Choose Language
Old Testament Books
New Testament Books
1Самуил кулӥз. Вань израиль калык огазе люкаськиз, сое жаляса бӧрдӥзы, сое Рамае ватӥзы, ас городаз. Давид султӥз но Фаран нимо луоё кыр дуннее кошкиз.
2Маонын одӥг адями улӥз, солэн юртъерез Кармилын вал, со туж узыр улӥз; солэн куинь сюрс ыжез, сюрс кечез. Со Кармилын ыжъёссэ ӵышке вал.3Со адямилэн нимыз – Навал, нош кышноезлэн – Авигея. Со кышномурт укыр визьмо, чебер ымныро, нош пиосмуртэз – жалянэз валасьтэм, лек сямо; Халев выжыысь вал со.
4Луоё кыр дуннеысен Давид кылӥз, Навал ыжъёссэ [Кармилын] ӵышке шуыса.5Дас егит пиосты Давид ыстӥз, егит пиослы Давид шуиз: «Кармилэ тубе, Навал доры мыныса, мынэсьтым солы салам вералэ.6Тазьы шуэ: ”Ӟечбур, каньыллык тыныд, юртэдлы-семьяедлы каньыллык, маид вань – ваньмызлы каньыллык сӥзисько.7Али мон кылӥ, тон дорын ыж ӵышко шуыса; тани, ыж возьмасьёсыд милемын огазьын вал, ми соосты ултӥяса ӧм возе, Кармилын улон ӵожозязы соослэн номырзы но ӧз ышы.8Медоосыдлэсь юа, соос тыныд вералозы. Тон егит пиослы ӟеч мылкыддэ возьматы, уго ӟеч нуналэ ми лыктӥмы; мар тынад ки улад сюриз, сёт сое аслад ляльчиосыдлы, Давид пиедлы но сёт”».
9Давидлэн адямиосыз мынӥзы но Давидлэн нимыныз вань та верам кылъёсты Наваллы веразы, собере чус кариськизы.10Навал [тэтчыса султӥз но] Давидлэн медоосызлы ответ сётыса шуиз: «Кин со Давид, кин со Иессейлэн пиез? Та виын трос луизы ни кузёоссылэсь пегась ляльчиос.11Оло нош ыжъёсме ӵышкисьёслы дасям няньёсме, вуме, [винаме], сӥльме та тодмотэм адямиослы сётоно, кудъёсызлэн кытысь луэмзы но тодмо ӧвӧл?»12Давидлэн адямиосыз берен ас сюрес кузязы кошкизы, бертэм беразы вань та кылъёсты соос Давидлы веразы.13Соку Давид ас адямиосызлы шуиз: «Ваньды кускады мечтэс оше». Ваньзы кусказы мечсэс ошизы, Давид но мечсэ кусказ ошиз. Давид бӧрсьы вырӟиз ог ньыль сю мурт, нош кык сюэз уробоос котыре кылиз.
14Авигеялы, Наваллэн кышноезлы, одӥгез медо таӵе ивор вуттӥз: «Тани, кыр дуннеысен Давид асьмелэн кузёмылы ӟеч кылъёс вераны иворчиосты ыстӥз, но со ассэ соос азьын умойтэм возиз.15Нош та адямиос асьме понна укыр лякытэсь, асьмемыз ӧз ултӥялэ; бусыын улыкумы, соосын ӵош кӧня гинэ ӧм ветлэ, номырмы но ӧз ышы.16Уйин но, нуназе но, соосын артэ пудоосмес вань возьман нуналъёсамы соос асьмелы кенер интыын вал.17Озьыен, малпаськы, чакла, мар кароно; уго кузёмылы пумит бадӟым кышкытлык кылдэмын, быдэс семьяезлы но, нош со лек адями, соин вераськыны уг луы».
18Соку Авигея ӝог-ӝог басьтӥз кык сю сукыри нянь, кык сепыс вина, вить дасям ыжъёсты, вить мертэт куасьтэм ю, сю комок изюм, кык сю комок смоква, соосты ишак вылэ тыриз.19Собере медоосызлы шуиз: «Тӥ мынам азям мынэ, мон тӥ бӧрсьы мыно». Нош картэзлы, Наваллы, номыр но ӧз вера.
20Ишак вылын пукыса гурезь висъёстӥ васькыкуз, тани, солэн пумитаз Давид аслаз адямиосыныз лыктэ, со соосын пумиськиз.21Давид шуиз: «Эк, та адямилэсь ваньбурзэ кыр дуннеын юнме гинэ возьмаськем, маиз вал солэн, номыриз но ӧз ышы; ӟеч лэсьтэме понна со мыным уродэн пунэмзэ берыктӥз.22Ӵук ӟардытозь Наваллэсь ваньзэ, маиз солэн вань, ӧй ке быдты, одӥгзэ ке но борддор борды педло потасьсэ улэп кельтӥ ке, Давидлэн тушмонъёсызлы Инмар сое но, сое но мед лэсьтоз, эшшо тросгес мед лэсьтоз».
23Авигея Давидэз адӟем бераз дыртыса ишак вылысьтыз васькиз но Давид азе пыдесъяськыса музъем бордозь йыбырттӥз.24Пыд азяз йыбырттыса шуиз: «Кузёе, мон вылын сьӧлык улэ; ляльчидэ пеляд вераны лэзь, ляльчиедлэсь верамзэ санэ пон.25Кузёе та лек адямилэн, Наваллэн*а, шораз медаз учкы, уго кыӵе солэн нимыз, ачиз но сыӵе ик. Навал солэн нимыз, визьтэмъяськон со бордын улэ. Нош мон, тынад ляльчиед, кузёе, тынэсьтыд ыстылэм медоостэ ӧй адӟылы.26Кузёе, улэп Кузё-Инмар, тынад но лулыд улэп! Кузё-Инмар уз лэзьы тонэ вир кисьтыны мыныны, пунэм берыктонлэсь кидэ кутоз, али ик Навал кадь мед луозы тушмонъёсыд, кузёелы уродзэ малпасьёс.27Тани ляльчиедлэн кузёелы ваем саламъёсыз, соос кузёелэн ужась-тыршисьёсызлы, егит пиослы сётъяны ваемын.28Ляльчи кышномуртэдлэсь янгышсэ простить кар. Кузё-Инмар кузёелэсь эксэй выжызэ юнматоз, уго Кузё-Инмарлэсь ожмаськонъёссэ нуэ мынам кузёе, леклык вань улон даурад тон бордысь уз поты.29Тон сьӧры уйиськыны, лулдэ утчаны адями султӥз ке, соку мынам кузёелэн лулыз Инмаредлэн Кузё-Инмарлэн улон гердаз думемын луоз, нош тушмонъёсыдлэсь лулзэс Со из лэзьян арбериен кадь зӥртыса лэзёз.30Кузё-Инмар мынам кузёелы азьвыл верам вань ӟечсэ лэсьтӥз ке, Израильлы валтӥсь карыса тонэ пуктӥз ке,31соку мынам кузёелэн сюлмыз уз ӝожомы, уз сюлэмшугъяськы, юнме вир кисьтӥ но асме пунэм берыктонлэсь ӧй утьы шуыса. Кузё-Инмар мынам кузёелы ӟечлык сётоз, соку ляльчи кышномурттэ тодад ваёд [но солы гажан-жаляндэ возьматод]».
32Давид Авигеялы шуиз: «Данлыко Израильлэн Инмарез Кузё-Инмар, та виын мон доры пумиськыны тонэ Ыстӥсь,33бакельлыко тынад визьмыд-нодэд, бакельлыко тон али монэ вир кисьтонэ мыныны но ас киыным пунэм берыктыны монэ лэзьымтэед понна.34Израильлэн Инмарез Кузё-Инмар улэп, Со тыныд урод лэсьтыны монэ ӧз лэзьы – тон дыртыса ӧй ке лыктысалыд, монэн ӧй ке пумиськысалыд, Наваллэсь борддор вылэ педло потаса сылӥсьёссэ ӵукна ӟардытозьлы улэп ӧй кельтысал».35Мар ваем та кышномурт, ваньзэ сое Давид солэн киысьтыз басьтӥз но шуиз: «Каньыллыкен берт гуртад; тани, мон тынэсьтыд верамдэ санэ понӥ, куремдэ кабыл басьтӥ».
36Авигея Навал доры вуиз, но тани, солэн корказ сиён-юон ортчытӥське эксэй юртын кадь. Наваллэн сюлмыз-мылкыдыз шулдыр, со туж кудӟемын вал, соин ик солы со пал кыл но – троссэ но, ӧжытсэ но – ӵукнаозь ӧз вера.37Нош ӵукна Навал сайкиськем бере кышноез та сярысь вераз; куалектӥз солэн сюлмыз, со из кадь луиз.38Ог дас нунал ортчыса, Кузё-Инмар Навалэз погыртӥз но, со кулӥз.
39Навал кулэм шуыса Давид кылэм бераз шуиз: «Данлыко Кузё-Инмар, Наваллэн монэ сантэмамез понна пунэмзэ берыктӥсь, Ас ляльчидэ урод ужлэсь утись; Наваллэсь леклыксэ Со солэн йыр вылаз берыктӥз». Давид Авигеялы вераны ыстӥз, сое со кышно басьтэ шуыса.40Давидлэн медоосыз Авигея доры Кармилэ лыктӥзы но тазьы солы шуизы: «Давид милемыз ыстӥз тонэ аслыз кышнолы басьтыны».41Со султӥз но музъемозь йыбырттӥз но шуиз: «Тани, ляльчиед медо луыны, кузёелэн медоосызлэсь пыдзэс миськыны дась».42Авигея ӝогак дасяськиз, ишак вылэ пуксиз, сое келяса вить медо нылъёс мынӥзы; Давидлэн ыстэм муртъёсыз сьӧры со мынӥз но Давидлы кышно луиз.
43Изреельысь Ахиноамаез но Давид кышно басьтӥз, кыксы но соос солы кышно луизы.44Нош Саул Мелхола нылзэ, Давидлэсь кышнозэ, Галлимысь Лаишлэн Фалтий пиезлы кышнолы сётӥз.
*а 25:25 Навал – «визьзэ ыштэм, укылтэм» шуэм луэ
Глава 25
