Choose Language
Old Testament Books
New Testament Books
1Отысь потыса, Давид Одоллам пещерае пегӟиз; та сярысь агайёсыз, атай юртысьтыз вань калык кылӥзы но со доры лыктӥзы.2Вань ёртыса-ӝикатыса воземъёс, пунэм тыроноос, лулынызы ӝожомыса улӥсьёс со доры люкаськизы, соослы со кузёйыр луиз; со котыре ог ньыль сю мурт люкаськиз.
3Отысен Давид Моав музъемысь Массифа каре мынӥз но моав калыклэн эксэезлы шуиз: «Мынам атаеным анае, Инмарлэсь монэн мар лэсьтэмзэ тодытозь, тӥ дорын мед улысалзы».4Моав эксэй доры соосты вайиз; Давид со пегӟон интыяз улытозь, соос пырак ӵоже Моавлэн эксэез дорын улӥзы.5Гад пророк Давидлы шуиз: «Та пеган интыяд эн ни улы, мын Иудей музъеме». Давид мынӥз но Херет нюлэскы вуиз.
6Саул кылӥз, Давид но солэн котыраз люкаськем калык та пала вуиллям шуыса. Саул соку Гиваын гурезь йылысь тыпы улын кияз шибоды кутыса пуке вал, вань медоосыз котыраз сылӥзы.7Котыраз сылӥсь медоосызлы Саул шуиз: «Вениамин пиос, кылзэ! Оло, Иессейлэн пиез тӥледлы ваньдылы бусыос, виноград бакчаос сётоз, тӥледыз сюрс муртэн, сю муртэн кивалтӥсьёс кароз шуыса тӥ малпаськоды-а?8Мар-о тӥ ваньды мыным пумит кариськиды-а? Одӥгды но ӧд вералэ мынам пиелэсь Иессейлэн пиеныз кусып кылдытэмез сярысь; одӥгды но монэ ӧд жалялэ, одӥгды но шарае ӧд поттэ, мынам пие мыным пумит ляльчиме сьӧлтэтъёс пуктыны ӝутказ шуыса, кызьы али со адӟиське ни».
9Сауллэн медоосыз пӧлын сылӥсь идумей пи Доик тазьы ответ сётӥз: «Мон адӟи, кызьы Иессей пи Номвае Ахитувлэн Ахимелех пиез доры ветлӥз.10Соиз Кузё-Инмарлэсь со сярысь вӧсяськыса юаз но солы сиён-юон, филистим пи Голиафлэсь мечсэ солы сётӥз».
11Эксэй Ахитув священниклэсь Ахимелех пизэ, атаезлэн юртаз улӥсь вань адямиосты, Номваысь священникъёсты, вайыны косӥз. Ваньзы соос эксэй доры лыктӥзы.12Соку Саул шуиз: «Ахитувлэн пиез, кылзы». Соиз шуиз: «Мон кылзӥсько, кузёе».13Саул солы шуиз: «Малы тӥ, тон но, Иессейлэн пиез но, мыным пумит мыныны вераськиды, тон солы нянь но, меч но сётӥд, со понна Кузё-Инмар азьын вӧсяськыса курид, – мыным пумит мед мыноз шуыса-а, сьӧлтэтъёс мыным мед пуктылоз шуыса-а, кызьы со али адӟиське ини?»
14Ахимелех эксэйлы ответ сётыса шуиз: «Вань ляльчиосыд пӧлын вань-а Давид кадь оскиськымонэз? Со эксэйлэн эмеспиез, тынэсьтыд косонъёстэ быдэсъясь, сӥлы каремын тынад юртад.15Табере-а Инмар азьын со понна вӧсяськыса юай? Эн, та пумысен янгыше эн уськыты, эксэй, ас ляльчидэ, атаелэн юртаз вань улӥсьёсты, уго ваньзэ та ужез ляльчиед уг тоды – пичизэ но, бадӟымзэ но».
16Соку эксэй шуиз: «Ахимелех, тон но, тынад атаедлэн юртаз вань улӥсьёс но виемын луыны кулэ».17Вӧзаз сылӥсь мугор возьмасьёсызлы эксэй шуиз: «Мынэлэ, Кузё-Инмарлэсь священникъёссэ виелэ, уго соос но Давидлэн палаз пыризы, со пегӟиз шуыса, соос тодӥзы ке но, мыным ӧз вералэ». Эксэйлэн ляльчиосызлэн Кузё-Инмарлэсь священникъёссэ виыны кизэс ӝутэмзы ӧз поты.
18Эксэй Доиклы шуиз: «Мын, священникъёсты виылы». Идумей пи Доик мынӥз но священникъёс вылэ урдӥськиз, со нуналэ тямыстон вить пиосмуртэ, етӥнлэсь ефод нуллӥсьёсты, вииз.19Номваез, священникъёслэсь городзэс, мечен кораз; пиосмуртъёсты но, кышномуртъёсты но, егит пиосты но, вож нуныосты но, ошъёсты но, ишакъёсты но, ыжъёсты но мечен кораса погыртӥз.20Утиськыны быгатӥз Ахитувлэн Ахимелех пиезлэн Авиафар нимо пиез гинэ, со пегӟиз Давид доры.
21Авиафар Давидлы вераз Сауллэн Кузё-Инмарлэсь священникъёссэ виылэмез сярысь.22Соку Давид Авиафарлы шуиз: «Идумей пи Доик со нуналэ отын луон дыръя со одно ик Сауллы урттылӥськоз шуыса мон тодӥ; атаелэн юртысьтыз виылэм лулъёс понна мон янгыш.23Кыль мон доры, эн кышка, кин мынэсьтым лулме утчалоз, со ик тынэсьтыд но лулдэ утчалоз; мон дорын улыкуд, тонэ утёзы».
Глава 22
