Choose Language
New Testament Books
view with a second Bible
1«Сардис вичкуись ангелыслӧ гиж:
─ То мый висьталӧ Сія, Кӧдалӧн эмӧсь Енлӧн сизим лов да сизим кӧдзув. Ме тӧда тэнчит уджтӧ. Тэнӧ шуӧны ловьяӧн, а тэ эд кулӧм.2Саймы да вынсьӧт, мый тэнат эм, а ӧні куландорын ни. Ме эд адзза, тэнат керӧммет Енӧ одзын абу быд ладорсянь бурӧсь.3Уськӧт тӧдвылат, мый тэ кылін да босьтін. Ов сы сьӧрті да бергӧтчы умӧль керӧммет дынісь. Он кӧ саймы, Ме гусясись моз видзчисьтӧг локта тэ дынӧ. Менчим локтан кадӧс тэ он и понды тӧдны.
4А Сардисас тэнат эмӧсь кынымкӧ морт, кӧдна эзӧ сэрпӧсьтӧ ассиныс паськӧмнысӧ. Нія Мекӧт пондасӧ ветлӧтны чочком паськӧмӧ пасьтасьӧмӧн, нія эд туяна*а отир.5Вермалісьыс пасьтасяс чочком паськӧмӧ. Ме ог чышкы сылісь нимсӧ Олан небӧгсис*б. Аслам Айӧ одзын да Сы ангеллэз одзын Ме висьтала: сія ─ Менам.
6Пеля мортыс ась кылӧ Лолыслісь вичкуэслӧ висьталӧмсӧ».
7«Филадельфия вичкуись ангелыслӧ гиж:
─ То мый висьталӧ Вежаыс да Былисьыс*в, Кӧда дынын Давидлӧн ключыс. Мый Сія осьтӧ, некин оз вермы пӧднавны. Мый Сія пӧдналӧ, некин оз вермы осьтны.8Ме тӧда тэнчит уджтӧ. То, Ме осьті тэ одзын ыбӧссӧ. Сійӧ некин оз вермы игнавны. Тэнат выныт абу и уна, а тэ видзсин Менам кыв сьӧрті. Тэ эн суськись Менӧ тӧдӧмись.9То, сотана чукӧрсис мукӧдсӧ ме тшӧкта локны тэ дынӧ. Нія асьнысӧ шуӧны иудейезӧн, а нія эд абу иудейез, нія бӧбӧтчиссез. Нія локтасӧ да уськӧтчасӧ тэнат коккезӧ. Нія казяласӧ: Ме тэнӧ радейта.10Тэ кывзін Менӧ, мылаыт быртӧг видзсин. Сійӧн и Ме видза тэнӧ сьӧкыт кадӧ. Сія сьӧкытыс лоас быдсӧн муыс пасьта, медбы тӧдмавны-видзӧтны му вылісь оліссесӧ.
11Ме чожа локта. Бура видз сійӧ, мый тэнат эм, медбы некин эз мырддьы тэнчит юркытштӧ.12Вермалісьсӧ Ме сувтӧта ёна сулалан столбӧн Менам Енлӧн Вежа Керкуын. Сія пыр лоас сэтчин. Сы вылӧ Ме гижа Аслам Енлісь нимсӧ, Ассим виль нимӧс да Менам Енлӧн карлісь нимсӧ. Сія карыс ─ виль Ерусалим, кӧда лэдзчисьӧ енӧжсянь, Менам Енсянь.
13Пеля мортыс ась кылӧ Лолыслісь вичкуэслӧ висьталӧмсӧ».
14«Гиж и Лаодикия вичкуись ангелыслӧ:
─ То мый висьталӧ Сія, Кинлӧн нимыс Аминь, Еныслісь аркмӧтӧмсӧ*г Пондӧтісь, надейнӧй былись Висьталісь.15Ме тӧда тэнчит уджтӧ. Тэ абу дзирыт и абу кӧдзыт. Буржык бы вӧлі: тэ вӧлін бы кӧдзыт али дзирыт кӧ!16Тэ абу дзирыт, абу кӧдзыт, тэ шонытик. Сійӧн Ме тэнӧ сьӧвзя Аслам ӧмись.17Тэ тай баитан: "Ме бура ола, менам быдӧс эм, меным нем оз ков". А ачыт тай он тӧд, тэ шудтӧм, рукйӧсь, тэнат нем абу, тэ синтӧм да куш.18Ме велӧта тэнӧ. Медбы богатсявны, неб Менчим биын сӧстӧммӧм зарни. Медбы пасьтасьны, неб Менчим чочком паськӧм. Ась оз тыдав тэнат рожа кулян вывтырыт. Неб Менчим син веськӧтан да мавт ассит синнэтӧ, медбы пондін адззыны.19Кинӧс Ме радейта, сылӧ веськыта висьтала умӧль керӧмыс йылісь да вачкышта*д. Сідзкӧ, вынсьӧтчы бергӧтчыны аслат умӧль керӧммет дынісь.20То, Ме сулала ыбӧс одзас да ёркӧтча. Кылас кӧ кин Менчим шыӧс да осьтас ыбӧссӧ, Ме пыра сы ордӧ. Мийӧ ӧтлаын пондам рытйыны.
21Ме эд верми да пукси ордчӧн Айӧкӧт Сылӧн юралан пукӧс вылӧ. Сідз и вермалісьсӧ Ме пуксьӧта ордчӧн Аслам юралан пукӧс вылӧ.
22«Пеля мортыс ась кылӧ Лолыслісь вичкуэслӧ висьталӧмсӧ».
*а 3.4 туяна ─ достойныйс
*б 3.5 небӧг ─ книга
*в 3.7 Былись ─ Истинный
*г 3.14 аркмӧтӧм ─ сотворение
*д 3.19 вачкыштны ─ наказать
Глава 3
