Choose Language
Old Testament Books
New Testament Books
1Рамае интыяськем Навафысь Давид пегӟиз, вуэм бераз Ионафанлы шуиз: «Мар мон лэсьтӥ, кыӵе мынам янгыше, атаед азьын кыӵе сьӧлык лэсьтӥ – мынэсьтым лулме утча?»2[Ионафан] солы шуиз: «Уд, тон уд кулы; тани, мынам атае бадӟымзэ но, пичизэ но ужез, мынам пелям вератэк, огзэ но уг лэсьты; та ужез малы мынэсьтым ватыны кулэ атаелы? Озьы уз луы».3Давид кылзэ сётыса шуиз: «Атаед ӟеч тодэ, тынад азяд мон ярамон адями луи шуыса, соин ик со ас понназ шуэ: ”Ионафан та сярысь медаз тоды, кӧтыз урод медаз луы”; но улэп Кузё-Инмар, улэп тынад лулыд! Кулон мынэсьтым одӥг вамыш кемын».4Ионафан Давидлы шуиз: «Мар кулэ тынад лулыдлы, ваньзэ лэсьто тон понна».
5Давид Ионафанлы шуиз: «Тани ӵуказе выль толэзьлэн потонэз, эксэен одӥг ӝӧк сьӧрын пукыны мон кулэ; лэзь монэ, куинь нунал ӵоже, ӝытозь, мон бусыын ватскыса уло.6Атаед мон сярысь юаз ке, тон шу: ”Давид аслаз Вифлеем городаз мыныны мынэсьтым куриськиз, уго отын солэн выжы-кумыосызлэн арлы быдэ курбон сётон интызы”.7Та пумысен со шуиз ке: ”Умой”, соку ляльчиедлы каньыллык луоз; нош атаед йырзэ кур кариз ке, соку тод: со лек уж лэсьтыны малпа.8Нош тон ляльчиедлы гажась-жалясь луэмдэ возьматы – уго тон монэн, Давид ляльчиеныд, Кузё-Инмар азьын эш луыны кыл сётӥд – мон бордын кыӵе ке янгышлык вань ке, ви монэ; малы тон монэ атаед доры нуыны кулэ?»9Ионафан шуиз: «Тазьы нокызьы но тонэн уз луы; уго мон тодоно луи ке, атае тыныд пумит мар ке но урод уж лэсьтыны малпам шуыса, со сярысь тыныд уг иворты шуыса, оло, малпаськод-а?»10Соку Давид Ионафанлы шуиз: «Кин мыным ивор сётоз, атаед йырзэ кур кариз ке?»
11Нош Ионафан Давидлы шуиз: «Ойдо, бусые потомы». Соос бусые потӥзы.12Ионафан Давидлы шуиз: «Израильлэн Инмарез Кузё-Инмар улэп! Ӵуказе та вадесын яке ӵуказе улыса атаелэсь мылкыдзэ кыӵе ке но амалэн тодыны быгато; Давидлы ӟеч мылкыдын ке со улэ, соку тон доры ивор уг ысты, тыныд уг тодыты,13Кузё-Инмар мыным, Ионафанлы, сое но сое мед лэсьтоз, эшшо но тросгес мед лэсьтоз. Нош атае тыныд пумит мар ке но уродзэ лэсьтыны турттэ ке, соку сое тыныд верало, тонэ кошкыны лэзё, соку каньылэн мын; Кузё-Инмар тон бордын мед луоз, кызьы вал мынам атаеным!14Тон но, мон улэп луи на ке, Кузё-Инмарлэсь гажан-жалянзэ мыным возьматы.15Нош мон кулӥ ке, мынам юртам улӥсьёсты гажам-жалямысь ноку но эн дугды, соку но – Давидлэсь вань тушмонъёссэ Кузё-Инмар музъем вылысь быдтӥз ке».
16Озьы Ионафан Давид юртэн кусып кылдытэм бераз шуиз: «Кузё-Инмар Давидлэн тушмонъёсызлэсь кылзэс мед юалоз!»17Ионафан нош ик Давидэз яратӥсько шуыса кыл сётыса вераз, уго сое со ас лулзэ кадь ик яратӥз.
18Ионафан солы шуиз: «Ӵуказе выль толэзь потон нунал, тон сярысь юалозы, уго тынад интыед буш луоз.19Соин ик куинетӥ нуналэ лэзиськы но ӝоггес мын азьвыл пегӟыса улэм интыяд, Азель из вӧзы, пуксьы.20Нош мон сопала куинь ньӧл ыбыса лэзё, мишене ыбылэм мактал.21Собере таӵе косонэн пинал пиез лэзё: ”Мын, ньӧлъёсты шедьты”, нош пинал пилы мон шуи ке: ”Тани, ньӧлъёсыд мышкад, басьты соосты”, соку тон мон доры лыкты, уго тыныд каньыллык луоз, улэп Кузё-Инмар, номыр но тыныд уз луы.22Нош пинал пилы тазьы ке шуи: ”Тани, ньӧлъёс тынад азяд”, соку тон кошкы, уго Кузё-Инмар кошкыны лэзе.23Нош мар асьмеос вераськимы – мон но тон – мон но тон вискын пумтэм вапумъёслы Кузё-Инмар адӟись луэ».
24Давид бусые ватӥськиз. Выль толэзь нунал вуиз, эксэй нуназе карыны пуксиз.25Огдышем сяменыз эксэй борддор вӧзысь пукон вылэ ас интыяз пуксиз; Ионафан султӥз, Авенир Саул вӧзы пуксиз, нош Давидлэн интыез буш кылиз.26Со нуналэ Саул номыр но ӧз вера, уго со малпаз, та огшоры учыр гинэ шуыса, Давид чылкыт ӧвӧл, ӧз чылкытатӥськы.
27Выль толэзьлэн кыкетӥ нуналыз вуиз, нош Давидлэн интыез нош ик буш кылиз. Соку Саул Ионафан пиезлы шуиз: «Малы Иессейлэн пиез туннэ но, толон но нуназе карыны ӧз лыкты?»28Ионафан Сауллы таӵе ответ сётӥз: «Давид мынэсьтым Вифлееме мыныны куриськиз.29Со шуиз: ”Лэзь монэ, милям городамы ӵыжы-выжыосы курбон сётон ортчыто, монэ агае ӧтиз; озьыен, тон монэ бакель карид ке, мон агайёсыным адӟиськыны ветло”, соин ик со эксэйлэн нуназе кароназ ӧз лыкты».
30Соку Саул Ионафанлы туж вожзэ поттыса шуиз: «Ярантэм, тэрытскисьтэм пи! Мон уг тодӥськы шат, тон Иессейлэн пиеныз эшъяськид шуыса, астэ возьытэ вуттонлы, ас анайдэ возьытэ вуттонлы со!31Уго Иессейлэн пиез музъем вылын улон дыръя тон но, тынад эксэйлыкед но сылыны уз чидалэ. Нош али Давидэз мон доры вайыны ысты, сое виыны кулэ».32Ионафан Сауллы, атаезлы, таӵе ответ сётӥз: «Мар понна сое виыны кулэ? Мар со лэсьтӥз?»33Соку Саул сое виён вылысь шибодызэ зӥртӥз. Ионафан валаз, атаез Давидэз виыны турттэ шуыса.34Туж вожез потыса, Ионафан ӝӧк сьӧрысь султӥз, выль толэзьлэн кыкетӥ нуналаз со нуназе ӧз кары, малы ке шуоно Давид пумысен со ӝоже усиз, эшшо атаез сое кылыныз вӧсь кариз.
35Мукетаз нуналэ, ӵукна, Ионафан бусые потӥз – Давидлы верам дыре, пинал пи соин ӵош вал.36Пинал пилы со шуиз: «Мын, бызь, мынэсьтым ыбылэм ньӧлъёсме утча». Пинал пи бызьыса мынӥз, нош Ионафан ньӧлъёссэ пинал пилэн сьӧраз лэзьяз.37Ионафанлэн ыбылыса лэзьям ньӧлъёсыз пала пинал пи бызьыса мынӥз. Пинал пилы Ионафан кесиськыса вераз: «Учкы, ньӧлъёс тынад азьпалад».38Ионафан нош ик пинал пилэн бӧрсяз кеськыса шуиз: «Ӝоггес бызь, эн дугдылы». Ионафанлэн пинал пиез ньӧлъёсты бичаз но аслаз кузёез доры лыктӥз.39Пинал пи номыр но ӧз тоды, Ионафанэн Давид гинэ тодӥзы, мар бордын ужпум.
40Ионафан бордысьтыз пинал пилы ожмаськон арбери сётӥз но шуиз: «Мын, городэ ну».41Пинал пи кошкиз, нош Давид лымшор палась султӥз но пыдесъяськыса музъемозь куинь пол йыбырттӥз. Ог-огзэс чупазы, ӵошен бӧрдӥзы, Давид золгес бӧрдӥз.42Ионафан Давидлы шуиз: «Каньылэн мын; нош Кузё-Инмарлэн нимыныз тазьы кыл сётэммы: ”Асьме куспын но, нылпиосмылэн нылпиоссы куспын но Кузё-Инмар мед луоз”, пумтэм вапумъёс ӵоже мед улоз».43[Давид] султыса кошкиз, нош Ионафан городаз берытскиз.
Глава 20
