Choose Language
New Testament Books
view with a second Bible
1Сыбӧрын енӧжсис ме кылі гора шы, жыв баитісӧ уна отир. Нія шувлісӧ:
─ Аллилуйя*а!
Мезмӧмыс, югьялӧмыс,
ошкӧмыс да выныс миян Енлӧн.
2Судитӧ Сія быль сьӧрті да веськыта.
Сія судитіс ыджыт карсӧ, кыскасись инькасӧ,
кӧда аслас кыскасьӧмӧн сэрпӧсьтіс мусӧ.
Сія мыжйис кыскасись инькасӧ
да сідз вештісис
Аслас раббезлӧн кисьтӧм вир понда.
3Нія бӧра шуисӧ:
─ Аллилуйя!
Сылӧн тшыныс пыр пондас кайны!
4Сэк кыкдас нёль*б пӧрисьыс да енӧжын нёль олісьыс уськӧтчисӧ юралан пукӧс вылын пукалісь Ен одзӧ да копыртчисӧ Сылӧ. Нія шувлісӧ:
─ Аминь! Аллилуйя!
5Сэтӧн Енлӧн юралан пукӧс дынсянь кыліс шы. Сія висьталіс:
─ Ошкӧ миянлісь Енсӧ быдӧнныт,
Сылӧн раббез да Сыись поліссез,
учӧттэз да ыджыттэз!
6Сэк ме кылі жыв уна отирлісь шы. Сія вачкисис уна ва усянлӧн шы вылӧ, горӧн гымалан шы вылӧ. Нія шувлісӧ:
─ Аллилуйя!
Дӧсвидзись Еныс, Дӧсвермисьыс,
ӧні пондіс юравны Ӧксуӧн!
7Гажмам да пондам гажӧтчыны,
лэбтам-ошкам Енсӧ.
Дзельыслӧн гӧтрасян кадыс локтіс.
Сылӧн невестаыс асьсӧ лӧсьӧтӧм ни,
8пасьтасьӧм сӧстӧм,
свиттялан чочком сӧдз лёнісь паськӧмӧ.
Сӧдз лёнісь паськӧмыс ─ вежа отирлӧн веськыта керӧмныс.
9Ангелыс меным висьталіс: «Гиж: "Шудаӧсь Дзельыслісь гӧтрасьӧмсӧ порйӧтӧм*в вылӧ корӧммес"». Сэтчӧ сія висьталіс: «Этна кыввес былись Еныслӧн».10Сэк ме уськӧтчи сылӧ коккезас копыртчыны. Сія меным висьталіс: «Видзӧт, эн кер сідз! Ме эд Енлӧн уджалісь, кыдз тэ да тэнат воннэт, кӧдна висьтасьӧны Исусыс йылісь. Еныслӧ копыртчы! Исусыс йылісь висьтасиссес эд баитӧны Енсянь юӧртан Ловсянь».
11Сэк ме казялі осьта енӧжсӧ, чочком вӧлӧс да сы вылын Пукалісьӧс. Сылӧн нимыс Надейнӧй да Быль. Сія эд судитӧ да тышкасьӧ веськыта.12Сылӧн синнэс ӧгралан би кодьӧсь. Юр вылас Сылӧн уна юркытшшез. Пукалісьыс вылын гижӧм Сылӧн нимыс, кӧдӧ некин оз тӧд. Тӧдӧ нимсӧ дзир Сія Ачыс.13Сы вылын паськӧмыс вӧлі вирӧсь. А нимыс Сылӧн ─ Енлӧн Кыв.14Сы бӧрсянь чочком вӧввез вылын верзьӧмӧн муніс енӧжсис тышкасян выныс. Нія пасьтасьӧмась вӧснит лёнісь сӧстӧм чочком паськӧмӧ.
15Вӧлыс вылын Пукалісьыс ӧмись петӧ лэчыт шыпурт, медбы сійӧн пӧрӧтны отирсӧ. Сія пондас веськӧтлыны ныӧн кӧрт бедьӧн. Виноград пичканінас Сія пичкӧ Дӧсвермись Енлісь лӧгся-лӧг винасӧ.16Сылӧн нимыс вӧлі гижӧм паськӧм вылас да викляч*г вылас: «Ӧксуэзлӧн Ӧксу да юраліссезлӧн Юралісь».
17Сэсся ме казялі шонді вылын сулалісь ангелӧс. Сія горӧн корис вылына лэбалісь кайесӧ: «Локтӧ, лэбзьӧ быдӧнныт ӧтлаӧ Енлӧн ыджыт гажӧтчӧм вылӧ.18Ӧксьӧ сёйны шойесӧ ӧксуэзлісь, вынаэзлісь, сюрс воинӧн веськӧтліссезлісь, вӧввезлісь, верзьӧмаэзлісь, кӧзяиннэзлісь да раббезлісь, учӧттэзлісь да ыджыттэзлісь».
19Сэтӧн ме казялі вӧрпасӧ, му вылісь ӧксуэсӧ да нылісь тышкасись йӧзсӧ. Нія ӧксьӧмась тышкасьны вӧв вылас Пукаліськӧт да Сылӧн тышкасян вынкӧт.20Вӧрпасӧ ӧтлаын бӧбӧтчись юӧртісьыскӧт кутісӧ. Бӧбӧтчись юӧртісьыс керліс адззывлытӧммесӧ вӧрпаыс нимӧн. Нійӧн сія ылӧтліс быдӧннысӧ, кӧдна вылын вӧлі вӧрпаыслӧн пасыс да кӧдна копрасисӧ сы вылӧ вачкисяна керӧмыслӧ. Кыкнаннысӧ нійӧ ловйӧн шентісӧ биӧн сотчан истӧгись тыӧ.21Мӧддэс вӧлісӧ вийӧмӧсь шыпуртӧн, кӧда петіс вӧв вылын Пукалісьыс ӧмись. Быдӧс кайес пӧттӧдз сёйисӧ шойесӧ.
*а 19.1 аллилуйя ─ еврей кыв вылын ошкан кыв, сія лоӧ «Ошкӧ Дӧсвидзисьсӧ!»
*б 19.4 кыкдас нёль ─ 24
*в 19.9 порйӧтны гӧтрасьӧм ─ провести свадьбу
*г 19.16 викляч ─ бедро
Глава 19
