Choose Language
Old Testament Books
New Testament Books
1Давидлы таӵе ивор вуттӥзы: «Тани, филистим пиос Кеиль кар вылэ урдскизы, иншыръёсты таркало».2Давид вӧсяськыса Кузё-Инмарлэсь юаз: «Мыноно-а мыным, та филистим пиосты пазьгыны быгато-а?» Кузё-Инмар Давидлы таӵе ответ сётӥз: «Мын, филистим пиосты тон пазьгод, Кеиль карез утёд».3Нош Давидэн ӵош ветлӥсь муртъёс солы шуизы: «Тани, ми татын, Иудеяын, кышкаськомы ке, соку кызьы Кеиле филистим ожгарчиослы пумит мыныны дӥсьтомы? [Филистим ожгарчиос кие пленэ сюромы]».4Соку Давид нош ик вӧсяськыса Кузё-Инмарлэсь юаз, нош Кузё-Инмар солы таӵе ответ сётӥз: «Султы но мын Кеиле, филистим калыкез Мон тынад киулад сёто».5Давид ас адямиосыныз Кеиле мынӥз, филистим калыкен ожмаськиз, пудозэс улляса вайиз, соослы туж бадӟым шуккет лэсьтӥз, Кеильын улӥсьёсты Давид утиз.6Ахимелехлэн Авиафар пиез Давид доры ватӥськиз, [соин ӵош] Кеиле мыныкуз, сьӧраз ефодзэ басьтӥз.
7Давид Кеиле лыктӥз шуыса, Сауллы ивор вуттӥзы, соку Саул шуиз: «Инмар сое мон кие сётӥз, уго со капка пыр, ворсэтъёс пыр городэ пыриз но ворсэтэ сюриз».8Кеиле мыныса, Давидэз но солэсь адямиоссэ котыртон понна Саул вань калыкез оже мыныны люказ.
9Сауллэсь солы пумит лек уж лэсьтыны малпамзэ тодэм бераз Давид Авиафар священниклы шуиз: «Татчы [Кузё-Инмарлэсь] ефодзэ вай».10Давид шуиз: «Кузё-Инмаре Израильлэн Инмарез! Тынад ляльчиед кылӥз, монэн сэрен Саул, Кеиль каре лыктыса, сое куашкатыны медэ шуыса.11Кеильын улӥсьёс монэ со кие сётозы-а? Саул лыктоз-а татчы, кудӥз сярысь Тынад ляльчиед кылӥз? Кузё-Инмаре Израильлэн Инмарез, тае Ас ляльчиедлы усьты». Кузё-Инмар шуиз: «Лыктоз».12Соку Давид шуиз: «Кеильын улӥсьёс монэ но, мынэсьтым адямиосме но Саул кие сётозы-а?» Кузё-Инмар шуиз: «Сётозы».13Соку Давид, солэн адямиосыз но, ог куать сю мурт, султӥзы но Кеильысь потӥзы, кытӥ сюрем отӥ ветлӥзы. Нош Сауллы ивор вуттӥзы, Давид Кеильысь кошкем шуыса, соин сэрен ожен мынонзэ дугдытӥз.
14Давид улӥз кыр дуннеосысь пырыны луонтэм интыосын, собере Зӥф кырысь гурезьын. Котькуд нуналэ Саул сое утчаз, нош Инмар Давидэз солэн киулаз ӧз сёты.15Давид адӟиз, солэсь лулзэ Саул утчаны потӥз шуыса; Давид соку Зӥф кырысь нюлэскын вал.16Сауллэн пиез Ионафан Давид доры нюлэскы лыктӥз но Инмарлы осконэн сое юнматӥз.17Солы шуиз: «Эн кышка, атаелэн киыз тонэ уз шедьты, тон Израильлэн эксэез луод, мон тынад юрттӥсед луо; мынам атае, Саул, та сярысь тодэ».18Кузё-Инмарлэн азяз соос куспазы кыл сётон гожтӥзы; Давид нюлэскы кылиз, нош Ионафан дораз бертӥз.
19Зӥфын улӥсьёс Гивае, Саул доры лыктӥзы но шуизы: «Тани ми дорын, пырыны луонтэм интыосын, нюлэскын, Иесимонлэн бурпалаз, Гахила вырйылын, Давид ватскыса улэ.20Мылкыдыд вань ке, мын, эксэй, нош милям ужмы сое тон кие сётон».21Саул соослы шуиз: «Кузё-Инмар дорын тӥ бакель каремын монэ жалямды понна.22Мынэлэ, пыр-поч эскерелэ на, чаклалэ, кытчы солэн пыдъёсыз вамыштозы, кин сое адӟем, тодэ, уго сое укыр кескич адями, шуо.23Чаклалэ, эскере вань ватӥськон интыосты, кытчы со пегӟылэ; шонер иворен мон доры лыктэ, соку мон тӥледын ӵош мыно. Со та музъемын ке, соку мон сое вань Иудей музъемлэн сюрс интыосысьтыз утчало».24Султыса Сауллэсь азьлогес Зӥфе кошкизы. Нош Давид ас адямиосыныз ӵош Маон кырын вал, ӵошкыт интыын, Иесимонлэн бурпалаз.25Саул ас адямиосыныз сое утчаны мынӥз. Но Давидлы ивор вуттӥзы, соку со Маон кыре ик кылиз, изгурезе выжиз. Саул кылӥз но, Давид сьӧры уйиськыса, Маон кыре мынӥз.26Саул ас адямиосыныз гурезьлэн огпалтӥз мынӥз, нош Давид ас адямиосыныз гурезьлэн мукет палтӥз мынӥз. Давид дыртӥз Сауллэсь ӝоггес пегӟыны, нош Саул ас адямиосыныз Давидэз но солэсь адямиоссэ кутон вылысь котыртыса мынӥз.27Соку Саул доры иворчи вуыса шуиз: «Дырты, ӝоггес ву, филистим калык асьме музъем вылэ урдскиз».28Давид сьӧрын уйиськонысь Саул берытскиз но филистим калыклэн пумитаз мынӥз; соин ик та интыез Села-Гаммахлекоф*а шуыса нимазы.
*а 23:28 Села-Гаммахлекоф – «люкиськон изгурезь» шуэм луэ
Глава 23
