Choose Language
New Testament Books
view with a second Bible
1Дзельыс жугдіс сизимӧт пассӧ. Енӧжас шы не тӧв лоис. Сідз вӧлі джын час мымда.2Ме казялі сизим ангелӧс. Нія сулалісӧ Еныс одзын. Нылӧ сетӧмась сизим буксан.
3Сэсся сибӧтчис эшӧ ӧтік ангел да сувтіс езъяланіныс одзӧ. Сія киас видзис зарниись тшынӧтчан доз. Сылӧ вӧлі сетӧм уна ладан. Сійӧ ӧтлаын вежа отирлӧн кеймӧммезӧн колӧ пуктыны зарниись езъяланін вылӧ, кӧда сулаліс юралан пукӧс одзас.4Ангелыс киись ладансянь чӧскыт руа тшыныс ӧтлаын вежа отирлӧн кеймӧммезӧн лэбтісис Еныс дынӧ.5Сэсся ангелыс босьтіс тшынӧтчан дозсӧ, тыртіс сійӧ езъяланін вылісь бинас да шупкис му вылас. Сэтӧн кылісӧ гора шыэз, пондіс вирдавны-гымавны, муыс ёна зэгаліс.
6Сизим ангел лӧсьӧтчисӧ пӧльтны сизим буксанӧ.
7Медодзза ангеллӧн пӧльтӧм коста му вылас киссис вир сора биа шер. Сысянь муыслӧн да пуэслӧн куимӧт торыс сотчисӧ. Быдӧс зелёнӧй туруныс сотчис.8Мӧдік ангел пондіс пӧльтны аслас буксанӧ. Сэк биӧн сотчан ыджыт керӧс кодь мыйкӧ усис саридзас. Сысянь саридзыслӧн куимӧт торыс пӧртчис вирӧ.9Саридзас оліссез коласісь куимӧт торыс куліс. Корабллеслӧн куимӧт торыс вӧйис.
10Куимӧт ангел пондіс пӧльтны аслас буксанӧ. Сэк енӧжсис ӧгралӧмӧн усис ыджыт кӧдзув. Сія усис юэзлӧн да ва петаніннэзлӧн куимӧт тор вылӧ.11Кӧдзулыслӧн нимыс вӧлі Курыт урбӧж*а. Быдӧс ваэслӧн куимӧт торыс курзис. Сія курзьӧм васянь унаӧн кулісӧ.
12Нёльӧт ангел пондіс пӧльтны аслас буксанӧ. Сэк шондіыслӧн, тӧлісьыслӧн да кӧдзуввеслӧн куимӧт торрезныс изводасисӧ да кусісӧ. Сійӧн луныслӧн да ойыслӧн куимӧт торныс пемдіс.
13Сэсся ме казялі, кыдз енӧж шӧрӧттяс лэбзис ангел. Ме кылі сылісь горӧн висьтавлӧмсӧ: «Умӧль, умӧль, умӧль лоас му вылын оліссеслӧ куим ангеллӧн буксан шысянь. Нія чожа пондасӧ пӧльтны!»
*а 8.11 Курыт урбӧж ─ полынь
Глава 8
