Choose Language
Old Testament Books
New Testament Books
1Давид отысь потӥз но Ен-Гаддиын кышкыттэм интыосын улӥз.2Филистим калык дорысь Саул берытскем бере солы таӵе ивор вуттӥзы: «Давид Эн-Гадди кырын улэ».3Быдэс Израильысь куинь сюрс йыг-йыгесь воргоронъёсты Саул бырйиз но кыр кечъёслэн улоно гурезьёсазы Давидэз но солэсь адямиоссэ утчаны мынӥз.4Сюрес дурысь ыж возён кенер доры вуиз; отын пещераез вал, отчы Саул педло потаны пыриз; нош Давид но солэн адямиосыз пещералэн пыдсаз пуко вал.5Давидлэн адямиосыз солы шуизы: «Тани, Кузё-Инмарлэн верам нуналыз вуиз. Кузё-Инмар шуиз: ”Тушмондэ киулад сёто, мар соин каремед потэ, кар”». Давид султӥз но Сауллэн выл дӥсянэзлэсь дурзэ шыпытак вандӥз.6Нош со бере Давидлэн сюлмыз вӧсь луиз, Сауллэн дӥсянэзлэсь дурзэ вандӥз шуыса.7Аслаз адямиосызлы шуиз: «Кузёелы, Кузё-Инмарлэн вӧйын зырӟыса пуктэмезлы пумит киме ӝутыны Кузё-Инмар монэ медаз лэзьы, уго со Кузё-Инмарлэн вӧйын зырӟыса пуктэмез».8Та кылъёсын Давид ас адямиоссэ кутыса возиз, Сауллы пумит урдскыны ӧз лэзьы. Нош Саул султӥз но пещераысь сюрес вылэ потӥз.
9Со бӧрсьы пещераысь Давид потӥз, Сауллэн бӧрсяз кеськиз: «Эксэй, кузёе мынам!» Саул берзэ учкиз, соку Давид [солэн азяз] пыдесъяськыса йыбырттӥз.10Давид Сауллы шуиз: «Малы тон ”Давид тыныд пумит урод уж лэсьтыны малпа” шуэмзэс пеляд понӥськод?11Тани, тон туннэ ас синмыныд адӟиськод, кызьы Кузё-Инмар пещераысен тонэ мынам киулам сётӥз. Монэ косо вал тонэ виыны, но мон жаляй тонэ, шуи: ”Кузёе вылэ киме уг ӝуты, уго со Кузё-Инмарлэн вӧйын зырӟыса пуктэмез”.12Атае! Учкы, дӥсянэдлэн сӧзыез мынам киям: мон вандыса басьтӥ дӥсянэдлэсь дурзэ, нош мон тонэ ӧй виы. Тод, оскы: мынам сюлмам леклык, кескичлык но уг улы, тыныд пумит ӧй сьӧлыка; нош тон лулме быдтыны утчаськод.13Кузё-Инмар асьмелэсь кусыпмес мед сэрттоз-пертчоз, мон понна Кузё-Инмар пунэмзэ мед берыктоз; нош мынам киы тон вылэ уз вуы.14Кызьы шуэ вашкала мадён: ”Законлы пумит улӥсьёс бордысь законлы пумит улон потэ”. Нош мынам киы тон вылэ уз вуы.15Кинлы пумит султӥз Израильлэн эксэез? Кин бӧрсьы тон уйиськыса ветлӥськод? Одӥг кулэм айы пуны бӧрсьы, пыӵ бӧрсьы.16Кузё-Инмар судить мед кароз, асьмелэсь кусыпмес со мед сэрттоз-пертчоз. Со учкоз, эскероз мынэсьтым ужме, тынад киулысьтыд монэ утёз».
17Давид та кылъёсты Сауллы вераса дугдэм бере Саул шуиз: «Та тынад-а куараед, Давид пие?» Саул куаразэ бадӟым кариз, бӧрдыны кутскиз.18Давидлы шуиз: «Тон мынэсьтым шонергес, уго тон мыным пунэмдэ ӟечен берыктӥд, нош мон пунэмме уродэн берыктӥ.19Туннэ тон мыным ӟеч мылкыддэ возьматӥд: Кузё-Инмар монэ тон кие сётыку, тон монэ ӧд виы.20Кин тушмонзэ шедьтэ ке, вӧсь карытэк ӟеч сюрес вылэ потыны лэзе на? Кузё-Инмар та понна – мыным туннэ тон мар лэсьтӥд – со понна ӟеч лэсьтоз тыныд.21Табере мон тодӥсько: тон одно ик эксэе пуксёд, тынад киулад Израиль эксэйлык кужмо луоз.22Озьыен, Кузё-Инмарлэн нимыныз мыным кыл сёт, мон бере мынэсьтым выжыме уд быдты, атаелэн юртаз мынэсьтым нимме уд быдты шуыса».23Давид Саул азьын кыл сётӥз. Саул дораз бертӥз, нош Давид но солэн адямиосыз юнматэм каре тубизы.
Глава 24
