Choose Language
New Testament Books
view with a second Bible
1Ме казялі ангелӧс, сія лэдзчӧ вӧлі енӧжись. Киас сылӧн вӧлі пыдӧстӧминісь ключ да ыджыт цеп.2Сія кутіс гундырсӧ, важ кыйсӧ да дорис сійӧ сюрс во кежӧ. Сійӧ гундырсӧ шуӧны "куль" да "сотана".3Ангелыс шентіс сійӧ пыдӧстӧминас да игналіс ыбӧссӧ. Сэтчӧ пуктіс пас, медбы сія эз бӧбӧтлы отирсӧ, кытчӧдз оз чулав сюрс во. Сыбӧрын сійӧ колас лэдзлыны недыр кежӧ.
4Сэсся ме казялі юралан пукӧссэз. Ны вылын пукалісӧ отир, кӧдналӧ вӧлі сетӧм судитан вын. Сэтӧн вӧлісӧ отирлӧн ловвез, кӧдналісь юррезнысӧ орӧтісӧ Исусыс йылісь висьтасьӧм понда да Ен Кыв понда. Нія эзӧ копрасьӧ вӧрпаыслӧ да сы кодь керӧмыслӧ, эзӧ пуктӧ сылісь пассӧ кымӧс выланыс да ки выланыс. Нія ловзисӧ да юралісӧ ӧтлаын Кристосыскӧт сюрс во сьӧрна.5Но мӧд кулӧммес эзӧ ловзьӧ, кытчӧдз эз чулав сюрс воыс. Сія медодзза ловзьӧтӧм.6Шудаӧсь да вежаӧсь нія, кӧдна ловзясӧ медодзза ловзьӧтӧм коста. Мӧдік кулӧмыс*б ны бердӧ оз ни вермы павкӧтчыны. Нія лоасӧ Енлӧн да Кристослӧн вежауджаліссезӧн да пондасӧ ӧтлаын Кристоскӧт юравны сюрс во сьӧрна.
7Сюрс во чулалӧм бӧрті сотанасӧ пыдӧстӧминсис лэдзасӧ. Сія иньдӧтчас бӧбӧтлыны муыс пасьта нёльнан ладорсис отирсӧ, Гог да Магог йӧзсӧ. Сія ӧктас нійӧ тышкасьны. Лоасӧ нія сымда, мымда саридз дорас песӧкыс.8Нія паськӧтчасӧ муыс пасьта, кытшӧвтасӧ вежа отирлісь оланінсӧ да Енлісь дона карсӧ.9Сэтӧн енӧжсис Еныссянь усяс би да ньылыштас нійӧ.10А отирсӧ ылӧтлісь кульсӧ шупкасӧ биӧн сотчан истӧгись тыӧ. Сэтчӧ вӧлі шупкӧмась ни вӧрпасӧ да бӧбӧтчись юӧртісьсӧ. Сэтӧн нійӧ пондасӧ маитны ой и лун, пырся-пыр.
11Сэсся ме казялі ыджыт чочком юралан пукӧс да сы вылын Пукалісьсӧ. Муыс да енӧжыс Сы син одзись пышшисӧ и некытчӧ нылӧ вӧлі воштісьны.12Ме адззылі кулӧммесӧ: ыджыттэс и учӧттэс сулалісӧ Ен одзын. Сэтӧн вӧлісӧ осьта небӧггез. Осьтісӧ эшӧ ӧтік небӧг. Сія вӧлі Олан небӧгыс. Кулӧммескӧт бӧрйисисӧ оліканыс керӧм сьӧрті, мый вӧлі гижӧм небӧггезас.13Сэк саридзыс, кулӧмыс да адыс сетісӧ кулӧммесӧ, кӧдна сэтчин вӧлісӧ. Быд морткӧт суд вылас бӧрйисисӧ олікас керӧм сьӧрті.14Кулӧмсӧ да адсӧ шентісӧ биа тыӧ. Сія ─ мӧдпырись кулӧмыс.15Киннэз эзӧ вӧлӧ гижӧмӧсь Олан небӧгас, нійӧ чапкисӧ биа тыӧ.
*а 20.1 сюрс во ─ тысяча лет
*б 20.6 кулӧм ─ смерть
Глава 20
