟонъёслэсь монэ мед утёз!»25Соку Саул Давидлы шуиз: «Бакель каремын мед луод тон, Давид пие; уж но лэсьтод, сое быдэстыны кужымед но тырмоз». Давид ас сюрес кузяз кошкиз, нош Саул ас интыяз берытскиз.
Глава 26
