Choose Language
New Testament Books
view with a second Bible
1Сыбӧрын ме казялі: енӧжсяняс лэдзчӧ вӧлі мӧдік ангел. Сылӧн вӧлі ыджыт вын. Сы югьялӧмсянь му вылас лоис югыт.2Сія горася-горӧн горӧтіс:
─ Разьсис, разьсис ыджыт Вавилоныс!
Лоис сія оланінӧн лёк ловвезлӧ,
быдпӧлӧс сэрпӧсь ловвезлӧ сувтчанінӧн,
быдкодь сэрпӧсь да нёштӧм кайезлӧ ӧксянінӧн.
Сія эд быдӧс отирсӧ юкталіс,
кыдз винаӧн кодззӧтліс аслас пӧтлытӧг кыскасьӧмӧн.
3Му вылісь ӧксуэс кыскасисӧ сыкӧт.
А вузасиссес сылӧн ёна гажӧтчӧммезсянь
сьӧмнысӧ ӧктісӧ.
4Сэтӧн ме кылі енӧжсис мӧдік висьталӧм шы:
─ Менам отирӧ,
петӧ сія карись,
медбы эдӧ керӧ
сылісь умӧль керӧммесӧ
и сійӧ мыжйӧмыс
ась оз усь тіян вылӧ.
5Сылӧн умӧль керӧммес
путриктісӧ-кайисӧ енӧжӧдззас,
и Еныс уськӧтіс нійӧ тӧдвылас.
6Вештісьӧ сылӧ сійӧн жӧ,
мый сія керис мӧдіккезлӧ.
Кыкись унажык вештӧ
сылӧн керӧм понда.
Лӧсьӧтӧ сылӧ винасӧ
кыкись курытжыкӧ сы винася,
кӧдӧ сія лӧсьӧтліс мӧдіккезлӧ.
7Сетӧ сылӧ шогсӧ да мырсьӧмсӧ сымда,
мымда сылӧн вӧлі гажӧтчӧмыс да ошкӧмыс.
Сія эд ас йывсис баитӧ:
ме пукала инь ӧксу моз,
ме абу дӧва и некӧр ог понды тӧждыны.
8Сы понда сійӧ ӧтік лунӧ
вӧтас быдкодь умӧльыс:
кулӧмыс, шогыс, тшыгьялӧмыс.
Сійӧ сотасӧ биын.
Сійӧ Судитісьыс, Дӧсвидзись Еныс, вына эд!
9Му вылісь ӧксуэс пондасӧ горзыны, герьявны сы понда, кӧр казяласӧ сы сотчӧмсянь кайӧм тшынсӧ. Нія эд сыкӧт кыскасисӧ да гажӧтчисӧ.10Сылісь маитчӧмсӧ адззӧмсянь повзьӧмувьяныс ылынкодь сулавтӧн нія пондасӧ шуны:
─ Умӧль, умӧль тэныт, Вавилон кар,
ыджыт вына кар!
Ӧтік час сьӧрна тэнӧ вӧтіс мыжйӧмыс!
11Сэк быдӧс вузасиссес пондасӧ горзыны да тӧждыны сы понда. Сэсся некин ни оз неб нылісь вузалан берсясӧ:12зарнисӧ, эзысьсӧ, дона иззэсӧ да жемчугсӧ, вӧснит сӧдз дӧрасӧ, пемыт-гӧрд да югыт-гӧрд дӧраэсӧ, шёлксӧ, чӧскыт руа пуэсӧ. Оз небӧ слон лыись, дона пуись, ыргӧнісь, кӧртісь да мраморись берсясӧ.13Оз небӧ нылісь корицасӧ, чӧскыт руа сирсӧ, смирнасӧ, ладансӧ, винасӧ да висӧ, пизьсӧ да шогдісӧ, мӧссэсӧ да баляэсӧ, вӧввесӧ да телегаэсӧ, раббесӧ да мӧдік отирсӧ.
14Быдӧс, мыйӧн тэ бурмӧтлін сьӧлӧмтӧ*а,
тэнат абу ни,
бурыт, пежьяланаыт тэнат ӧшис.
Тэ сійӧ сэсся некӧр ни он адззы.
15Вузасиссес сійӧ быдӧс вузалісӧ сылӧ да сысянь богатсялісӧ. Нія сылісь маитчӧмсӧ адззӧмсянь повзьӧмувьяныс ылын сулавтӧн пондасӧ горзыны да герьясьны сы понда.16Нія шуасӧ:
─ Умӧль! Умӧль ыджыт карлӧ!
Сылӧн паськӧмыс вӧлі вӧснит сӧдз дӧраись,
пемыт-гӧрд да югыт-гӧрд рӧма,
зарнисянь, дона иззэзсянь да жемчугсянь пежьяліс.
17Быдӧс сія дона берсяыс ӧтдруг тай ӧшис!
Сэк корабллезӧн веськӧтліссес, ныкӧт уяліссес, корабллез вылын мукӧд уджаліссес да саридз вылын вузасиссес ылӧ сувтчисӧ.18Нія видзӧтісӧ сотчан карсяняс лэбтісян тшыныс вылӧ да ойзӧмӧн баитісӧ: «Эм я кытӧнкӧ эта ыджыт кар кодь мӧдік карыс?»19Нія юррез выланыс киськалісӧ пӧимсӧ, горзісӧ, горӧтлӧмӧн герьясисӧ:
─ Умӧль! Умӧль ыджыт карыслӧ!
Быдӧнныс, кинлӧн вӧлісӧ саридз вылын корабллез,
богатсялісӧ сысянь.
Ӧтік час сьӧрна тай сія кушмуӧ пӧрис!
20─ Гажӧтчы сысянь, енӧж!
Гажӧтчӧ, вежа апостоллэз да Енсянь юӧртіссез!
Тіян понда сійӧ карсӧ Еныс мыжйис,
лёк керӧмыс понда вештісис.
21Сэтӧн вына ангел босьтіс изын кодь ыджыт из да шупкис сійӧ саридзас сэтшӧм кыввезӧн:
─ Сідз лоас шентӧм ыджыт Вавилон карыс.
Сія сэсся оз ни ло.
22Некӧр сэсся сэтӧн оз понды кывны
сиа орсан вылын орсӧмыс, сьыліссезлӧн сьылӧмыс,
пӧляннэз вылын да буксаннэз вылын орсан шыэс.
Некӧр сэтчӧ оз пет уджавны кужись морт.
Некӧр ни оз понды кывны изыннэзлӧн шыыс.
23Некӧр оз ӧзйы бивидзанын би.
Некӧр сэсся оз понды кывны
гӧтрасись зонкалӧн да невесталӧн шыныс.
Тэнат вузасиссет ыждалісӧ му вылас.
Аслат тшыкӧтчӧмӧн быдӧс отирсӧ тэ ылӧтін.
24Енсянь юӧртіссеслӧн, вежа отирлӧн
да му вылын быдӧс вийӧммеслӧн вирныс
киссис эта карын.
*а 18.14 бурмӧтны сьӧлӧм ─ удолетвориться, успокоить сердце
Глава 18
