Choose Language
New Testament Books
view with a second Bible
1Сыбӧрын ме адззылі нёль ангелӧс. Нія сулалісӧ му вылас нёльнан пельӧсас да видзисӧ муыслісь нёльнан тӧвсӧ, медбы тӧлыс эз пӧльт му вылӧ, саридз вылӧ да пуэз вылӧ.2Сэсся ме казялі витӧт ангелӧс. Сія локтіс асыввыв ладорсянь, киас видзис ловья Еныслісь пас пуктан. Сія горӧтіс нёль ангелыслӧ. Нылӧ вӧлі сетӧм вын тшыкӧтны мусӧ да саридзсӧ. Сія висьталіс:3«Эдӧ на керӧ умӧльсӧ муыслӧ, саридзыслӧ да пуэслӧ! Видзчисьыштӧ, кытчӧдз огӧ тэчӧ пассэсӧ кымӧссэзаныс миян Енлӧн раббезлӧ».
4Сэк ме кылі, кыным мортлӧ пуктасӧ пассӧ: сё нёльдас нёль сюрс*а мортлӧ. Нія отирыс Израильлӧн быд увтырись:5Иуда увтырись ─ даскык сюрс*б, Рувим увтырись ─ даскык сюрс, Гад увтырись ─ даскык сюрс,6Асир увтырись ─ даскык сюрс, Неффалим увтырись ─ даскык сюрс, Манассия увтырись ─ даскык сюрс,7Симеон увтырись ─ даскык сюрс, Левий увтырись ─ даскык сюрс, Иссакар увтырись ─ даскык сюрс,8Завулон увтырись ─ даскык сюрс, Ӧсип увтырись ─ даскык сюрс, Вениамин увтырись ─ даскык сюрс.
9Сыбӧрын ме видзӧтышті да казялі: юралан пукӧсыс одзын да Дзельыс одзын сулалісӧ унася-уна отир. Сымдасӧ некин оз вермы лыддьыны. Отирыс сэтӧн вӧлісӧ быд чужан вужись да увтырись, быд отирись да быд кыла йӧзісь. Нія вӧлісӧ чочком паськӧмаӧсь. Киэзаныс нія видзисӧ пальмапу уввез.10Отирыс горӧн шувлісӧ сэтшӧм кыввез:
─ Мезмӧмыс ─ миян Енсянь,
юралан пукӧс вылас Пукалісьсянь
да Дзельсянь!
11Быдӧс ангеллэс сулалісӧ юралан пукӧс гӧгӧрын, пӧриссес да нёль енӧжись олісь гӧгӧр. Сэк нія быдӧнныс уськӧтчисӧ кыминь юралан пукӧсыс одзӧ да копыртчисӧ Еныслӧ.12Нія шуисӧ:
─ Аминь!
Ошкӧм да югьялӧм,
мывкыд, буркывтӧм,
вылына лэбтӧм*г, вын да юралӧм
миян Енлӧ пырся-пыр. Аминь!
13Сэк пӧриссес коласісь ӧтік юаліс менчим: «Киннэз этна чочком паськӧмаэс? Кысянь нія локтісӧ?»14Ме сылӧ шуи: «Бур мортӧй, ог тӧд, но тэ тӧдан». Сэк сія висьталіс меным:
─ Этна морттэс ёна пессьӧм-мырсьӧмись*д локтісӧ.
Дзель вирӧн нія паськӧмнысӧ миссьӧтісӧ.
Паськӧмныс нылӧн лоис чочком.
15Сійӧн ӧні сулалӧны нія
Енлӧн юралан пукӧс одзын
да лун и ой Сылӧн Вежа Керкуын
кысъялӧны Сылӧ.
Юралан пукӧс вылас Пукалісьыс
пондас овны ныкӧт
да пыр пондас видзны нійӧ.
16Некӧр сэсся нія
озӧ пондӧ тшыгьявны,
некӧр оз понды косьмыны горшныс.
Некӧр нійӧ оз понды сотны шонді,
оз понды пӧжны луншӧрӧн.
17Юралан пукӧс одзас сулалісь Дзельыс
пондас видзӧтны ны сьӧрын.
Визывтан ловья ва дорӧ
пондас вайӧтлыны.
Еныс чышкас нылісь быд синва вотьсӧ.
*а 7.4 сё нёльдас нёль сюрс ─ 144 000
*б 7.5 даскык сюрс ─ 12 000
*в 7.9 лыдтӧм ─ бессчётный
*г 7.12 вылына лэбтӧм ─ честь
*д 7.14 пессьӧм-мырсьӧм ─ страдание
Глава 7
