Choose Language
New Testament Books
view with a second Bible
1Сэсся ме видзӧті да казялі енӧжӧ оссьӧм ыбӧс. Ме кылі шы, кыдз буксанісь. Сійӧ ме одзжык кывлі ни. Мекӧт баитісьыс висьталіс: «Кай татчӧ. Ме тэныт мыччала, мый сэсся лоас».
2Сэтӧн жӧ ме тыри Лолӧн. Сэк ме казялі: енӧжас сулаліс юралан пукӧс, сы вылын вӧлі Пукалісь.3Сія Пукалісьыс югьяліс кыдз дона иззэз ─ яшма да сердолик. Пукӧс весьтас вӧлі изумруд рӧма енӧшка.4Сы гӧгӧр сулалісӧ кыкдас нёль*а юралан пукӧс. Ны вылын пукалісӧ кыкдас нёль пӧрись, кӧднӧ пасьтӧтӧмась чочком паськӧмӧ. Юр выланыс нылӧн вӧлісӧ зарниись юркытшшез.5Юралан пукӧс дынісь петісӧ чарньӧввез, гымалӧм да гора шыэз. Сизим бивидзан сотчисӧ пукӧсыс одзын ─ нія Енлӧн сизим лов.6Юралан пукӧсыс одзын вӧлі жыв стеклоись саридз. Сія свиттяліс крусталь моз.
Юралан пукӧсыс одзын да сы гӧгӧрын сулалісӧ нёль енӧжись олісь. Одзсяняныс и бӧрсяняныс нія вӧлісӧ ӧддьӧн уна синаӧсь.7Ӧтікыс ны коласісь вӧлі лев кодь, мӧдыс ─ ӧшка кодь, куимӧтыс вӧлі морт чужӧма. Нёльӧтыс вачкисис лэбзись кутш*б вылӧ.8Нёльнанныслӧн вӧлісӧ квать бордӧн. Нылӧн ӧтмӧдӧрсянь вӧлісӧ синнэз, нельки борд увттэзас. Ой и лун нія дугдывтӧг шувлісӧ:
─ Вежа, вежа, вежа
Дӧсвидзись Еныс, Дӧсвермисьыс,
Кӧда вӧлі, эм да локтас.
9Енӧжын оліссес лэбтӧны-ошкӧны юралан пукӧс вылас Пукалісьсӧ, буркывтӧны*в пырся Олісьсӧ.10Сы коста кыкдас нёль пӧрисьыс уськӧтчӧны пукӧс вылас Пукалісь одзӧ да копыртчӧны пырся Олісьыслӧ. Нія тэчӧны ассиныс юркытшшезнысӧ юралан пукӧсыс одзӧ да шувлӧны:
11─ Дӧсвидзисьным,
дзир Тэ верман босьтны
лэбтӧм-ошкӧмсӧ да вынсӧ,
Тэ эд быдӧс аркмӧтін.
Тэнат лӧсьӧтӧм сьӧрті
быдӧс аркмӧтӧм да олӧ.
*а 4.4 кыкдас нёль ─ 24
*б 4.7 кутш ─ орёл
*в 4.9 буркывтны ─ благодарить
Глава 4
